ଆବୁଧାବି,୧୦।୧୦(ପି.ଟି.): ଚଳିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ତୃତୀୟ ଡବଲ ହେଡରରେ ଶନିବାର କିଙ୍ଗ୍ସ ଏକାଦଶ ପଞ୍ଜାବ ଓ କୋଲକାତା ନାଇଟ୍ ରାଇଡର୍ସ ପ୍ରଥମ ମ୍ୟାଚ୍ରେ ପରସ୍ପରକୁ ଭେଟିବେ। ପଞ୍ଜାବ ଏହି ମ୍ୟାଚ୍ରେ ଟ୍ରାକ୍କୁ ଫେରିବ ଲକ୍ଷ୍ୟରେ ରହିଛି। ଗତ ମ୍ୟାଚ୍ରେ ପଞ୍ଜାବ ସନ୍ରାଇଜର୍ସ ହାଇଦ୍ରାବାଦ୍ଠାରୁ ୬୯ ରନରେ ପରାସ୍ତ ହୋଇଥିଲା। ସଂଘର୍ଷ କରୁଥିବା ବେଳେ ପଞ୍ଜାବ ଅଲ- ରାଉଣ୍ଡ କୋଲକାତାକୁ କିଭଳି ସାମ୍ନା କରୁଛି ତାହା ଦେଖିବାକୁ ବାକି ରହିଲା। ପଞ୍ଜାବ ଏପର୍ଯ୍ୟନ୍ତ ୬ଟି ମ୍ୟାଚ୍ ଖେଳି ଗୋଟିଏ ବିଜୟ ଓ ୫ଟି ପରାଜୟ ସହ ମାତ୍ର ୨ ପଏଣ୍ଟ ପାଇ ତାଲିକାର ନିମ୍ନତମ ସ୍ଥାନରେ ରହିଛି। ଅନ୍ୟପଟେ କୋଲକାତା ୫ଟି ମ୍ୟାଚ୍ ଖେଳି ୩ ବିଜୟ ଓ ୨ ପରାଜୟ ସହ ୬ ପଏଣ୍ଟ ପାଇ ତାଲିକାର ଚତୁର୍ଥ ସ୍ଥାନରେ ରହିଛି।
କୋଲକାତା ତା’ର ପ୍ରଦର୍ଶନ ଉନ୍ନତି ଆଣି ତୃତୀୟଥର ପାଇଁ ଟାଇଟଲ ଦୌଡ଼ରେ ରହିଛି। ଯୁବ ଓପନର ଶୁବମନ ଗିଲ୍ ପ୍ରଭାବୀ ପ୍ରଦର୍ଶନ କରିଛନ୍ତି। ରାହୁଲ ତ୍ରିପାଠୀ ଦମ୍ଦାର ପ୍ରଦର୍ଶନ କରି ଦଳ ପାଇଁ ଟପ୍ ଅର୍ଡରରେ ବିକଳ୍ପ ସୃଷ୍ଟି କରିଛନ୍ତି। ସୁନୀଲ ନାରିନ ମଧ୍ୟ ପୁରୁଣା ଫର୍ମ ଫେରିପାଇବାକୁ ପ୍ରୟାସ କରୁଛନ୍ତି ଓ ବୋଲିଂ, ବ୍ୟାଟିଂରେ ଭଲ ପ୍ରଦର୍ଶନ କରିବା ଆରମ୍ଭ କରିଛନ୍ତି। ମିଡିଲ ଅର୍ଡରରେ ଇଅନ ମୋର୍ଗାନଙ୍କ ଉପସ୍ଥିତି ଦଳକୁ ଆହୁରି ଦୃଢ କରିଛି। ଏହାପରେ ଆନ୍ଦ୍ରେ ରସେଲଙ୍କ ପରି ବିସ୍ଫୋରକ ବ୍ୟାଟ୍ସମ୍ୟାନ ରହିଛନ୍ତି। ଯଦିଓ ସେ ଏପର୍ଯ୍ୟନ୍ତ ଦକ୍ଷତା ଅନୁରୂପ ଚମକ ଦେଖାଇପାରି ନାହାନ୍ତି। ତେବେ ଅଧିନାୟକ ଦୀନେଶ କାର୍ତ୍ତିକ ଆଦୌ ଫର୍ମରେ ନାହାନ୍ତି। ଫଳରେ ଟିମ୍ ମ୍ୟାନେଜମେଣ୍ଟ ତାଙ୍କୁ ନେଇ ଚିନ୍ତିତ ରହିଛି। ବ୍ୟାଟିଂରେ ସେ ଏପର୍ଯ୍ୟନ୍ତ ଆଶାନୁରୂପ ପ୍ରଦର୍ଶନ କରିପାରି ନାହାନ୍ତି। ତେବେ ଚେନ୍ନାଇ ବିପକ୍ଷ ମ୍ୟାଚ୍ରେ ସେ ତାଙ୍କର ନେତୃତ୍ୱ ପ୍ରଶଂସନୀୟ ଥିଲା। ଚେଜ କରୁଥିବା ଚେନ୍ନାଇ ବିପକ୍ଷରେ ସେ ବୋଲିଂ ଅଦଳବଦଳରେ କମାଲ କରିଥିଲେ। ବୋଲିଂରେ ଦୁଇ ଯୁବ ଦ୍ରୁତ ବୋଲର କମଳେଶ ନାଗରକୋଟି ଓ ଶିବମ ମାଭି, ପ୍ୟାଟ୍ କୁମିନ୍ସ ଭଲ ପ୍ରଦର୍ଶନ କରିଛନ୍ତି। ସ୍ପିନ୍ ଡିପାର୍ଟମେଣ୍ଟରେ ନାରିନ, ବରୁଣ ଚକ୍ରବର୍ତ୍ତୀ ମଧ୍ୟ ଭଲ ପ୍ରଦର୍ଶନ କରିଛନ୍ତି।
ଅପରପକ୍ଷରେ ପଞ୍ଜାବ ଓପନିଂ ଯୋଡି ଅଧିନାୟକ ଲୋକେଶ ରାହୁଲ ଓ ମୟଙ୍କ ଅଗ୍ରଓ୍ବାଲଙ୍କୁ ନିର୍ଭରଶୀଳ ହୋଇପଡିଛି। ଦୀର୍ଘ ଦିନ ପରେ କ୍ରିସ୍ ଗେଲ ଦଳ ପାଇଁ ପ୍ରଥମ ଆଇପିଏଲ୍ ମ୍ୟାଚ୍ ଖେଳିବେ ଓ ଏହା ପଞ୍ଜାବ ପାଇଁ ବରଦାନ ସାବ୍ୟସ୍ତ ହେବ। ଗ୍ଲେନ୍ ମ୍ୟାକ୍ସଓ୍ବେଲଙ୍କ ବଦଳରେ ଗେଲ ଖେଳିବାର ଯଥେଷ୍ଟ ସମ୍ଭାବନା ରହିଛି। ନିକୋଲାସ ପୁରନ ପୁଣି ଥରେ ତାଙ୍କ ବିସ୍ଫୋରକ ବ୍ୟାଟିଂ ପ୍ରଦର୍ଶନ କରିବେ। ପଞ୍ଜାବ ପାଇଁ ଡେଥ୍ ବୋଲିଂ ନେଇ ସମସ୍ୟା ରହିଛି। କୋଲକାତା ବିପକ୍ଷରେ ଡେଥ୍ ବୋଲିଂରେ ଉନ୍ନତି ଆଣିବା ଲକ୍ଷ୍ୟରେ ରହିଛି ପଞ୍ଜାବ।
