ବ୍ୟାଙ୍କକ୍: ଥାଇଲାଣ୍ଡରେ ଆରମ୍ଭ ହୋଇଯାଇଛି ଫୁକେଟ ଭେଜିଟେରିଆନ୍ ଫେଷ୍ଟିଭାଲ। ଚାଇନା କ୍ୟାଲେଣ୍ଡର ଅନୁସାରେ ପ୍ରତିବର୍ଷ ୯ମ ଲୁନାର ମାସରେ ଅର୍ଥାତ୍ ପ୍ରତିବର୍ଷ ସେପ୍ଟେମ୍ବର ଓ ଅକ୍ଟୋବର ମାସରେ ଏହି ପର୍ବ ପାଳନ କରାଯାଏ। ବେଶ୍ ଧୁମ୍ଧାମରେ ଥାଇଲାଣ୍ଡବାସୀ ଏହି ପର୍ବକୁ ପାଳନ କରନ୍ତି। ଆମିଷ ଭକ୍ଷଣ ସାଙ୍ଗକୁ ଜୀବନରେ କରିଥିବା ସମସ୍ତ ପାପର ପ୍ରାୟଶ୍ଚିତ୍ତ କରିବା ପାଇଁ ଲୋକେ ଏହି ପର୍ବ ପାଳନ କରିଥାନ୍ତି। ଚାଇନାର ଏକ ଅପେରା ଗ୍ରୁପ୍ ମ୍ୟାଲେରିଆରେ ପୀଡ଼ିତ ହେବା ପରେ ଏହାର ପ୍ରତିକାର ପାଇଁ ଗ୍ରୁପର ଜଣେ ସଦସ୍ୟ ଚାଇନା ଯାଇ ନାଇନ୍ ଏମ୍ପୋରିୟର୍ ଗଡ୍ଙ୍କୁ ନିମନ୍ତ୍ରଣ କରି ଫୁକେଟ ଆଣିଥିଲେ। ତା’ ପରଠାରୁ ଅପେରା ଗ୍ରୁପ୍ ଏହି ପର୍ବ ପାଳନ କରିବା ଆରମ୍ଭ କରିଥିଲେ। ଏହି ପର୍ବ ଦେଖିବା ପାଇଁ ଦେଶ ବିଦେଶରୁ ବହୁ ପର୍ଯ୍ୟଟକ ଥାଇଲାଣ୍ଡ ଆସିଥାନ୍ତି। ଏଥିରେ ଅଂଶଗ୍ରହଣ କରୁଥିବା ଲୋକେ ଧରୁଆ ଛୁରି, ଖଣ୍ଡାରେ ନିଜ ଗାଲରେ ଛିଦ୍ର କରିଥାନ୍ତି। କେହି କେହି ଏକାଧିକ ଅସ୍ତ୍ରକୁ ଜିଭ ଏବଂ ଓଠରେ ମଧ୍ୟ ଖଞ୍ଜନ୍ତି। ଏପରି କରିବା ଦ୍ୱାରା ଠାକୁର ତାଙ୍କୁ ବିପଦରୁ ରକ୍ଷା କରିବେ ବୋଲି ତାଙ୍କର ବିଶ୍ୱାସ ରହିଛି। ପାଖାପାଖି ୬ଟି ମନ୍ଦିରରେ ଏହି ପର୍ବ ପାଳନ କରାଯାଏ। ଚଳିତ ବର୍ଷ ସେପ୍ଟେମ୍ବର ୨୫ରୁ ଆରମ୍ଭ ହୋଇଥିବା ଏହି ପର୍ବ ଅକ୍ଟୋବର ୪ ତାରିଖ ପର୍ଯ୍ୟନ୍ତ ଚାଲିବ।