ଧର୍ମଶାଳା, ୨୦।୫: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଶୁକ୍ରବାର ଅନୁଷ୍ଠିତ ମ୍ୟାଚରେ ରାଜସ୍ଥାନ ରୟାଲ୍ସ ୪ ଉଇକେଟରେ ପଞ୍ଜାବ କିଙ୍ଗ୍ସକୁ ପରାସ୍ତ କରିଛି। ଫଳରେ ପଞ୍ଜାବ ଲିଗ୍ ପର୍ଯ୍ୟାୟରୁ ବିଦାୟ ନେଇଥିବାବେଳେ ରାଜସ୍ଥାନ ପ୍ଲେ-ଅଫ୍ ଆଶା ପାଇଁ ଅନ୍ୟ ଦଳ ଗୁଡ଼ିକର ଫଳାଫଳ ଅପେକ୍ଷାରେ ରହିଛି। ୧୪ ମ୍ୟାଚରୁ ୧୪ ପଏଣ୍ଟ ପାଇଛି ରାଜସ୍ଥାନ। ଅନ୍ୟପକ୍ଷରେ ପଞ୍ଜାବ ୧୪ ମ୍ୟାଚରୁ ମାତ୍ର ୧୨ ପଏଣ୍ଟ ସହିତ ବିଦାୟ ପଥ ଦେଖିଛି। ଉଭୟ ଦଳପାଇଁ ଲିଗ୍ ପର୍ଯ୍ୟାୟରେ ଏହାଥିଲା ଶେଷ ମ୍ୟାଚ। ପଞ୍ଜାବ ୨୦ ଓଭରରେ ୫ ଉଇକେଟ ହରାଇ ୧୮୭ ରନ କରିଥିବାବେଳେ ରାଜସ୍ଥାନ ୧୯.୪ ଓଭରରେ ୬ ଉଇକେଟ ହରାଇ ୧୮୯ ରନ ସଂଗ୍ରହ କରି ନେଇଥିଲା।
ଟସ୍ହାରି ବ୍ୟାଟିଂ ଆମନ୍ତ୍ରଣ ପାଇଥିବା ପଞ୍ଜାବର ଆରମ୍ଭ ଭଲ ହୋଇ ନ ଥିଲା। ମାତ୍ର ୨ ରନରେ ପ୍ରଥମ ଏବଂ ୫୦ ରନ ମଧ୍ୟରେ ୪ ଉଇକେଟ ହରାଇ ଦଳ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ପ୍ରଭସିମରନ ସିଂ ୨, ଅଧିନାୟକ ଶିଖର ଧାଓ୍ବନ ୧୭, ଅଥର୍ବ ତାଇଦେ ୧୯ ଓ ଲିଆମ ଲିଭିଂଷ୍ଟୋନ ୯ ରନକରି ଆଉଟ ହୋଇଥିଲେ। ତେବେ ଲୋୟର ଅର୍ଡରରେ ୩ ଖେଳାଳି ଦ୍ରୁତ ହାରରେ ରନ ସଂଗ୍ରହ କରି ଦଳକୁ ସମ୍ମାନଜନକ ସ୍କୋରରେ ପହଞ୍ଚାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ସାମ୍ କୁରାନ ୩୧ ବଲ୍ରୁ ସର୍ବାଧିକ ୪୯ (୪ ଚୌକା, ୨ ଛକା) ଓ ଶାହରୁଖ ଖାଁ ୨୩ ବଲ୍ରୁ ୪୧ (୪ ଚୌକା, ୨ ଛକା) ରନକରି ଅପରାଜିତ ରହିଥିଲେ। ଜୀତେଶ ଶର୍ମା ୨୮ ବଲ୍ରୁ ୪୪ (୩ ଚୌକା, ୩ ଛକା) ରନକରି ଆଉଟ ହୋଇଥିଲେ। ଅସମାପ୍ତ ୬ଷ୍ଠ ଉଇକେଟରେ କୁରାନ ଓ ଶାହରୁଖ ମାତ୍ର ୩୭ ବଲ୍ରୁ ୭୩ ରନ ସଂଗ୍ରହ କରିଥିଲେ। ପୂର୍ବରୁ କୁରାନ ଓ ଜୀତେଶ ୫ମ ଉଇକେଟରେ ୪୪ ବଲ୍ରୁ ୬୪ ରନ ସଂଗ୍ରହ କରି ଇନିଂସ ସମ୍ଭାଳିଥିଲେ। ଶେଷ ୨ ଓଭରରୁ ପଞ୍ଜାବ ୪୬ ରନ ସଂଗ୍ରହ କରିଥିଲା। ରାଜସ୍ଥାନ ପକ୍ଷରୁ ନବଦୀନ ସଇନୀ ସର୍ବାଧିକ ୩ଟି ଏବଂ ଟ୍ରେଣ୍ଟ ବୋଲ୍ଟ ଓ ଆଡାମ ଜାମ୍ପା ଗୋଟିଏ ଲେଖାଏ ଉଇକେଟ ନେଇଥିଲେ। ସନ୍ଦୀପ ଶର୍ମା ଓ ୟୁଜବେନ୍ଦ୍ର ଚହଲ ମହଙ୍ଗା ସାବ୍ୟସ୍ତ ହୋଇଥିଲେ।
