ନୂଆଦିଲ୍ଲୀ,୭।୬:ଭାରତର ୫ ଶ୍ରେଷ୍ଠ ତୀର୍ଥସ୍ଥାନ ମଧ୍ୟରେ ପୁରୀ ରହିଛି। ସର୍ବାଧିକ ଯାତ୍ରୀ ଆସୁଥିବା ଅନ୍ୟ ତୀର୍ଥସ୍ଥାନଗୁଡ଼ିକ ହେଲେ ବାରାଣସୀ, ତିରୁପତି, ଅମୃତସର ଏବଂ ଶିରିଡ଼ି। ଟ୍ରାଭେଲ୍ ଟେକ୍ କମ୍ପାନୀ ଓୟୋ ପକ୍ଷରୁ ପ୍ରକାଶିତ ରିପୋର୍ଟ ‘ଇଣ୍ଡିଆସ୍ ଟ୍ରେଜର ଟ୍ରୋଭ୍ ଅଫ୍ କଲ୍ଚର ଟ୍ରାଭେଲ୍ ୨୦୨୨’ରେ ଏହା ଉଲ୍ଲେଖ କରାଯାଇଛି। ରିପୋର୍ଟ ଅନୁଯାୟୀ ପୂର୍ବବର୍ଷ ତୁଳନାରେ ୨୦୨୨ରେ ସାଂସ୍କୃତିକ ସ୍ଥଳ ମଧ୍ୟରେ ଶ୍ରୀନଗର ପାଇଁ ସର୍ବାଧିକ ୩.୫ ଗୁଣରୁ ଅଧିକ ବୁକିଂ ହୋଇଛି। ଶ୍ରୀନଗର ବ୍ୟତୀତ ପହଲଗାମ, ଜମ୍ମୁ, ବୋଧଗୟା ଏବଂ ଶିରିଡ଼ି ଭାରତର ଶ୍ରେଷ୍ଠ ସାଂସ୍କୃତିକ ସ୍ଥଳ ମଧ୍ୟରେ ରହିଛି। ଚଳିତ ବର୍ଷ ଜାନୁୟାରୀରୁ ଏପ୍ରିଲ ମଧ୍ୟରେ ଓୟୋର ବୁକିଂ ତଥ୍ୟକୁ ଅନୁଧ୍ୟାନ କରାଯାଇ ଏହି ରିପୋର୍ଟ ପ୍ରସ୍ତୁତ କରାଯାଇଛି। ସେହିପରି ଚଳିତ ବର୍ଷ ଦେଶର ସବୁଠୁ ଲୋକପ୍ରିୟ ତୀର୍ଥସ୍ଥାନ ମଧ୍ୟରେ ଶୀର୍ଷରେ ବାରାଣସୀ ଥିବାବେଳେ ଏହା ପଛକୁ ତିରୁପତି, ପୁରୀ, ଅମୃତସର ଏବଂ ଶିରିଡ଼ି ସ୍ଥାନ ପାଇଛି। ଏହା ବ୍ୟତୀତ ଓୟୋର ମଧ୍ୟଗ୍ରୀଷ୍ମ ଅବକାଶ ସୂଚକାଙ୍କ ଅନୁଯାୟୀ ଚଳିତ ଗ୍ରୀଷ୍ମଋତୁରେ ବୈଷ୍ଣୋଦେବୀ ଦର୍ଶନ ଲାଗି ସର୍ବାଧିକ ଗ୍ରାହକ ଆଗ୍ରହ ପ୍ରକାଶ କରିଛନ୍ତି। ଐତିହ୍ୟ ସ୍ଥଳ ଭାବେ ଔରଙ୍ଗାବାଦର ଅଜନ୍ତା ଓ ଏଲୋରା ଗୁମ୍ଫା ଏବଂ ଆଗ୍ରାର ତାଜମହଲ ଶୀର୍ଷରେ ଥିବାବେଳେ ଏହା ପଛକୁ ହାମ୍ପି, ଖଜୁରାହୋ ଏବଂ ମହାବଳୀପୁରମ୍ ରହିଛି।
