ମୁମ୍ବାଇ,୨୩।୫: ଜୁଲାଇ ୧ରୁ ବର୍ମିଂହାମରେ ଖେଳାଯିବାକୁ ଥିବା ଇଂଲଣ୍ଡ ବିପକ୍ଷ ଏକମାତ୍ର ଟେଷ୍ଟ ଲାଗି ଭାରତୀୟ ଟେଷ୍ଟ ଦଳରୁ ଡାକରା ପାଇବା ପରେ ଖୁସି ପ୍ରକାଶ କରିଛନ୍ତି ଚେତେଶ୍ୱର ପୂଜାରା। ଖରାପ ଫର୍ମ କାରଣରୁ ଚଳିତ ବର୍ଷ ପ୍ରାରମ୍ଭରେ ଅନୁଷ୍ଠିତ ଶ୍ରୀଲଙ୍କା ବିପକ୍ଷ ଘରୋଇ ସିରିଜ୍ରୁ ତାଙ୍କୁ ବାଦ୍ ଦିଆଯାଇଥିଲା। ନିକଟରେ କାଉଣ୍ଟି କ୍ରିକେଟରେ ସେ ଦୁଇଟି ଦ୍ୱିଶତକ ସହ ୭୦୦ରୁ ଊର୍ଦ୍ଧ୍ୱ ରନ୍ ସ୍କୋର କରିଥିଲେ। କାଉଣ୍ଟି କ୍ରିକେଟରେ ତାଙ୍କ ପ୍ରଦର୍ଶନ ବିଚାରକୁ ନେଇଥିବାରୁ ଚୟନକର୍ତ୍ତାଙ୍କୁ ପୂଜାରା ଧନ୍ୟବାଦ୍ ଦେଇଛନ୍ତି।
”ଇଂଲଣ୍ଡ ଟେଷ୍ଟ ପାଇଁ ଭାରତୀୟ ଦଳରେ ସ୍ଥାନ ପାଇଥିବା ଏବଂ କାଉଣ୍ଟି କ୍ରିକେଟରେ ମୋ ପ୍ରଦର୍ଶନକୁ ବିଚାରକୁ ନିଆଯାଇଥିବାରୁ ମୁଁ ଅତ୍ୟନ୍ତ ଖୁସି। ମୋର ବଶ୍ୱାସ ଥିଲା, ଇଂଲଣ୍ଡ ବିପକ୍ଷ ମ୍ୟାଚ୍ ଲାଗି କାଉଣ୍ଟି କ୍ରିକେଟ ମୋତେ ଭଲ ସ୍ଥିତିରେ ରଖିବ। ପ୍ରତି ଥର ଭଳି ମୁଁ ବିଦେଶ ଗସ୍ତ ପୂର୍ବରୁ ଏଭଳି ପ୍ରସ୍ତୁତି ଏବଂ ଟ୍ରେନିଂକୁ ଗୁରୁତ୍ୱଦିଏ। ଆଶା କରେ ଭାରତୀୟ ଦଳ ପ୍ରତି ଯୋଗଦାନ ଜାରି ରଖିବି“ବୋଲି ପୂଜାରା ରବିବାର ରାତିରେ ଇଂଲଣ୍ଡରୁ କହିଛନ୍ତି। ଉଲ୍ଲେଖଯୋଗ୍ୟ, ସସେକ୍ସ ପକ୍ଷରୁ ଚଳିତ ସିଜନରେ ପୂଜାରା ମାତ୍ର ୫ ମ୍ୟାଚ୍ (୮ ଇନିଂସ)ରେ ୭୨୦ ରନ୍ କରିଛନ୍ତି। ଏଥିରେ ୪ଟି ଶତକ ରହିଛି। କେବଳ ଡରହାମର ସିନ ଡିକସନ ଓ ଡର୍ବିଶାୟାରର ଶନ ମାସୁଦ କାଉଣ୍ଟି ଚାମ୍ପିୟନଶିପ୍ ଡିଭିଜନ ୨’ରେ ତାଙ୍କ ଠାରୁ ଅଧିକ ସ୍କୋର କରିଛନ୍ତି। ୩୩ ବର୍ଷୀୟ ପୂଜାରା ଏବେ ୧୦୦ ଟେଷ୍ଟଠାରୁ ମାତ୍ର ୫ ମ୍ୟାଚ୍ ଦୂରରେ ଅଛନ୍ତି।