ଚଣ୍ଡିଗଡ଼,୨୦ ।୯: ପଞ୍ଜାବ ମୁଖ୍ୟମନ୍ତ୍ରୀ ଭାବେ ଶପଥ ନେବା ପରେ ଚରଣଜିତ୍ ସିଂ ଚନ୍ନି ଏବେ ଆକ୍ସନ ମୁଡରେ ଅଛନ୍ତି । ସେ ତାଙ୍କର ପ୍ରଥମ ଖବରଦାତା ସମ୍ମିଳନୀରେ କିଛି ବଡ ଘୋଷଣା କରିଛନ୍ତି । କୃଷକଙ୍କ ପାଣି ଓ ବିଜୁଳି ବିଲ୍ ଛାଡ କରିବାକୁ କହିଛନ୍ତି ଚନ୍ନି । ଏହାସହ ବାଲି ମାଫିଆଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଆଶ୍ୱସନା ଦେଇଛନ୍ତି । ଏହାସହ ସେ କେନ୍ଦ୍ର ସରକାରଙ୍କୁ ୩ଟି ଯାକ ନୂଆ କୃଷି ବିଲକୁ ଫେରାଇ ନେବାକୁ ଅନୁରୋଧ କରିଛନ୍ତି । ମୁଖ୍ୟମନ୍ତ୍ରୀ ଚନ୍ନି କଂଗ୍ରେସ ହାଇକମାଣ୍ଡଙ୍କୁ ଧନ୍ୟବାଦ ଦେବା ସହ କ୍ୟାପଟେନ ଅମରିନ୍ଦର ସିଂଙ୍କ ପ୍ରଶଂସା ମଧ୍ୟ କରିଥିଲେ । ଶପଥ ଗ୍ରହଣ କରିବା ପରେ ପରେ ପ୍ରଥମେ ସେ କଂଗ୍ରେସ ହାଇକମାଣ୍ଡଙ୍କୁ ଧନ୍ୟବାଦ ଦେଇଥିଲେ । ସେ କହିଥିଲେ କଂଗ୍ରେସ ଜଣେ ସାଧାରଣ ଲୋକଙ୍କୁ ପଞ୍ଜାବର ମୁଖ୍ୟମନ୍ତ୍ରୀ ଆସନ ଦେଇଛି ଯେଉଁଠାରେ ଆମେ ଜନ୍ମ ହୋଇଥିଲୁ ସେଠାରେ ଛାତ ନ ଥିଲା, କଂଗ୍ରେସ ଦଳ ଜଣେ ଗରିବଙ୍କୁ ସୁଯୋଗ ଦେଇଛି ହେଲେ ମୋର ଏତେବଡ ସାହସ ନ ଥିଲା । ସେ ଆହୁରି ମଧ୍ୟ କହିଛନ୍ତି ଏହି ସରକାର କୃଷକଙ୍କ ସରକାର । କୃଷକଙ୍କର କିଛି ଅସୁବିଧା ହେଲେ ମୁଁ ମୋ ଗଳା କାଟିଦେବି ବୋଲି ଚନ୍ନି କହିଛନ୍ତି ।
