ମୁମ୍ବାଇ,୪ା୨: କଣ୍ଟ୍ରୋଭର୍ସି କୁଇନ୍ ନାମରେ ପରିଚିତ ୩୨ ବର୍ଷୀୟା ପୁନମ୍ ପାଣ୍ଡେଙ୍କ ‘ଫେକ୍ ଡେଥ୍ ପବ୍ଲିସିଟି ଷ୍ଟଣ୍ଟ’ ପରେ ପ୍ରଶଂସକଙ୍କ ଠାରୁ ଆରମ୍ଭ କରି ବଡ଼ ବଡ଼ ସେଲିବ୍ରିଟି ପର୍ଯ୍ୟନ୍ତ ସମସ୍ତେ ଅଭିନେତ୍ରୀଙ୍କୁ ଟାର୍ଗେଟ୍ କରୁଥିବାର ନଜର ଆସିଛନ୍ତି। ସର୍ଭିକାଲ କ୍ୟାନ୍ସର ବିଷୟରେ ସଚେତନତା ସୃଷ୍ଟି କରିବା ନାମରେ ତାଙ୍କ ମିଥ୍ୟା ମୃତ୍ୟୁ ଖବର ପ୍ରସାରଣ କାର୍ଯ୍ୟକୁ ଲୋକମାନେ ଏକ ଶସ୍ତା ପ୍ରଚାର ପ୍ରସାର ଏବଂ ଏକ ଅଶ୍ଳୀଳ ହାସ୍ୟାସ୍ପଦ ବୋଲି କହୁଛନ୍ତି। ଏହି ସମୟରେ ପୁନମଙ୍କ ସ୍ବାମୀ ସାମ ବମ୍ବେ ଅଭିନେତ୍ରୀଙ୍କୁ ସମର୍ଥନ କରିଛନ୍ତି।
ଏହି ଖବର ଶୁଣି ସେ ଆଶ୍ଚର୍ଯ୍ୟ ହୋଇଗଲେ କି ନାହିଁ ପ୍ରଶ୍ନ ଉପରେ ସାମ ବମ୍ବେ କହିଛନ୍ତି, ନା, ମୁଁ ଖୁସି ଯେ ସେ ଜୀବିତ ଅଛନ୍ତି। ତାଙ୍କର ଅନେକ ଅବଦାନ ଅଛି। ଯଦି କେହି ତାଙ୍କ ଖ୍ୟାତି କିମ୍ବା ପ୍ରତିଛବି ପ୍ରତି ଧ୍ୟାନ ନ ଦେଇ ଏକ ସମସ୍ୟା ବିଷୟରେ ସଚେତନତା ବିସ୍ତାର କରନ୍ତି, ତେବେ ଆସନ୍ତୁ ତାଙ୍କୁ ସମ୍ମାନ ଦେବା। ସେ ହେଉଛନ୍ତି ସାହସୀ ଭାରତୀୟ ମହିଳା।
ସାମ ବମ୍ବେ ଆହୁରି ମଧ୍ୟ କହିଛନ୍ତି ସେ ଏବଂ ପୁନମ ନିଶ୍ଚିତ ଭାବେ ଅଲଗା ହୋଇଯାଇଛନ୍ତି କିନ୍ତୁ ଏପର୍ଯ୍ୟନ୍ତ ସେମାନେ ଛାଡପତ୍ର ହୋଇନାହିଁ।
କଣ୍ଟ୍ରୋଭର୍ସି କୁଇନ୍ ପୁନମ୍ ସର୍ଭିକାଲ କ୍ୟାନ୍ସରରେ ପୀଡ଼ିତ ହୋଇ ପ୍ରାଣ ହରାଇଥିବା ଖବର ତାଙ୍କ ଇନ୍ଷ୍ଟାଗ୍ରାମ ଆକାଉଣ୍ଟରେ ଆସିବା ପରେ ଶୁକ୍ରବାର ଜାତୀୟ ଗଣମାଧ୍ୟମରେ ପ୍ରକାଶ ପାଇଥିଲା। ସାମାଜିକ ଗଣମାଧ୍ୟମରେ ୟୁଜର୍ସ ଓ ଫ୍ୟାନ୍ମାନେ ତାଙ୍କୁ ଶ୍ରଦ୍ଧାଞ୍ଜଳି ଦେବାରେ ଲାଗିଥିବାବେଳେ ସେ ମୁହଁ ଦେଖାଇଥିଲେ। ସେ କହିଥିଲେ, ସର୍ଭିକାଲ କ୍ୟାନ୍ସର ସମ୍ପର୍କରେ ବ୍ୟାପକ ସଚେତନତା ସୃଷ୍ଟି ଉଦ୍ଦେଶ୍ୟରେ ସେ ଓ ତାଙ୍କ ଟିମ୍ ମୃତ୍ୟୁ ଖବର ପ୍ରସାର କରିଥିଲେ। ଏହି ରୋଗ ଏତେ ଭୟାବହ ଯେ ଏଥିରେ ଆକ୍ରାନ୍ତ ଅନେକ ହଜାର ମହିଳା ପ୍ରାଣ ହରାଉଛନ୍ତି। କିନ୍ତୁ ଏଥିରୁ ଆରୋଗ୍ୟ ହେବା ସମ୍ଭବ। ଏନେଇ ସଚେତନତା ସୃଷ୍ଟି ଜରୁରୀ ହୋଇପଡ଼ିଛି। ରୋଗ ସମ୍ପର୍କରେ ଲୋକଙ୍କୁ ଜଣାଇବା ପାଇଁ ସେ ଏପରି କରିଥିଲେ। ତାଙ୍କର ଏହି କାଣ୍ଡକୁ ସେଲିବ୍ରିଟି, ସୋସିଆଲ ମିଡିଆ ୟୁଜର୍ସ ‘ସବୁଠୁ ନିକୃଷ୍ଟ ପବ୍ଲିସିଟି ଷ୍ଟଣ୍ଟ’ ରୂପେ ଅଭିହିତ କରିଛନ୍ତି।