ମେଲବୋର୍ନ,୨୯ା୧- ଅଷ୍ଟ୍ରେଲିଆରେ ବାସ କରୁଥିବା ପଞ୍ଜାବୀ ଡ୍ରାଇଭରଙ୍କ ୧୯ ବର୍ଷୀୟ ପୁଅ ତାନଭୀର ସାଙ୍ଘା ଅଷ୍ଟ୍ରେଲିଆର ଜାତୀୟ ସିନିୟର ଦଳରେ ସ୍ଥାନ ପାଇଛନ୍ତି। ଆଗାମୀ ନ୍ୟୁଜିଲାଣ୍ଡ ବିପକ୍ଷ ଟି୨୦ ସିରିଜ୍ ଲାଗି ଘୋଷିତ ୧୮ ଜଣିଆ ଅଷ୍ଟ୍ରେଲିଆ ଦଳରେ ତାଙ୍କୁ ମିଳିଛି ସୁଯୋଗ।
”ଜାତୀୟ ଦଳରୁ ଡାକରା ଆସିବା ପରେ ମୁଁ ଜହ୍ନରେ ଥିବା ଅନୁଭବ କରୁଛି। ଏତେ କମ୍ ବୟସରେ ଅଷ୍ଟ୍ରେଲିଆ ପକ୍ଷରୁ ଅନ୍ତର୍ଜାତୀୟ ସ୍ତରରେ ମୋତେ ସୁଯୋଗ ମିଳିବ ଆଶା କରି ନ ଥିଲି“ ବୋଲି ତାନଭୀର କହିଛନ୍ତି। ଫେବୃୟାରୀରୁ ଆରମ୍ଭ ହେବାକୁ ଥିବା ସିରିଜ୍ରେ ଯଦି ତାଙ୍କୁ ଚୂଡ଼ାନ୍ତ ଦଳରେ ସୁଯୋଗ ମିଳେ, ତେବେ ଦ୍ୱିତୀୟ ଭାରତୀୟ ବଂଶୋଦ୍ଭବ ଭାବେ ଅଷ୍ଟ୍ରେଲିଆ ପାଇଁ ପ୍ରତିନିଧିତ୍ୱ ଖେଳିବେ। ଅଷ୍ଟ୍ରେଲିଆ ପାଇଁ ଖେଳିବାରେ ପଞ୍ଜାବୀ ଖେଳାଳି ଗୁରିନ୍ଦର ସାନ୍ଧୁ ଥିଲେ ପ୍ରଥମ ଓ ଏକମାତ୍ର ଭାରତୀୟ ବଂଶୋଦ୍ଭବ। ସେ ୬ ବର୍ଷ ତଳେ ଅନ୍ତର୍ଜାତୀୟ କ୍ରିକେଟରେ ଅଷ୍ଟ୍ରେଲିଆ ପକ୍ଷରୁ ଖେଳିଥିଲେ ପ୍ରଥମ ମ୍ୟାଚ୍।
ତାନଭୀରଙ୍କ ବାପା ଜଗା ସିଙ୍ଘୁ ୧୯୯୭ରେ ଜଳନ୍ଧରରୁ ସିଡ୍ନୀ ଚାଲିଯାଇଥିଲେ। ପଞ୍ଜାବରେ କୃଷକ ଭାବେ କାର୍ଯ୍ୟ କରୁଥିବା ଜଗା ଷ୍ଟୁଡେଣ୍ଟ ଭିସାରେ ଯାଇଥିଲେ ଅଷ୍ଟ୍ରେଲିଆ। ସେଠାରେ କୃଷକ ଭାବେ କାର୍ଯ୍ୟ କରିବା ପରେ ଆରମ୍ଭ କରିଥିଲେ ଟାକ୍ସି ଚଳାଇବା। ତାଙ୍କ ମା’ ଉପନୀତ ଜଣେ ଆକାଉଣ୍ଟାଣ୍ଟ।