ଇସଲାମାବାଦ,୧୪।୧ : ଅନ୍ୟ ଏକ ଅତ୍ୟାବଶ୍ୟକ ରୋଷେଇ ସାମଗ୍ରୀ ପାକିସ୍ତାନରେ ମୁଦ୍ରାସ୍ଫୀତି ଦ୍ୱାରା ପ୍ରଭାବିତ ଲୋକଙ୍କ ପାଇଁ ମହଙ୍ଗା ହେବା ଆରମ୍ଭ କରିଛି। ଡନ ଖବରକାଗଜ ରିପୋର୍ଟ ଅନୁଯାୟୀ, ବନ୍ଦରରେ ଆମଦାନୀ ହୋଇଥିବା ସାମଗ୍ରୀଗୁଡିକ କ୍ଲିୟରାନ୍ସ ନହେବା କାରଣରୁ ଦେଶରେ ଡାଲିର ମୂଲ୍ୟ ବୃଦ୍ଧି ପାଉଛି।
କରାଚି ହୋଲସେଲ୍ସ ଗ୍ରୋସର ଆସୋସିଏସନ (କେଡବ୍ଲୁଏଜିଏ) ର ସଭାପତି ରୌଫ ଇବ୍ରାହିମ କହିଛନ୍ତି ଯେ ଡଲାର ଅଭାବ ଯୋଗୁ ଗତ ଦୁଇ ମାସ ଧରି ବନ୍ଦରରେ ୬ ହଜାରରୁ ଅଧିକ ଡାଲି କଣ୍ଟେନର କ୍ଲିୟରାନ୍ସ ହୋଇ ପାରିନାହିଁ। ଦାମ ବୃଦ୍ଧି ଯୋଗୁ ଲୋକଙ୍କ ଭାତଥାଳିରୁ ଡାଲି ଅଦୃଶ୍ୟ ହୋଇ ଯାଇଛି।
ସାମଗ୍ରୀ ଆମଦାନୀ / ରପ୍ତାନି କରୁଥିବା ଫୈସଲ ଆନିଜ ମାଜିଦ ଡନକୁ କହିଛନ୍ତି ଯେ ଖୁଚୁରା ବଜାରରେ ମସୁର, ମୁଗ, ବୁଟ ଡାଲିର ଦାମ କିଲୋଗ୍ରାମ ପିଛା ଯଥାକ୍ରମେ ୨୭୦-୨୮୦ ପାକିସ୍ତାନୀ ମୁଦ୍ରା, ୨୫୦-୩୦୦, ୩୮୦-୪୦୦ ରେ ପହଞ୍ଚିଛି। ବନ୍ଦରରୁ ଡାଲି କଣ୍ଟେନର ଗୁଡିକର କ୍ଲିୟରାନ୍ସ ନହେବା ଯୋଗୁ ଖୁଚୁରା ମୂଲ୍ୟ ଆହୁରି ବଢ଼ିବାର ଆଶଙ୍କା କରାଯାଉଛି।