ଚଣ୍ଡିଗଡ଼,୧ ।୧୧: ପଞ୍ଜାବ ବିଧାନସଭା ନିର୍ବାଚନକୁ ଆଖି ଆଗରେ ରଖି ଚନି ସରକାର ସୋମବାର ଏକ ବଡ ଘୋଷଣା କରିଛନ୍ତି । କ୍ୟାବିନେଟ ବୈଠକ ପରେ ମୁଖ୍ୟମନ୍ତ୍ରୀ ଚରଣଜିତ ସିଂ ଚନି ପଞ୍ଜାବବାସୀଙ୍କ ପାଇଁ ବିଜୁଳି ପ୍ରତି ୟୁନିଟ ପିଛା ଦର ୩ ଟଙ୍କା କମ୍ କରିବାକୁ ଘୋଷଣା କରିଛନ୍ତି । ଏହା ସୋମବାର ଅର୍ଥାତ୍ ୧ ନଭମ୍ବରରୁ କାର୍ଯ୍ୟକାରୀ କରାଯିବ । ତେବେ ପଞ୍ଜାବରେ ସରକାର ଗଢିଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଘୋଷଣା କରିଥିଲେ କି ସେ ସରକାର ଗଠନ କଲେ ରାଜ୍ୟବାସୀଙ୍କୁ ମାଗଣାରେ ବିଜୁଳି ଯୋଗାଇ ଦିଆଯିବ । ଏହାକୁ ଚ୍ୟାଲେଞ୍ଜ କରି ଏବେ ପଞ୍ଜାବ ସରକାର କହିଛି କେଜରିୱାଲଙ୍କ ଘୋଷଣାର ସର୍ବେକ୍ଷଣ ପରେ ଜଣାପଡିଛି କି ଆମ ଆଦମୀ ପାର୍ଟି ମାଗଣା ନୁହେଁ ବରଂ କମ୍ ପଇସାରେ ବିଜୁଳି ଯୋଗାଇ ଦେବ । ମୁଖ୍ୟମନ୍ତ୍ରୀ ଚନି କହିଛନ୍ତି ରାଜ୍ୟରେ ୭୨ ଲକ୍ଷ ବିଜୁଳି ଉପଭୋକ୍ତା ଥିବା ବେଳେ ସେମାନଙ୍କ ମଧ୍ୟରୁ ୯୫ ପ୍ରତିଶତ ଏହାଦ୍ୱାରା ଲାଭାନ୍ୱିତ ହେବେ । ସେ ଆହୁରି ମଧ୍ୟ ଦାବି କରିଛନ୍ତି କି ଏହା ଦେଶର ସବୁଠାରୁ ଶସ୍ତା ବିଜୁଳି ଦର । ସୋମବାର କ୍ୟାବିନେଟ ମିଟିଂ ପରେ ଚନି ନିର୍ବାଚନୀ ମୁଡରେ ନଜର ଆସିଥଲେ । ଏହାପରେ ଚନି ରାଜ୍ୟ ସରକାରୀ କର୍ମଚାରୀଙ୍କ ମହଙ୍ଗା ଭତ୍ତା ୧୧ ପ୍ରତିଶତ ବୃଦ୍ଧି ଘୋଷଣା କରିଥିଲେ ।