୧୮୮ ରନର ବିଜୟ ଲକ୍ଷ୍ୟ ପିଛା କରିଥିବା ରାଜସ୍ଥାନ ମାତ୍ର ୧୨ ରନରେ ଜୋଶ୍ ବଟଲର(୦)ଙ୍କ ଉଇକେଟ ହରାଇ ପ୍ରଥମ ଝଟ୍କା ଖାଇଥିଲା। ତେବେ ଯଶଶ୍ୱୀ ଜୟସ୍ବାଲ ଓ ଦେବଦତ୍ତ ପଡିକାଲ ଦ୍ୱିତୀୟ ଉଇକେଟରେ ୪୯ ବଲ୍ରୁ ୭୩ ରନ ସଂଗ୍ରହ କରି ଇନିଂସ ସମ୍ଭାଳି ନେଇଥିଲେ। ଅର୍ଦ୍ଧଶତକ ହାସଲ କରିବାପରେ ପଡିକାଲ ୫୧ ରନକରି ଆଉଟ ହେବାରୁ ଯୋଡ଼ି ଭାଙ୍ଗିଥିଲା। ସେ ୩୦ଟି ବଲ୍ର ସମ୍ମୁଖୀନ ହୋଇଥିବାବେଳେ ନିଜ ଇନିଂସରେ ୫ ଚୌକା, ୩ ଛକା ମାରିଥିଲେ। ୫ ରନ ବ୍ୟବଧାନରେ ଅଧିନାୟକ ସଞ୍ଜୁ ସାମସନ (୨)ଙ୍କ ଉଇକେଟ ହରାଇ ରାଜସ୍ଥାନ ପୁଣି ସଙ୍କଟରେ ପଡ଼ିଥିଲା। ତେବେ ଜୟସ୍ବାଲ ଓ ଶିମରନ ହେଟମେର ୪ର୍ଥ ଉଇକେଟରେ ମାତ୍ର ୨୨ ବଲ୍ରୁ ୪୭ ରନ ସଂଗ୍ରହ କରି ଦଳକୁ ସଂକଟରୁ ଉଦ୍ଧାର କରିଥିଲେ। ଜୟସ୍ବାଲ ଠିକ୍ ୫୦ (୩୬ ବଲ, ୮ ଚୌକା) ରନ କରି ଆଉଟ ହୋଇଥିବାବେଳେ ହେଟମେର ୨୮ ବଲ୍ରୁ ଦ୍ରୁତ ୪୬ (୪ ଚୌକା, ୩ ଛକା) ରନକରି ପ୍ୟାଭିଲିୟନ ଫେରିଥିଲେ। ଶେଷ ଓଭରରୁ ବିଜୟ ପାଇଁ ୯ ରନ ଆବଶ୍ୟକ ହେଉଥିଲା। ପ୍ରଥମ ୩ ବଲ୍ରୁ ୪ ରନ ଆସିଥିବାବେଳେ ରାହୁଲ ଚହରଙ୍କ ୪ର୍ଥ ବଲ୍କୁ ଛକାରେ ପରିଣତ କରି ଧ୍ରୁବ ଜୁରେଲ ପ୍ରତୀକ୍ଷାର ଅବସାନ ଘଟାଇଥିଲେ। ପଞ୍ଜାବ ବୋଲରଙ୍କ ମଧ୍ୟରେ କାଗିଶୋ ରାବାଡ଼ା ୨ଟି ଏବଂ ସାମ୍ କୁରାନ, ଅର୍ଶଦୀପ ସିଂ, ନାଥାନ ଏଲିସ ଓ ରାହୁଲ ଚହର ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ପଞ୍ଜାବ କିଙ୍ଗ୍ସ ୨୦ ଓଭରରେ ୧୮୭/୫ (ସାମ୍ କୁରାନ-୪୯*, ଜୀତେଶ ଶର୍ମା-୪୪, ଶାହରୁଖ ଖାଁ-୪୧*, ନବଦୀପ ସଇନି-୩/୪୦, ଟ୍ରେଣ୍ଟ ବୋଲ୍ଟ-୧/୩୫, ଆଡାମ ଜାମ୍ପା-୧/୨୬)। ରାଜସ୍ଥାନ ରୟାଲ୍ସ ୧୯.୪ ଓଭରରେ ୧୮୯/୬ (ଦେବଦତ୍ତ ପଡିକାଲ-୫୧, ଜସଶ୍ୱୀ ଜୟସ୍ବାଲ-୫୦, ଶିମ୍ରନ ହେଟମେର-୪୬, କାଗିଶୋ ରାବାଡ଼ା-୨/୪୦, ନାଥାନ ଏଲିସ-୧/୩୪, ଅର୍ଶଦୀପ ସିଂ-୧/୪୦, ସାମ୍ କୁରାନ-୧/୪୬, ରାହୁଲ ଚହର-୧/୨୮)।