ପୁରୀ ଅଫିସ, ୩୧ା୧୨:ଓମିକ୍ରନ ସଂକ୍ରମଣ ଓ ଭିଡ଼କୁ ଆଶଙ୍କା କରି ପୁରୀ ଶ୍ରୀମନ୍ଦିରରେ ୩୧ତାରିଖଠାରୁ ଜାନୁୟାରୀ ୧ ଓ ୨ତାରିଖ ପର୍ଯ୍ୟନ୍ତ ସାଧରଣ ଦର୍ଶନ ବନ୍ଦ ରହିବ। ଏପରିକି ଜିଲାର ସମସ୍ତ ସ୍ଥାନରେ ଜିରୋ ନାଇଟ୍ ସେଲିବ୍ରେଶନ୍ ଉପରେ ପ୍ରଶାସନ ପକ୍ଷରୁ କଟକଣା ଜାରି କରାଯାଇଛି। ପର୍ଯ୍ୟଟନ ସ୍ଥଳୀ, ହୋଟେଲ, କ୍ଲବ୍, ରେସ୍ତୋରାଁ, ମଣ୍ଡପ, ଧର୍ମପୀଠଗୁଡ଼ିକରେ ଭୋଜିଭାତ କିମ୍ବା ପାର୍ଟିର ଆୟୋଜନ ହୋଇପାରିବ ନାହିଁ। ଏହି ୩ଦିନ ଜିଲାର ସମସ୍ତ ମନ୍ଦିର, ମସଜିଦ, ଗୀର୍ଜା ଓ ନାନାଦି ଧର୍ମପୀଠରେ ଗହଳି ଉପରେ କଟକଣା ରହିବ। ଆବଶ୍ୟକ ହେଲେ ସମ୍ପୃକ୍ତ ଅଞ୍ଚଳରେ ତହସିଲଦାର ଧର୍ମପୀଠଗୁଡ଼ିକୁ ବନ୍ଦ ରଖିପାରିବେ। ଏହି ସମୟରେ କେବଳ ବିବାହ ଓ ଶେଷକୃତ୍ୟ ସମାରୋହ କୋଭିଡ୍ କଟକଣା ମଧ୍ୟରେ କରାଯାଇପାରିବ। ଏ ନେଇ ଏସ୍ପି କନୱର ବିଶାଲ ସିଂ କହିଛନ୍ତି, ଜିଲାରେ ସାଂସ୍କୃତିକ କାର୍ଯ୍ୟକ୍ରମ ଓ ସାମୂହିକ ଭୋଜିଭାତକୁ ସମ୍ପୃକ୍ତ ଦିନରେ ବନ୍ଦ କରିବା ପାଇଁ ନିର୍ଦ୍ଦେଶ ଦିଆଯାଇଛି। ସ୍ଥାନୀଯ କର୍ତ୍ତୃପକ୍ଷଙ୍କୁ ମଧ୍ୟ ଏ ସମ୍ପର୍କରେ ଅବଗତ କରାଯାଇଛି। ଅନ୍ୟପକ୍ଷରେ ପୁରୀ ସହରରେ ପର୍ଯ୍ୟଟକଙ୍କ ଭିଡ଼ ୩୦ ତାରିଖ ରାତ୍ର ପର୍ଯ୍ୟନ୍ତ ରହିଥିଲା। ପର୍ଯ୍ୟଟକମାନେ ପୁରୀରେ ହୋଟେଲରେ ରହୁଥିବା ହେତୁ ବେଳାଭୂମିରେ ଗହଳି ହେବା ନେଇ ଆଶଙ୍କା ରହୁଥିବାର କଡ଼ା ନଜର ରଖାଯାଇଛି।