ଜମ୍ମୁ,୨୫।୮: ପୁଲଓ୍ବାମା ଆକ୍ରମଣ ଏବେବି ଜୀବନ୍ତ ହୋଇ ରହିଛି ପ୍ରତିଟି ଭାରତୀୟଙ୍କ ହୃଦୟରେ। ୧୪ ଫେବୃୟାରୀ, ୨୦୧୯ରେ ପୁଲଓ୍ବାମାରେ ହୋଇଥିବା ଆତଙ୍କବାଦୀ ଆକ୍ରମଣ ମାମଲାକୁ ରାଷ୍ଟ୍ରୀୟ ଯାଞ୍ଚ ଏଜେନ୍ସି(ଏନ୍ଆଇଏ)କୁ ଦିଆଯାଇଛି। ଜମ୍ମୁର ଏନ୍ଆଇଏ ଅଦାଲତରେ ୧୧ ଅଭିଯୁକ୍ତଙ୍କ ବିରୋଧରେ ଚାର୍ଜସିଟ ଦାଖଲ କରିବାକୁ ପହଞ୍ଚି ସାରିଛି। ଏଥିରେ ୫୦୦୦ରୁ ଊର୍ଦ୍ଧ୍ୱ ପୃଷ୍ଠାର ଚାର୍ଜସିଟ୍ ଦାଖଲ କରାଯିବ ବୋଲି କୁହାଯାଉଛି। ଡେପୁଟି ଇନସପେକ୍ଟର ଜେନରାଲ ସୋନିଆ ନାରଙ୍ଗ ଓ ପୋଲିସ ଅଧିକ୍ଷକ ରାକେଶ ବଲଓ୍ବାଲଙ୍କ ଏକ ଦଳ ଯାଞ୍ଚ ପରେ ଏହି ଚାର୍ଜସିଟ ପ୍ରସ୍ତୁତ କରିଛନ୍ତି। ଏଥିରେ ଜୈଶ-ଇ-ମହମ୍ମଦର ମସୁଦ ଅଜହର, ତାଙ୍କ ଭାଇ ଅବଦୁଲ ରଉଫ ଅସଗର, ଆତଙ୍କବାଦୀ ସଙ୍ଗଠନର ଆଉ କେତେଜଣ ଆତଙ୍କବାଦୀ ଓ ୭ ଗିରଫ ହୋଇଥିବା ଆତଙ୍କବାଦୀ ତଥା ଅଭିଯୁକ୍ତଙ୍କ ନାଁ ରହିଛି। ସୂଚନାଯୋଗ୍ୟ, ପୁଲଓ୍ବାମା ଆକ୍ରମଣରେ ସିଆର୍ପିଏଫ୍ର ୪୦ ଜବାନ ଶହୀଦ ହୋଇଥିବା ବେଳେ ଏହି ଘଟଣା ପାଇଁ ପାକିସ୍ତାନର ଆତଙ୍କବାଦୀ ସଙ୍ଗଠନ ଜୈଶ-ଇ-ମହମ୍ମଦ ନିଜକୁ ଦାୟୀ କରିଥିଲା।