ଚଣ୍ଡିଗଡ଼,୨।୮: ଲୋକପ୍ରିୟ ପଞ୍ଜାବୀ ଗାୟକ ସିଦ୍ଧୁ ମୁସେ ଓ୍ବାଲାଙ୍କୁ ହତ୍ୟା କରାଯିବାର ୨ମାସ ପରେ ଆଉ ଜଣେ ଗାୟକଙ୍କୁ ହତ୍ୟା ଧମକ ମିଳିଛି। ନିଜ ଜୀବନ ପ୍ରତି ବିପଦ ଥିବା ଦର୍ଶାଇ ପଞ୍ଜାବୀ ଗାୟକ ତଥା ଗୀତିକାର ଜାନି ପୋଲିସର ସୁରକ୍ଷା ଲୋଡିଛନ୍ତି। ସେ କହିଛନ୍ତି, ତାଙ୍କୁ ଫୋନରେ ହତ୍ୟା ଧମକ ଦିଆଯାଉଛି। ବିପଦ ଭୟରେ ଏବଂ ସୁରକ୍ଷାକୁ ଦୃଷ୍ଟିରେ ରଖି ସେ ତାଙ୍କ ପରିବାରଲୋକଙ୍କୁ ବିଦେଶକୁ ପଠାଇ ଦେଇଛନ୍ତି। ଏଥିସହ ଗ୍ୟାଙ୍ଗଷ୍ଟରମାନେ ଜାନିଙ୍କ ମ୍ୟାନେଜରଙ୍କୁ ମଧ୍ୟ ଧମକ ଦେଇଥିବା ଜଣାପଡ଼ିଛି। ତେବେ ଜୀବନ ପ୍ରତି ଥିବା ବିପଦକୁ ଦୃଷ୍ଟିରେ ରଖି ଜାନି ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ, ପଞ୍ଜାବ ପୋଲିସ, ଏଡିଜିପି (ସିକ୍ୟୁରିଟି) ଏବଂ ମୋହାଲି ଏସ୍ଏସ୍ପିଙ୍କୁ ଏକ ଚିଠି ଲେଖି ସୁରକ୍ଷା ମାଗିଛନ୍ତି। ଜାନି ଉକ୍ତ ଚିଠିରେ ଉଲ୍ଲେଖ କରିଛନ୍ତି ଯେ, ସେ ଗତ କିଛି ବର୍ଷରୁ ପଞ୍ଜାବୀ ଚଳଚ୍ଚିତ୍ର ଏବଂ ସଙ୍ଗୀତ ଜଗତ ପାଇଁ କାମ କରିଆସୁଛନ୍ତି। କାମ ହେଉ କି ଶୁଟିଂ ପାଇଁ ଅନେକ ସମୟରେ ଆଉଟଡୋର ଯିବାକୁ ପଡ଼ୁଛି। ତେବେ ଧମକ ମିଳିବା ପରେ କାମରେ ଅନେକ ବାଧା ଉପୁଜିଛି ବୋଲି ଜାନି କହିଛନ୍ତି।
