ପୁରୀ ବିମାନବନ୍ଦର ଭାଗ୍ୟ ଡେଲୋଇଟ୍‌ ହାତରେ

ଭୁବନେଶ୍ୱର,୨୬ା୧(ସୁନିତ୍‌ ମିଶ୍ର): ଏୟାରପୋର୍ଟ ଅଥରିଟି ଅଫ୍‌ ଇଣ୍ଡିଆ ପୁରୀ ବିମାନବନ୍ଦର ନିର୍ମାଣଠାରୁ ଆରମ୍ଭକରି ବିମାନ ଚଳାଚଳ ପର୍ଯ୍ୟନ୍ତ ସବୁ ଦାୟିତ୍ୱ ନେବ। ଯେପରିକି ଭୁବନେଶ୍ୱର ଏବଂ ଝାରସୁଗୁଡ଼ା ବିମାନବନ୍ଦର ଦାୟିତ୍ୱ ଏୟାରପୋର୍ଟ ଅଥରିଟି ଅଫ୍‌ ଇଣ୍ଡିଆ ଚଲାଉଛି। ହେଲେ ଜୟପୁର, ରଙ୍ଗେଇଲୁଣ୍ଡା ଏବଂ ଉତ୍କେଲା ବିମାନବନ୍ଦରର ସବୁ ଦାୟିତ୍ୱ ରାଜ୍ୟ ସରକାରଙ୍କ ହାତରେ ରହିଛି। ତେବେ ପୁରୀଠାରେ ହେବାକୁ ଥିବା ବିମାନବନ୍ଦର ଲାଗି ଜମି ଅଧିଗ୍ରହଣ ସବୁଠୁ ବଡ଼ ସମସ୍ୟା। ରାଜ୍ୟ ସରକାର ଜମି ଅଧିଗ୍ରହଣ ସମ୍ପର୍କିତ ସମସ୍ତ ତଥ୍ୟ ଡେଲୋଇଟ୍‌ଠାରୁ ନେବେ। ଆସନ୍ତା ଫେବୃଆରୀ ପ୍ରଥମ ସପ୍ତାହରେ ଡେଲୋଇଟ୍‌ ଏବଂ ରାଜ୍ୟ ସରକାରଙ୍କ ପରିବହନ ବିଭାଗ ମଧ୍ୟରେ ପୁରୀ ବିମାନବନ୍ଦର ପ୍ରତିଷ୍ଠା ସମ୍ପର୍କିତ ସମସ୍ୟାଗୁଡ଼ିକର ବିସ୍ତୃତ ଆଲୋଚନା ହେବ। ଏଭଳି ସ୍ଥିତିରେ ରାଜ୍ୟ ପରିବହନ ବିଭାଗର ଜଣେ ବରିଷ୍ଠ ଅଧିକାରୀ ନିଜର ନାମ ଗୋପନ ରଖି କହିଛନ୍ତି, ପୁରୀ ବିମାନବନ୍ଦରର କାର୍ଯ୍ୟ ଅନ୍ଧାର ଭିତରେ ରହିଛି। କେନ୍ଦ୍ର ସରକାର ଏନେଇ ଆବଶ୍ୟକ ଆଗ୍ରହ ଦେଖାଉନାହାନ୍ତି। ନ ହେଲେ ଡେଲୋଇଟ୍‌ ଭଳି ଏକ ଅନଭିଜ୍ଞ ସଫ୍ଟଓ୍ବେର ସଂସ୍ଥା ହାତରେ ଏହି ଗୁରୁତ୍ୱପୂର୍ଣ୍ଣ କାର୍ଯ୍ୟର ଦାୟିତ୍ୱ ହସ୍ତାନ୍ତର କରି ନ ଥାନ୍ତେ। ଡେଲୋଇଟ୍‌ କ’ଣ ତଥ୍ୟ ସଂଗ୍ରହ କରିଛି ସେ ନେଇ ପୂର୍ବରୁ ୨ ଥର ବୈଠକ ହେବାର ଥିଲା। ହେଲେ ଏପର୍ଯ୍ୟନ୍ତ ତାହା ହୋଇପାରିନାହିଁ ବୋଲି ସେ କହିଛନ୍ତି।
