ପୁରୀ,୧୭ା୭(ଅଜିତ ମହାନ୍ତି): ରାଜ୍ୟର ପ୍ରମୁଖ ପର୍ଯ୍ୟଟନସ୍ଥଳ ମଧ୍ୟରୁ ଶ୍ରୀକ୍ଷେତ୍ର ଅନ୍ୟତମ। ପ୍ରତିିଦିନ ଲକ୍ଷାଧିକ ପର୍ଯ୍ୟଟକ ଦେଶବିଦେଶରୁ ପୁରୀ ବୁଲିବାକୁ ଆସିଥାନ୍ତି। ସେମାନେ ପୁରୀର ସ୍ବର୍ଣ୍ଣାଭ ବେଳାଭୂମିରେ କିଛି ସମୟ ବିତାଇଥାନ୍ତି। ଯେପରି ଅଧିକରୁ ଅଧିକ ପର୍ଯ୍ୟଟକ ପୁରୀ ଆସିବେ ଓ ସୁଖଦ ଅନୁଭବ ନେଇ ଫେରିବେ ସେଥିପାଇଁ ପ୍ରଶାସନ ପକ୍ଷରୁ ବିଭିନ୍ନ କାର୍ଯ୍ୟକ୍ରମ କରାଯାଉଛି। ଏହି କ୍ରମରେ ପୁରୀ ବିଚ୍ ଡେଭଲପ୍ମେଣ୍ଟ ପ୍ରୋଜେକ୍ଟ ହାତକୁ ନିଆଯାଇଛି। ଏହି ପ୍ରୋଜେକ୍ଟରେ ଓଡ଼ିଶା ସେତୁ ନିର୍ମାଣ ନିଗମ ପକ୍ଷରୁ ପୁରୀ ବେଳାଭୂମିର ସୌନ୍ଦର୍ଯ୍ୟକରଣ ଓ ଉନ୍ନତିମୂଳକ କାର୍ଯ୍ୟ କରାଯାଉଛି। ଏଥିପାଇଁ ୧୦୨ କୋଟି ଟଙ୍କା ବ୍ୟୟବରାଦ ହୋଇଛି। ଆସନ୍ତା ୨୦୨୪ ଜୁନ୍ ସୁଦ୍ଧା କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖାଯାଇଛି। ସେହିପରି ପୂର୍ବରୁ ପର୍ଯ୍ୟଟକଙ୍କ ଗାଡ଼ି ପାର୍କିଂ ସୁବିଧା ନ ଥିଲା। ଅନେକ ସମୟରେ ଗାଡ଼ିଗଡ଼ିକୁ ବେଳାଭୂମି ରାସ୍ତା ପାଶ୍ୱରେ ପର୍ଯ୍ୟଟକମାନେ ରଖୁଥିଲେ। ଫଳରେ ଟ୍ରାଫିକ ସମସ୍ୟା ଉପୁଜୁଥିଲା। ଏହାକୁ ଦୃଷ୍ଟିରେ ରଖି ଦିଗବାରେଣୀ ଛକ, ସିପସରୁବାଲି ଅଞ୍ଚଳ ଏବଂ ଯାତ୍ରିକା ନିକଟରେ ପାର୍କିଂ ବ୍ୟବସ୍ଥା କରାଯାଉଛି। ବେଳାଭୂମିକୁ ସବୁଜ ସୁନ୍ଦର କରିବା ପାଇଁ ବିଭିନ୍ନ ପ୍ରକାର ଚାରା ରୋପଣ କରାଯିବ। ପର୍ଯ୍ୟଟକଙ୍କ ଚାଲିବା ପାଇଁ ଫୁଟ୍ପାଥ୍ ନିର୍ମାଣ କରାଯିବ। ୱାଚ ଟାୱାର ନିର୍ମାଣ କରାଯିବ, ଯେଉଁଠାରେ ପର୍ଯ୍ୟଟକଙ୍କ ଉପରେ ସୁରକ୍ଷିତ ସ୍ନାନ ନେଇ ନଜର ରଖାଯାଇପାରିବ। ସରକାରଙ୍କ ପକ୍ଷରୁ ଚାଲିଥିବା ବେଳାଭୂମି ଉନ୍ନତୀକରଣକୁ ଅନେକ ପର୍ଯ୍ୟଟକ ସ୍ବାଗତ କରିଛନ୍ତି।