ଅନ୍ଲାଇନ୍ରେ ଗେମ୍ ଖେଳିବା ଆଜିକାଲି ଯୁବପୀଢ଼ିଙ୍କ ଅଭ୍ୟାସରେ ପରିଣତ ହେଲାଣି। ଏଭଳି ସ୍ଥଳରେ ଅନ୍ଲାଇନ୍ ଖେଳିବାକୁ ନେଇ ଆଶ୍ଚର୍ଯ୍ୟ କଲାଭଳି ଘଟଣା ନଜରକୁ ଆସୁଛି। ଏଭଳି ଏକ ଘଟଣା ପଞ୍ଜାବରେ ଦେଖିବାକୁ ମିଳିଛି। ଜଣେ ପୁଅ ପବ୍ଜି ଖେଳିବା ପାଇଁ ମା’ବାପାଙ୍କ ୧୬ ଲକ୍ଷ ଟଙ୍କା ଖର୍ଚ୍ଚ କରିଦେଇଛନ୍ତି। ପୂର୍ବରୁ ଏହି ପବ୍ଜି ଅର୍ଥାତ ପ୍ଲେୟାର ଅନ୍ନୋନ୍ ବ୍ୟାଟେଲ୍ ଗ୍ରାଉଣ୍ଡ) ଖେଳକୁ ନେଇ ଅନେକ ଯୁବକ ଆତ୍ମହତ୍ୟା କରିଛନ୍ତି। ଏବେ ପଞ୍ଜାବର ଏହି ଯୁବକ ଏକ ମାସ ମଧ୍ୟରେ ଖେଳର ଚମ୍ପିଆନ୍ ହେବା ଲାଗି ଭର୍ଚୁଆଲ ଗୁଳି, ବାରୁଦ,ତୋପ ଆଦି କିଣିଥିବା କୁହାଯାଉଛି।
ଘଟଣାଟି ଏପରି। ୧୭ ବର୍ଷୀୟ ଉକ୍ତ ଯୁବକ ଅନ୍ଲାଇନ୍ ପାଠ ପଢ଼ିବା ପାଇଁ କହି ଟଙ୍କା ନେଇଛନ୍ତି। ତାଙ୍କ ନିକଟରେ ତିନୋଟି ବ୍ୟାଙ୍କ ପାସ୍ବୁକ୍ ବିଷୟରେ ଧାରଣା ରହିଥିଲା। ଏହାକୁ ସେ ପବ୍ଜି ପ୍ରୋଫାଇଲ୍ ଅପ୍ଗ୍ରେଡ କରିବା ଲାଗି ବ୍ୟବହାର କରିଥିଲେ। ବ୍ୟାଙ୍କଖାତାରୁ ପଇସା ଉଠାଇ ସେ ନିଜେ ଅନ୍ୟାନ୍ୟ ଆପ୍ କିଣିବା ସହ ବନ୍ଧୁମାନଙ୍କୁ ଏପରି କରିବାକୁ ସାହାଯ୍ୟ କରୁଥିଲେ। ପ୍ରଥମେ ମା’ବାପା ଏହା ଜାଣି ପାରି ନ ଥିଲେ। ହେଲେ ବ୍ୟାଙ୍କରୁ ନେଣଦେଣର ଚିଠା ଆଣିବା ପରେ ଘଟଣା ସାମ୍ନାକୁ ଆସିଥିଲା।
ଯୁବକଙ୍କ ବାପା ଜଣେ ସରକାରୀ କର୍ମଚାରୀ ଥିବା ବେଳେ ଦୀର୍ଘ ଦିନ ଧରି ଅସୁସ୍ଥ ଅଛନ୍ତି। ସେ ରଖିଥିବା ଟଙ୍କାକୁ ନିଜ ଚିକିତ୍ସାରେ ଖର୍ଚ୍ଚ କରିବାକୁ ଚାହୁଁଥିଲେ। ହେଲେ ଏବେ ପୁଅ ସେହି ଟଙ୍କାକୁ ଖେଳରେ ଶେଷ କରିଦେଇଛନ୍ତି। ଏପରିକି ସେ ତାଙ୍କ ମା’ଙ୍କ ପିଏଫ୍ ଆକାଉଣ୍ଟରୁ ଟଙ୍କା ଉଠାଇଛନ୍ତି। ନିଜର ମେଡିକାଲ ଖର୍ଚ୍ଚ ସହ ପୁଅର ପାଠପଢ଼ା ଲାଗି ମହିଳାଜଣଙ୍କ ଟଙ୍କା ରଖିଥିଲେ। ହେଲେ ଲକ୍ଡାଉନ୍ ହେବା ପରେ ନାବାଳକ ମା’ଙ୍କ ପାଖରେ ରହୁଥିଲେ। ସେ ନିଜ ଫୋନରେ ଟଙ୍କା ନେଣଦେଣ କରୁଥିଲେ। ସେ ଟଙ୍କା ଉଠାଇବାର ମେସେଜ ଆସିଥିଲେ ସେ ତାହାକୁ ଡିଲିଟ୍ କରିଥିବା ମହିଳା କହିଛନ୍ତି।
ତେବେ ନାବାଳକଙ୍କ ମା’ବାପା ସେ ପବ୍ଜି ଖେଳୁଥିବା ଜାଣିଥିଲେ। ହେଲେ ସେ ଏଭଳି କରିବେ ବୋଲି ତାଙ୍କର ଭରସା ନ ଥିଲା। ଏବେ ସେ ପୋଲିସ ପାଖକୁ ମଧ୍ୟ ଯାଇପାରୁନାହାନ୍ତି। କାରଣ ପୁଅ ଜାଣିଶୁଣି ଏଭଳି କରିଛନ୍ତି। ମା’ଙ୍କ ପିଏଫ୍ରୁ ୨ ଲକ୍ଷ ଟଙ୍କା ଉଠାଇଥିବା ବେଳେ ଅନ୍ୟ ଟଙ୍କା ବାପାଙ୍କ ଆକାଉଣ୍ଟରୁ ଉଠାଇଛନ୍ତି ବୋଲି ଜଣାପଡ଼ିଛି।