ପୁରୀ ଅଫିସ,୨୮।୧: ପୁରୀ ଟାଉନ ଥାନା ଅଞ୍ଚଳରେ ଗତ ୨୩ ତାରିଖରେ ୫ବର୍ଷୀୟା ଶିଶୁକନ୍ୟାକୁ ଉଠାଇନେଇ ବଳାତ୍କାର କରାଯିବା ମାମଲାର ଅଭିଯୁକ୍ତ ମହେଶ ମହାନ୍ତିଙ୍କୁ ପୁରୀ ପୋଲିସ ବୁଧବାର ରାତିରେ ଗିରଫ କରିଛି। ପୁରୀ-ଭୁବନେଶ୍ୱର ଜାତୀୟ ରାଜପଥ ସୀମାନ୍ତ ପିପିଲି ଅଞ୍ଚଳରୁ ମହେଶଙ୍କୁ ଗିରଫ କରାଯାଇ ଡାକ୍ତରୀ ମାଇନା କରାଯିବା ପରେ ଗୁରୁବାର କୋର୍ଟ ଚାଲାଣ କରାଯାଇଛି। ଏହି ଘଟଣାରେ ତାଙ୍କୁ ସହଯୋଗ କରିଥିବା ସନ୍ଦେହରେ ଜଣେ ବ୍ୟକ୍ତିଙ୍କୁ ପୋଲିସ ଅଟକ ରଖି ପଚରାଉଚରା କରୁଛି। ଉକ୍ତ ମାମଲାକୁ ରେଡ୍ଫ୍ଲାଗ୍ କେସ୍ରେ ସାମିଲ କରାଯିବାକୁ ପଦକ୍ଷେପ ନିଆଯିବ। ସେହିପରି ୨୦ଦିନ ମଧ୍ୟରେ ତଦନ୍ତ ଶେଷ କରାଯାଇ କୋର୍ଟରେ ଚାର୍ଜଶିଟ ଦାଖଲ କରାଯିବ। ମାମଲାର ତ୍ୱରିତ ଶୁଣାଣି ପାଇଁ ମଧ୍ୟ ପୋଲିସ ଉଦ୍ୟମ କରିବ। ଅନ୍ୟପକ୍ଷରେ ପୀଡ଼ିତା ଏବେ ସୁସ୍ଥ ଅଛନ୍ତି ଓ ତାଙ୍କୁ ଶିଶୁ କଲ୍ୟାଣ କମିଟି ନିକଟରେ ଉପସ୍ଥିତ କରାଇବାକୁ ପୋଲିସ ସବୁ ପ୍ରକାର ସହଯୋଗ କରୁଛି ବୋଲି ଗୁରୁବାର ଜିଲା ପୋଲିସ କାର୍ଯ୍ୟାଳୟରେ ଆୟୋଜିତ ଏକ ଖବରଦାତା ସମ୍ମିଳନୀରେ ଏସ୍ପି କନଓ୍ବର ବିଶାଲ ସିଂ ସୂଚନା ଦେଇଛନ୍ତି। ଏସ୍ପି କହିଛନ୍ତି, ସମ୍ପୃକ୍ତ ଶିଶୁକନ୍ୟାଙ୍କୁ ବଳାତ୍କାର ନେଇ ପରିବାର ପକ୍ଷରୁ ପୁରୀ ଟାଉନ୍ ଥାନାରେ ଲିଖିତ ଅଭିଯୋଗ କରାଯାଇଥିଲା। ଏହାପରେ ପୋଲିସ ଫେରାର ଅଭିଯୁକ୍ତ ମହେଶଙ୍କୁ ଧରିବା ଲାଗି ବିଭିନ୍ନ ସ୍ଥାନରେ ଖୋଜାଖୋଜି ଆରମ୍ଭ କରିଥିଲା। ପୁରୀ ପୋଲିସ ପକ୍ଷରୁ ଅତିରିକ୍ତ ଏସ୍ପି ମିହିର ପଣ୍ଡା ଏବଂ ସିଟି ଡିଏସ୍ପି ଜନାର୍ଦ୍ଦନ ପାଢ଼ୀଙ୍କ ତତ୍ତ୍ୱାବଧାନରେ ୪ଟି ସ୍ବତନ୍ତ୍ର ଟିମ୍ ଏହି କାର୍ଯ୍ୟରେ ନିୟୋଜିତ ହୋଇଥିଲେ। ଭୁବନେଶ୍ୱର, କଟକ, ପିପିଲି, ବ୍ରହ୍ମଗିରି, କୋଣାର୍କ, ଛଇତନା, ପାରାଦୀପ, ଜଗତ୍ସିଂହପୁର ପ୍ରଭୃତି ବିଭିନ୍ନ ସ୍ଥାନ ସହ ଅଭିଯୁକ୍ତଙ୍କ ପୈତୃକ ବାସସ୍ଥଳୀ ବାଲିକୁଦା ଅଞ୍ଚଳରେ ମଧ୍ୟ ଖୋଜାଖୋଜି କରାଯାଇଥିଲା। ବୁଧବାର ରାତିରେ ପିପିଲି ଅଞ୍ଚଳରୁ ତାଙ୍କୁ ଗିରଫ କରାଯାଇଛି। ତେବେ ଅଭିଯୁକ୍ତଙ୍କ ପାଖରେ ମୋବାଇଲ ଫୋନ୍ ନ ଥିବାରୁ କୌଣସି ଡିଜିଟାଲ୍ ମାଧ୍ୟମରେ ନୁହେଁ ବରଂ ପୋଲିସ ଟିମ୍ କଠିନ ପରିଶ୍ରମ କରି ତାଙ୍କୁ ଧରିଛି ବୋଲି ଏସ୍ପି ସୂଚନା ଦେଇଛନ୍ତି।
ଅଭିଯୁକ୍ତଙ୍କ ନାମରେ ପୂର୍ବରୁ ସମୁଦ୍ରକୂଳ ଥାନା ଓ ଟାଉନ ଥାନାରେ ମାମଲା ରହିଛି। ପ୍ରଥମେ ଆଇପିସି ଧାରା ୨୯୪, ୫୦୬ରେ କେସ୍ ନମ୍ବର ୨୦/୨୦୨୨ ରୁଜୁ ହୋଇଥିଲା। ପରେ ଆଇପିସି ଧାରା ୩୭୬ (ଏ), (ବି) ଏବଂ ପୋକ୍ସୋ ଆକ୍ଟ ସେକ୍ସନ୍-୬ ସମେତ ପୂର୍ବ ମାମଲା ଆଧାରରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ଘଟଣାକୁ ପୋଲିସ ଗୁରୁତ୍ୱର ସହ ନେଇଛି। ଜିଲା ଆଇନସେବା ପ୍ରାଧିକରଣ ସହ ମଧ୍ୟ ଆଲୋଚନା ଜାରି ରହିଛି। ପରବର୍ତ୍ତୀ ବୈଠକରେ ପୀଡ଼ିତାଙ୍କୁ କ୍ଷତିପୂରଣ ମିଳିବା ନେଇ ନିଶ୍ଚିତ କରାଯିବ। ଚାର୍ଜଶିଟ୍ ଦାଖଲ ନ ହେବା ପର୍ଯ୍ୟନ୍ତ ତଦନ୍ତ ପ୍ରକ୍ରିୟା ସମ୍ପର୍କରେ କହିବା ଠିକ୍ ହେବ ନାହିଁ ବୋଲି ଏସ୍ପି ସିଂ କହିଛନ୍ତି।
