ପୁରୀ ଅଫିସ, ୧୩।୯: ପର୍ଯ୍ୟଟକଙ୍କ ପାଇଁ ଖୋଲିଛି ବ୍ଲୁ ଫ୍ଲାଗ ବେଳାଭୂମି। ଶନିବାରଠାରୁ ପର୍ଯ୍ୟଟକମାନେ ଟିକେଟ୍ କାଟି ଏହି ପାଇଲଟ୍ ବ୍ଲୁ ଫ୍ଲାଗ ବେଳାଭୂମି ବୁଲିଛନ୍ତି। ଅନ୍ତର୍ଜାତୀୟ ପର୍ଯ୍ୟଟନ କ୍ଷେତ୍ର ପୁରୀକୁ ବିଶ୍ୱ ପର୍ଯ୍ୟଟନ ମାନଚିତ୍ରରେ ସାମିଲ କରିବା ପାଇଁ ଏହି ବ୍ଲୁ ଫ୍ଲାଗ ବିଚ୍ କରାଯାଇଛି। ଫଳରେ ଓଡ଼ିଶା ପର୍ଯ୍ୟଟନ ବିକାଶରେ ଆଉ ପାଦେ ଆଗକୁ ବଢିଛି।
ପ୍ରଥମ ଦିନରେ ପର୍ଯ୍ୟଟକ ବିଭିନ୍ନ ଶ୍ରେଣୀର ଟିକେଟ୍ କାଟିଛନ୍ତି। ବିଶେଷକରି ୨୦ ଟଙ୍କିଆ ଟିକେଟ ଅଧିକ କାଟିଥିବା ଜଣାପଡିଛି। ତେବେ ପ୍ରବେଶ ଦେୟ ଭିନ୍ନ ଭିନ୍ନ ରହିଛି। ଲୋକାଲ ଲୋକଙ୍କ ପାଇଁ ମାସିକିଆ ପାସ୍ ଦର ୩୦୦ ଟଙ୍କା ରଖାଯାଇଛି, ଯାହା ଦିନକୁ ଥରେ ୩ ଘଣ୍ଟା ପାଇଁ ଯାଇପାରିବେ। ସେହିପରି ୨୦ ଟଙ୍କା ଦେଇ ଦିନକୁ ଥରେ ୩ ଘଣ୍ଟା ପାଇଁ, ଦିନକୁ ଲୋକାଲ ଲୋକଙ୍କୁ ୫୦ଟଙ୍କା ଏବଂ ପର୍ଯ୍ୟଟକଙ୍କୁ ୧୦୦ ଟଙ୍କା ପ୍ରବେଶ ଶୁକ୍ଳ ଦେବାକୁ ଧାର୍ଯ୍ୟ ହୋଇଛି ।
ସୋସାଇଟି ଅଫ୍ ଇଣ୍ଟିଗ୍ରେଟେଡ଼ କୋଷ୍ଟାଲ ମ୍ୟାନେଜମେଣ୍ଟ ଏବଂ ଭାରତ ସରକାରଙ୍କ ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ ଦ୍ୱାରା ପୁରୀକୁ ପାଇଲଟ୍ ବ୍ଲୁ ଫ୍ଲାଗ ବିଚ୍ ଭାବେ ଚିହ୍ନଟ କରାଯାଇଛି। ପୁରୀ ବେଳାଭୂମିରେ ସ୍ବଚ୍ଛତା, ସବୁଜିମା, ବସିବା ପାଇଁ ଛତ୍ରୀ, ବାଥି ଜୋନ, ଅତ୍ୟାଧୁନିକ ଶୌଚାଳୟ ସୁବିଧା, ପାନୀୟଜଳ, ପାର୍କିିଂ ଓ ଆନୁଷଙ୍ଗିକ ବ୍ୟବସ୍ଥା କରାଯାଇଛି। ସେହିପରି ବିଶୁଦ୍ଧ ପାନୀୟଜଳ, ୱାଚ୍ ଟାୱାର ସହ ପର୍ଯ୍ୟଟକଙ୍କ ସୁରକ୍ଷା ପାଇଁ ସିସିଟିଭି, ଲାଇଫ୍ଗାର୍ଡ ଓ ସୁରକ୍ଷା କର୍ମୀଙ୍କୁ ମଧ୍ୟ ମୁତୟନ କରାଯାଇଛି ।
ସୂଚନାଥାଉ କି, ଗାନ୍ଧୀଘାଟଠାରୁ ହୋଟେଲ ମେ ଫେୟାର ପର୍ଯ୍ୟନ୍ତ ୮୭୦ ମିଟର ବେଳାଭୂମିକୁ ବ୍ଲୁ ଫ୍ଲାଗ ବିଚ୍ ପାଇଁ ଚିହ୍ନଟ କରାଯାଇ ଏହାର ବିକାଶ କରାଯାଇଛି। ପର୍ଯ୍ୟଟକଙ୍କୁ ଅନ୍ତର୍ଜାତୀୟ ସୁବିଧା ପ୍ରଦାନ ଲକ୍ଷ୍ୟ ନେଇ ଏଠାରେ ପରିବେଶ ଅନୁକୂଳଭିତ୍ତିକ ନିର୍ମାଣ ହୋଇଛି ।