କଟକ ଅଫିସ,୧୩।୧୦: ରାଜ୍ୟର ବିଭିନ୍ନ ବେଳାଭୂମିରେ ମଦ ଦୋକାନ ଖୋଲିବା ନିଷ୍ପତ୍ତିକୁ ଭାରତୀୟ ବିକାଶ ପରିଷଦ ପକ୍ଷରୁ ଚ୍ୟାଲେଞ୍ଜ କରାଯାଇଛି। ବେଳାଭୂମିର ପରିବେଶ ନଷ୍ଟ ହେବା ସହ ଅପରାଧ ବୃଦ୍ଧି ପାଇବ। ତେଣୁ ସେଠାରେ ମଦ ଦୋକାନ ଖୋଲା ନ ଯିବା ପାଇଁ ହାଇକୋର୍ଟ ନିର୍ଦ୍ଦେଶ ଦେବାକୁ ସୋମବାର ଜନସ୍ବାର୍ଥ ମାମଲା ରୁଜୁ ହୋଇଛି। ଏହି ମାମଲାରେ ପର୍ଯ୍ୟଟନ ଓ ସଂସ୍କୃତି ବିଭାଗ ପ୍ରମୁଖ ସଚିବ, ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମର ପରିଚାଳନା ନିର୍ଦ୍ଦେଶକ, ଗଞ୍ଜାମ, ବାଲେଶ୍ୱର, ଜଗତ୍ସିଂହପୁର ଓ ପୁରୀ ଜିଲାପାଳଙ୍କୁ ପକ୍ଷଭୁକ୍ତ କରାଯାଇଛି।
ଆବେଦନକାରୀ ଭାରତୀୟ ବିକାଶ ପରିଷଦର ସଭାପତି ସୁରେନ୍ଦ୍ର ପାଣିଗ୍ରାହୀ ପିଟିଶନରେ ଦର୍ଶାଇଛନ୍ତି, ରାଜ୍ୟ ସରକାରଙ୍କ ପର୍ଯ୍ୟଟନ ବିଭାଗ ପକ୍ଷରୁ ବାଲେଶ୍ୱର ଜିଲା ଉଦୟପୁରଠାରେ ୩ ଓ ଚାନ୍ଦିପୁରଠାରେ ୨, ଜଗତ୍ସିଂହପୁର ଜିଲା ପାରାଦୀପଠାରେ ୩, ପୁରୀ ଜିଲା ଚନ୍ଦ୍ରଭାଗା ବେଳାଭୂମିଠାରେ ୫, ଗଞ୍ଜାମ ଜିଲାର ଗୋପାଳପୁରଠାରେ ୫ ଓ ପାତିସୋନପୁରଠାରେ ୨ଟି ମଦ ଦୋକାନ ଖୋଲିବା ପାଇଁ ସେପ୍ଟେମ୍ବର ୨୧ରେ ଟେଣ୍ଡର ଡକାଯାଇଛି। ଲାଇସେନ୍ସ ଫି’ ବାବଦକୁ ଚନ୍ଦ୍ରଭାଗା ବେଳାଭୂମିର ମଦ ଦୋକାନ ପାଇଁ ବାର୍ଷିକ ଦେଢ ଲକ୍ଷ, ଗୋପାଳପୁର ପାଇଁ ୧ ଲକ୍ଷ, ଚାନ୍ଦିପୁର, ପାରାଦୀପ ଓ ପାତିସୋନପୁର ପାଇଁ ୭୫ ହଜାର ଲେଖାଏଁ ଆଦାୟ କରାଯିବ। ସେହିପରି ୟୁଜର ଫି’ ବାବଦକୁ ପ୍ରତି ମଦ ଦୋକାନରୁ ୧ଲକ୍ଷ ଟଙ୍କା ଲେଖାଏଁ ଆଦାୟ କରାଯିବ। ବେଳାଭୂମିରେ ମଦ ଦୋକାନ ଖୋଲିଲେ ନିଶାସକ୍ତଙ୍କ ଦୌରାତ୍ମ୍ୟ ବୃଦ୍ଧି ପାଇବା ସହ ପର୍ଯ୍ୟଟକଙ୍କ ଉପରେ ଏହାର କୁପ୍ରଭାବ ପଡିବ। ତେଣୁ ଉପରୋକ୍ତ ୨୦ ଗୋଟି ମଦ ଦୋକାନକୁ ସମ୍ପୂର୍ଣ୍ଣ ବନ୍ଦ କରିବା ପାଇଁ ଆବେଦନକାରୀ ପାଣିଗ୍ରାହୀ ହାଇକୋର୍ଟଙ୍କୁ ନିବେଦନ କରିଛନ୍ତି। ଆଇନଜୀବୀ ଗୋପାଳ ପ୍ରସାଦ ଜେନା ମାମଲା ପରିଚାଳନା କରୁଛନ୍ତି।