ରାଜ୍ୟ ସରକାର ଓଡ଼ିଶାରେ ଆଉ ୮ଟି ବିମାନବନ୍ଦର ପ୍ରତିଷ୍ଠା କରିବା ନେଇ ଯୋଜନା ରଖିଛନ୍ତି। ମୟୂରଭଞ୍ଜର ଦଣ୍ଡବୋଷ, ବଲାଙ୍ଗୀରର ତୁଷୁରା, ଢେଙ୍କାନାଳର ବିରାଶାଳ, ରାଉରକେଲା, ମୟୂରଭଞ୍ଜର ଅମର୍ଦା ରୋଡ୍‌, ନୂଆପଡ଼ାର ଗୋଟମା, ରାୟଗଡ଼ର ଗୁଡ଼ାରି ଏବଂ ପଦ୍ମପୁରର ସତୀଭଟାଠାରେ ବିମାନବନ୍ଦର ପ୍ରତିଷ୍ଠା ନେଇ ଯୋଜନା ରଖିଛନ୍ତି। ସେଥିମଧ୍ୟରୁ ମୟୂରଭଞ୍ଜର ଦଣ୍ଡବୋଷଠାରେ ବିମାନବନ୍ଦର ହେବା ନେଇ ନିକଟରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଶିଳାନ୍ୟାସ କରିଥିଲେ। ଏହାଛଡ଼ା ଢେଙ୍କାନାଳର ବିରାଶାଳଠାରେ ପୂର୍ବରୁ ଥିବା ଏୟାରଷ୍ଟ୍ରିପ୍‌କୁ ଆଭିଏଶନ ଟ୍ରେନିଂ ସେଣ୍ଟର ଭାବେ ନିର୍ମାଣ କରାଯିବ ଏବଂ ତୁଷୁରାଠାରେ ଯେଉଁ ବିମାନବନ୍ଦର ହେବାକୁ ଅଛି, ତାହା ଏକ ପ୍ରକାର ସ୍ଥିର। ବାକି ୫ଟି ସ୍ଥାନରେ ବିମାନବନ୍ଦର ହେବ ନା ନାହିଁ ତାହା ପ୍ରଶ୍ନବାଚୀ ଭିତରେ ରହିଛି। ରାଉରକେଲାଠାରେ ସେଲ୍‌ ସହ ମିଶି ବିମାନବନ୍ଦର ପ୍ରତିଷ୍ଠା କରାଯିବା ଯୋଜନା ଅଛି। ରାୟଗଡ଼ାର ଗୁଡ଼ାରିଠାରେ ଯଦି ବିମାନବନ୍ଦର ହୁଏ ତାହାକୁ ଏୟାରପୋର୍ଟ ଅଥରିଟି ଅଫ୍‌ ଇଣ୍ଡିଆ ଦାୟିତ୍ୱ ନେଇ ଚଳାଇବ ବୋଲି ଜଣେ ପରିବହନ ବିଭାଗର ଅଧିକାରୀ ସୂଚନା ଦେଇଛନ୍ତି। ଏସବୁ ଭିତରେ ପୁରୀ ଭଳି ବଡ଼ ପର୍ଯ୍ୟଟନସ୍ଥଳରେ ହେବାକୁ ଥିବା ବିମାନବନ୍ଦର ଚର୍ଚ୍ଚାର ସର୍ବାଗ୍ରେ ରହିଥିବାବେଳେ ଉକ୍ତ କାର୍ଯ୍ୟ ଡେଲୋଇଟ୍‌ କେତେ ତୁଲାଉଛି ତାହା ସମୟ ସ୍ପଷ୍ଟ କରିବ ବୋଲି ଶୁଣିବାକୁ ମିଳୁଛି। ଜମି ଅଧିଗ୍ରହଣ ଏବଂ ବିମାନବନ୍ଦର କାର୍ଯ୍ୟ ସମ୍ପର୍କରେ ଡେଲୋଇଟ୍‌ କମ୍ପାନୀର ପୂର୍ବରୁ କିଛି ଅଭିଜ୍ଞତା ରହିଛି କି ନାହିଁ, ତାହା ଇଣ୍ଟରନେଟ୍‌ରୁ ଜାଣିବାକୁ ଚେଷ୍ଟା କରିଥିଲୁ। ହେଲେ ଉକ୍ତ କମ୍ପାନୀର ଜମି ଅଧିଗ୍ରହଣ ଓ ବିମାନବନ୍ଦର ନିର୍ମାଣ କାର୍ଯ୍ୟ ନେଇ ସମ୍ପୂର୍ଣ୍ଣ ଅନଭିଜ୍ଞ ଥିବା ଜାଣିବାକୁ ମିଳିଛି।