କଖାରୁକୁ ରନ୍ଧାଯିବା ସହ ସେଥିରେ ବିଭିନ୍ନ କଳାକୃତୀ କରାଯାଉଥିବା କଥା ଜାଣିଥିବେ। ହେଲେ ଏଇ କଖାରୁରେ ଯେ ଡଙ୍ଗା କରିହେବ, ତାହା ଅନେକେ ଜାଣି ନ ଥିବେ। କଖାରୁ ଡଙ୍ଗାରେ ବସି, ଚପୁ ଚଲାଇ ପାଣିରେ ବହୁ ଦୂର ଯାଇ ଜଣେ ବ୍ୟକ୍ତି ରେକର୍ଡ ବି କରିଛନ୍ତି। ଡୁଆନେ ହାନଶେନ୍ ନାମକ ଏହି ବ୍ୟକ୍ତି ଜଣକ ୬୦ ବର୍ଷ ବୟସରେ ପଦାର୍ପଣ କରିବାର ପରଦିନ ଏକ ଆଡଭେଞ୍ଚର୍ସ କାମ କରିବାକୁ ଚାହୁଁଥିଲେ। ତେଣୁ ସେ ଏକ ବଡ କଖାରୁର ଭିତରକୁ କୋରି ତାକୁ ଡଙ୍ଗାର ରୂପ ଦେଇ ତା’ଭିତରେ ବସି ଚପୁ ଚଳାଇ ମିସୌରି ନଦୀରେ ୩୭.୫୦ ମାଇଲ୍ ବାଟ ଯାଇ ଗିନିଜ ଓ୍ବାର୍ଲଡ ରେକର୍ଡସ୍୍ରେ ସ୍ଥାନ ପାଇଲେ। ଏହାପୂର୍ବରୁ ନର୍ଥ ଡକୋଟାର ରିକ୍ ସ୍ବେନସନ୍ କଖାରୁ ଡଙ୍ଗାରେ ୨୫.୫ ମାଇଲ୍ ଯାଇ ରେକର୍ଡ କରିଥିଲେ। ଡୁଆନେ ସେହି ରେକର୍ଡକୁ କାଟି ନୂଆ ରେକର୍ଡ କରିବାରେ ସଫଳ ହେଲେ।