ନୂଆଦିଲ୍ଲୀ,୮।୮(ପି.ଟି.): ଭାରତୀୟ କ୍ରିକେଟ ଦଳର କିଟ୍ ପ୍ରାୟୋଜକ ଦୌଡ଼ରେ ବିଶ୍ୱର ଦୁଇ କ୍ରୀଡ଼ା ପୋଷାକ ଉତ୍ପାଦନକାରୀ କମ୍ପାନୀ ପୁମା ଓ ଆଡିଡାସ ସାମିଲ ହୋଇଛନ୍ତି। ଜର୍ମାନୀ କମ୍ପାନୀ ପୁମା କିନ୍ତୁ ଏହି ଦୌଡ଼ରେ ସମସ୍ତଙ୍କଠାରୁ ଆଗରେ ରହିଛି। ଆଡିଡାସ୍ ମଧ୍ୟ ଏହି ଦୌଡ଼ରେ ସାମିଲ ହେବାର ସମ୍ପାବନା ସୃଷ୍ଟି ହୋଇଛି। ତେବେ ଅନ୍ୟତମ କ୍ରୀଡ଼ା ପୋଷାକ ଉତ୍ପାଦନକାରୀ କମ୍ପାନୀ ନାଇକ୍ ଏହି ଦୌଡ଼ରେ ସାମିଲ ହୋଇଛି କି ନା ତାହା ଜଣାପଡିନାହିଁ। ୨୦୧୬ରୁ ୨୦୨୦ ପର୍ଯ୍ୟନ୍ତ ନାଇକ୍ ଭାରତୀୟ କ୍ରିକେଟ କେଣ୍ଟ୍ରୋଲ ବୋର୍ଡ (ବିସିସିଆଇ) ସହ ଚୁକ୍ତି କରିଥିଲା ଓ ୩୭୦ କୋଟି ଟଙ୍କା ଦେଇଥିଲା। ତେବେ ବିସିସିଆଇ ଅପେକ୍ଷାକୃତ କମ୍ ବିଡ୍ ଲଗାଇବା ନେଇ ପ୍ରସ୍ତାବ ରଖିବା ପରେ ନାଇକ୍ ଏଥିରେ ସହମତି ପ୍ରକାଶ କରି ନ ଥିଲା ଓ ଏହାକୁ ପ୍ରତ୍ୟାଖାନ କରିଥିଲା।
ତେବେ ପୁମା ଇତିମଧ୍ୟରେ ବିଡ୍ ଡକ୍ୟୁମେଣ୍ଟ ବା ଆଇଟିଟି (ଇନ୍ଭାଇଟେଶନ ସହ ଟେଣ୍ଡର) ଦସ୍ତାବିଜ୍ ୧ ଲକ୍ଷ ଟଙ୍କା ବିନିମୟରେ କ୍ରୟ କରିଛି। ବିଡ୍ ଦାଖଲ କରିବାକୁ ପୁମା ସ୍ବତନ୍ତ୍ର ଭାବେ ଉତ୍ସାହିତ ଅଛି ବୋଲି ନିଜ ନାମ ଗୋପନ ରଖି ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି। ଆଡିଡାସ୍ ମଧ୍ୟ ଏଥିରେ ସାମିଲ ହେବାକୁ ଇଚ୍ଛା ଜାହିର କରିଛି। ସାରା ବିଶ୍ୱରେ ପୁମାର ୩୫୦ଟି ସ୍ବତନ୍ତ୍ର ଷ୍ଟୋର ଓ ଆଡିଡାସ୍ର ୪୫୦ରୁ ଊର୍ଦ୍ଧ୍ୱ ଆଉଟ୍ଲେଟ ରହିଛି।
ଭାରତୀୟ ଅଧିନାୟକ ବିରାଟ କୋହଲି ଓ ଓପନର ଲୋକେଶ ରାହୁଲ ଏବେ ପୁମାର ବ୍ରାଣ୍ଡ୍ ଆମ୍ବାସାଡର ରହିଛନ୍ତି। ପୁମା ମଧ୍ୟ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ସହିତ ଜଡିତ ରହିଛି। ତେଣୁ ଭାରତୀୟ ମାର୍କେଟରେ ନିଜର ପ୍ରଭାବ ବିସ୍ତାର କରିବାକୁ ପୁମା ଏବେ ପ୍ରସ୍ତୁତ ହୋଇଛି ବୋଲି ଅଧିକାରୀ ଜଣକ କହିଛନ୍ତି। ବିସିସିଆଇ ମ୍ୟାଚ୍ ପିଛା ବେସ୍ ପ୍ରାଇସ୍ ୬୧ ଲକ୍ଷ ଟଙ୍କା ରଖିଛି। ତେବେ ଏହା ପୂର୍ବରୁ ମ୍ୟାଚ୍ ପିଛା ବେସ୍ ପ୍ରାଇସ୍ ୮୮ ଲକ୍ଷ ଟଙ୍କା ରହିଥିଲା।