ଗଞ୍ଜାମ,୨୦।୧୦(ଡି.ଏନ.ଏ): ଗଞ୍ଜାମ ଜିଲା ୧୬ ନମ୍ବର ଜାତୀୟ ରାଜପଥ ପାର୍ଶ ପୁଇଁତୋଳାଠାରେ ଥିବା ମଧ୍ୟ ଇଂରାଜୀ ବିଦ୍ୟାଳୟଟି ବିଭିନ୍ନ ସମସ୍ୟା ଦେଇ ଗତି କରୁଥିବା ଜଣାପଡିଛି l ଗ୍ରାମବାସୀଙ୍କ ଉଦ୍ୟମରେ ୧୯୯୪ରେ ସ୍ଥାପିତ ହୋଇଥିବା ଏହି ସ୍କୁଲଟି ନିଉ ଏଡେଡ଼ ସ୍କୁଲ ହୋଇଥିବା ହେତୁ ସରକାରଙ୍କ ଆଢୁଆଳରେ ଥିବା ପରିଲିକ୍ଷିତ ହୋଇଛି। ଦୁଇଟି ଶ୍ରେଣୀଗୃହ ଷଷ୍ଠ ଓ ସପ୍ତମରେ ମୋଟ ୫୧ ଜଣ ଛାତ୍ରୀଛାତ୍ର ଅଧୟନ କରୁଥିବା ବେଳେ ପ୍ରଧାନ ଶିକ୍ଷକ ବିଷ୍ଣୁ ଚରଣ ପଟ୍ଟନାୟକ ଓ ସହକାରୀ ଶିକ୍ଷକ ସୁରେନ୍ଦ୍ର କୁମାର ଦଳାଇ ଶିକ୍ଷାଦାନ କରୁଛନ୍ତି l ସରକାରଙ୍କ ପକ୍ଷରୁ କେବଳ ମାଗଣା ଡ୍ରେସ, ବହି ଓ ମଧ୍ୟାହ୍ନ ଭୋଜନକୁ ଛାଡିଦେଲେ ଅନ୍ୟ କୌଣସି ଆନୁସଙ୍ଗିକ ବ୍ୟବସ୍ଥା ନାହିଁ। ସ୍କୁଲରେ ପାନୀୟ ଜଳ ବ୍ୟବସ୍ଥା ନାହିଁ। ପିଲାଙ୍କୁ ତ୍ଖେଳ ଉପକରଣ ମଧ୍ୟ ଯୋଗାଇଦିଆଯାଉ ନାହିଁ। ଏମିତିକି ସ୍କୁଲରେ ରଙ୍ଗ ଦେବା, ଚଖଡ଼ି, ଡଷ୍ଟର ଆଦି ସରକାରଙ୍କ ପକ୍ଷରୁ ଯୋଗାଇ ଦିଆଯାଉ ନ ଥିବା ପ୍ରଧାନ ଶିକ୍ଷକ ପଟ୍ଟନାୟକ କ୍ଷୋଭ ପ୍ରକାଶ କରିଛନ୍ତି। ସମସ୍ୟା ସମ୍ପର୍କରେ ବ୍ଲକ ଶିକ୍ଷାଧିକାରୀ ଭାଗିରଥୀ ବେହେରାଙ୍କୁ ପଚାରିବାରେ ବର୍ତ୍ତମାନ ଏନେଇ ଜିଲା ଶିକ୍ଷାଧିକାରୀଙ୍କ ଦୃଷ୍ଟି ଆକର୍ଷଣ କରି ପଦକ୍ଷେପ ନିଆଯିବ ବୋଲି ସେ କହିଛନ୍ତି l