ମୁକ୍ତସର,୧୮।୯: ନରେନ୍ଦ୍ର ମୋଦି ସରକାର ପକ୍ଷରୁ ଆଗତ କରାଯାଇଥିବା କୃଷି ବିଲ ବିରୋଧରେ ଚାଷୀଙ୍କ ରାଗ ବଢିବାରେ ଲାଗିଛି। ହରିୟାଣା ଏବଂ ପଞ୍ଜାବର କୃଷକମାନେ ରାଜରାସ୍ତାକୁ ଓହ୍ଲାଇ କୃଷି ସହ ଜଡିତ ୩ଟି ବିଲ ପ୍ରତ୍ୟାହାର କରିବାକୁ ଦାବି କରିଛନ୍ତି। ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ପ୍ରକାଶ ସିଂ ବାଦଲଙ୍କ ଘର ବାହାରେ କୃଷକମାନେ ବିକ୍ଷୋଭ ପ୍ରଦର୍ଶନ କରିଥିଲେ। ଏହି ସମୟରେ ବିଲ୍କୁ ବିରୋଧ କରୁଥିବା ଜଣେ କୃଷକ ବିଷ ପିଇଥିଲେ। ପ୍ରକାଶ ସିଂ ବାଦଲଙ୍କ ଘର ବାହାରେ ଧାରଣାରେ ଉପରେ ବସିଥିବା ପ୍ରୀତମ ସିଂ ନାମକ ଜଣେ କୃଷକ ଶୁକ୍ରବାର ସକାଳ ୬.୩୦ରେ ବିଷ ପିଇଥିଲେ। ସେ ମାନସାର ଅକାଳୀ ଗାଁର ବାସିନ୍ଦା। ପ୍ରୀତମ ସିଂଙ୍କୁ ପ୍ରଥମେ ବାଦଲ ଗାଁର ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଏହା ପରେ ତାଙ୍କୁ ବାଥିନ୍ଦାର ମ୍ୟାକ୍ସ ହସ୍ପିଟାଲକୁ ନିଆଯାଇଛି। ତାଙ୍କ ଅବସ୍ଥା ଏବେ ଗୁରୁତର ଥିବା ଜଣାପଡିଛି।
