ଚଣ୍ଡିଗଡ଼,୨ ।୯: ଦେଶରେ ବେଳକୁ ବେଳ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ତୃତୀୟ ଲହରର ସୂଚନା ଦେଉଛି । ଏହାକୁ ନେଇ ବିଭିନ୍ନ ରାଜ୍ୟ ସରକାର ଏବେଠାରୁ ସତର୍କତା ଆରମ୍ଭ କଲେଣି । ଏହାକୁ ଦୃଷ୍ଟିରେ ରଖି ପଞ୍ଜାବ ସରକାର କରୋନାର ନୂଆ ଗାଇଡଲାଇନ୍ ଜାରି କରିଛନ୍ତି । ଏହା ୧୫ସେପ୍ଟେ୍ମ୍ୱର ପର୍ଯ୍ୟନ୍ତ ଲାଗୁ କରାଯିବ । ଏବେ ରାଜ୍ୟକୁ ସଡ଼କ ପଥ ଅବା ଆକାଶ ପଥରେ ଆସୁଥିବା ଯାତ୍ରୀମାନେ ଆର୍ଟିପିସିଆର୍ ନେଗେଟିଭ ରିପୋର୍ଟ ସାଙ୍ଗରେ ଧରିବା ବାଧ୍ୟତାମୂଳକ କରାଯାଇଛି । ୭୨ ଘଣ୍ଟା ମଧ୍ୟରେ ଏହି ଟେଷ୍ଟ କରାଯାଇଥିବ ନଚେତ୍ କରୋନା ଭ୍ୟାକ୍ସିନର ଦୁଇଟି ଯାକ ଡୋଜ ନେଇଥିବାର ସାର୍ଟିଫିକେଟ ସାଙ୍ଗରେ ଥିବା ଜରୁରୀ । ଏହି ଗାଇଡଲାଇନ ଜାରି କରି ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ କହିଛନ୍ତି ବିନା କରୋନା ନେଗେଟିଭ ରିପୋର୍ଟରେ ରାଜ୍ୟକୁ ପ୍ରବେଶ ନିଷେଧ । ଏହାସହ ପଞ୍ଜାବରେ ଗହଳି ଉପରେ ମଧ୍ୟ ଅଙ୍କୁଶ ଲଗାଯାଇଛି । ଇନଡୋରରେ ୧୫୦ ଓ ଆଉଟଡୋରରେ ୩୦୦ରୁ ଅଧିକ ଲୋକ ଏକାଠି ହୋଇ ପାରିବେ ନାହିଁ । ଜିମ୍, ସିନେମା, ରେସ୍ତୋରାଁ ୫୦ପ୍ରତିଶତ କର୍ମଚାରୀରେ ଓ ଗ୍ରାହକଙ୍କୁ ନେଇ ଖୋଲାଯାଇ ପାରିବ । ଦେଶରେ ବଢୁଥିବା କରୋନା ସଂକ୍ରମଣ ପାଇଁ ଏବେ କେରଳକୁ ସମସ୍ତେ ଦାୟୀ କରୁଛନ୍ତି । କାରଣ କେରଳରେ ଏହି ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । କେରଳରେ ଗୋଟିଏ ଦିନରେ ୩୦ ହଜାରରୁ ଊର୍ଦ୍ଧ୍ୱ ସଂକ୍ରମିତଙ୍କୁ ଚିହ୍ନଟ କରାଯାଇଥିବା ବେଳେ ଏବେ ଦେଶରେ ଗତ ୨୪ ଘଣ୍ଟାରେ ୪୭ ହଜାରରୁ ଊର୍ଦ୍ଧ୍ୱ ନୂଆ ସଂକ୍ରମିତ ଚିନ୍ତାର କାରଣ ପାଲଟିଛନ୍ତି । ଏହାସହ ୫ଶହରୁ ଅଧିକଙ୍କର ମୃତ୍ୟୁ ବି ହୋଇଛି ।