ନୂଆଦିଲ୍ଲୀ,୨୦।୧୦: ପଞ୍ଜାବରେ ଭଗବନ୍ତ ମାନ ସରକାର ଏବଂ ରାଜ୍ୟପାଳ ବନୱାରୀଲାଲଙ୍କ ବିବାଦ ପାଇଁ ବିଶେଷ ବିଧାନସଭା ଅଧିବେଶନ ସ୍ଥଗିତ ହୋଇଯାଇଛି। ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ଅନୁରୋଧ ପରେ ଅଧିବେଶନକୁ ସ୍ଥଗିତ ରଖାଯାଇଛି। ଏହା ସହିତ ୩୦ ଅକ୍ଟୋବରକୁ ରାଜ୍ୟପାଳଙ୍କ ବିପକ୍ଷରେ ପଞ୍ଜାବ ସରକାର ସୁପ୍ରିମକୋର୍ଟ ଦ୍ୱାରସ୍ତ ହେବେ ବୋଲି କହିଛନ୍ତି ମାନ।
ରାଜ୍ୟପାଳ ଏହି ସ୍ୱତନ୍ତ୍ର ଅଧିବେଶନକୁ ଆଇନ ବିରୋଧୀ ବୋଲି କହିବା ପରେ ମୁଖ୍ୟମନ୍ତ୍ରୀ ମାନ ଅଧିବେଶନକୁ ସ୍ଥଗିତ ରଖିବାକୁ କହିଥିଲେ। ଏଭଳି ସ୍ଥିତିରେ ପଞ୍ଜାବରେ ପୁଣିଥରେ ରାଜ୍ୟପାଳ ବନାମ ସରକାର ମୁହାଁମୁହିଁ ହୋଇଛନ୍ତି।
ବିଧାନସଭାରେ ମୁଖ୍ୟମନ୍ତ୍ରୀ ମାନ କହିଛନ୍ତି ଯେ, ”ଆମେ ପଞ୍ଜାବର ଲୋକମାନଙ୍କ ପାଇଁ ବିଧେୟକ ଆଣିବାକୁ ଚାହୁଁଥିଲୁ, କିନ୍ତୁ ରାଜ୍ୟପାଳ ବିଲ ପାସ୍ କରିବାକୁ ମନା କରିଦେଲେ ଏବଂ ଏହି ଅଧିବେଶନକୁ ଆଇନ ବିରୋଧୀ ବୋଲି କହିଲେ, ଏଥିପାଇଁ ଆମେ ଏହି ଅଧିବେଶନକୁ ଅନିଶ୍ଚିତକାଳ ପାଇଁ କରି ୩୦ ଅକ୍ଟୋବରକୁ ସୁପ୍ରିମକୋର୍ଟଙ୍କ ଦ୍ୱାରସ୍ତ ହେବୁ।”
ପଞ୍ଜାବ ସରକାର ଦୁଇ ଦିନିଆ ସ୍ୱତନ୍ତ୍ର ଅଧିବେଶନ ଡାକିଥିଲେ। କିନ୍ତୁ ଏହାକୁ ରାଜ୍ୟପାଳ ବନୱାରୀଲାଲ ଆଇନ ବିରୋଧୀ କହିବା ସହିତ ଏହା ମଧ୍ୟ କହିଥିଲେ, ଯଦି ସରକାର ଅଧିବେଶନ ଆରମ୍ଭ କରନ୍ତି ସେ ରାଷ୍ଟ୍ରପତିଙ୍କ ଦ୍ୱାରସ୍ତ ହେବେ।