ପୁରୀ ଅଫିସ/କୋଣାର୍କ,୧୭ା୪ (ଡି.ଏନ୍.ଏ): ଚଳିତ ବର୍ଷ ଭାରତରେ ଜି-୨୦ ବୈଠକ ଅନୁଷ୍ଠିତ ହେବାକୁ ଯାଉଛି। ଭାରତ ଉକ୍ତ ବୈଠକରେ ଅଧ୍ୟକ୍ଷତା କରୁଛି। ତେଣୁ ଜି-୨୦ ସମ୍ମିଳନୀକୁ ଦୃଷ୍ଟିରେ ରଖି ଦେଶର ବିଭିନ୍ନ ରାଜ୍ୟରେ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯାଉଛି। ଏହି ପରିପ୍ରେକ୍ଷୀରେ ଜେନ୍ ନେଷ୍ଟ୍ ଡେମୋକ୍ରାସି ନେଟୱର୍କ ଅନ୍ତର୍ଗତ କାର୍ଯ୍ୟକ୍ରମରେ ବିଭିନ୍ନ ଦେଶର ଯୁବ ପ୍ରତିନିଧିମାନେ ଭାରତୀୟ ଗଣତନ୍ତ୍ର ଐତିହ୍ୟ, କଳା ସଂସ୍କୃତି ଆଦି ବିଷୟରେ ଅବଗତ ହେବା ପାଇଁ ଭାରତ ଆସୁଛନ୍ତି। ଶନିବାର ୮ଟି ଦେଶର ପ୍ରତିନିଧି ମଣ୍ଡଳୀ ଓଡ଼ିିଶା ଆସି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଥିବାବେଳେ ରବିବାର କୋଣାର୍କ ଓ ପୁରୀ ବୁଲିଛନ୍ତି। ସେମାନେ କୋଣାର୍କ ସୂର୍ଯ୍ୟମନ୍ଦିର, ପୁରୀର ସ୍ବର୍ଣ୍ଣାଭ ବେଳାଭୂମି, ଶ୍ରୀମନ୍ଦିର ଆଦି ପରିଦର୍ଶନ କରିଛନ୍ତି।
ଆଜାଦି କା ଅମୃତ ମହୋତ୍ସବର ଅଂଶବିଶେଷ ଏହି କାର୍ଯ୍ୟକ୍ରମକୁ ଇଣ୍ଡିଆନ କାଉନ୍ସିଲ୍ ଫର୍ କଲଚରାଲ ରିସର୍ଚ୍ଚ ଆୟୋଜନ କରୁଛି। ଏହି ପ୍ରତିନିଧି ମଣ୍ଡଳୀ ଭାରତର ବିଭିନ୍ନ ଐତିହ୍ୟ, ବିଧାନସଭା ଗୃହ ଇତ୍ୟାଦି ପରିଦର୍ଶନ କରିଛନ୍ତି। ପ୍ରତିନିଧି ମଣ୍ଡଳୀରେ ପର୍ତ୍ତୃଗାଲ, କ୍ରୋଏସିଆ, ମଙ୍ଗୋଲିଆ, ଗାଏନା, ବ୍ରାଜିଲ, ବେଲଜିୟମ,ବୁଲଗେରିଆ, ଦକ୍ଷିଣ ଆଫ୍ରିକା ଆଦି ଦେଶର ଏମ୍ପି ପ୍ରତିନିଧି ରହିଛନ୍ତି। ପ୍ରତିନିଧିମାନେ ରବିବାର ପ୍ରଥମେ କୋଣାର୍କ ସୂର୍ଯ୍ୟମନ୍ଦିର ଓ ପରେ ପୁରୀର ଶ୍ରୀମନ୍ଦିର ପରିଦର୍ଶନ କରିଥିଲେ। ସେମାନଙ୍କ ଜୟ ଜଗନ୍ନାଥ ଧ୍ୱନିରେ ଶ୍ରୀମନ୍ଦିର ନିକଟ ଅଞ୍ଚଳ କମ୍ପିଉଠିଥିଲା। ରାଜରାଜୁଡ଼ା ଅମଳର କାରିଗରି ତଥା ସେତେବେଳେ ବିନା ଅତ୍ୟାଧୁନିକ ଯନ୍ତ୍ରପାତିରେ ଏତେ ସୁନ୍ଦର କାରୁକାର୍ଯ୍ୟ ଭରା ଐତିହ୍ୟ ଏହି ବିଦେଶୀ ପ୍ରତିନିଧିମାନଙ୍କୁ ଚକିତ କରିଛି। ଗଣତନ୍ତ୍ର ଶାସନ ବ୍ୟବସ୍ଥା ଉପରେ ଅଧିକ ଉପଲବ୍ଧି ହାସଲ ସହ ସେମାନେ ବିଭିନ୍ନ ଐତିହ୍ୟ ସ୍ଥାନ ବୁଲି ଅଭିଭୂତ ହୋଇଛନ୍ତି। ଓଡ଼ିଶାର ଆତିଥେୟତା, ସଂସ୍କୃତି ଓ କଳାକୃତି ବିଶେଷ ଆକର୍ଷିତ କରିବା ସହ କୋଣାର୍କ ଓ ଶ୍ରୀମନ୍ଦିରର କାରୁକାର୍ଯ୍ୟ ଭରା ଐତିହ୍ୟ ଅତୁଳନୀୟ ବୋଲି ସେମାନେ କହିଛନ୍ତି। ଭାରତୀୟ ଗଣତନ୍ତ୍ର ବିଶ୍ୱର ସର୍ବଶ୍ରେଷ୍ଠ ଗଣତନ୍ତ୍ର। ଏହାର ସଂସ୍କୃତି ଓ ପରମ୍ପରା ଅତୁଳନୀୟ। ବିଶେଷକରି ଓଡ଼ିଶାରେ ରହିଛି ପ୍ରକୃତିର ଅପରୂପ ସମ୍ଭାର। ଏଭଳି ସ୍ଥାନ ଅଦ୍ୱିତୀୟ। ଓଡ଼ିଶାର ଲୋକଙ୍କ ସ୍ମିତହାସ୍ୟ ଭରା କଥା ଓ ଆତିଥେୟତା ଅଭିଭୂତ କରିଛି। ବିଭିନ୍ନ ଐତିହ୍ୟ ପରିଦର୍ଶନ ପରେ ଏକ ନିଆରା ଅନୁଭୂତି ମିଳିଛି ବୋଲି ଜି -୨୦ ଅନ୍ତର୍ଗତ ୮ଟି ଦେଶର ପ୍ରତିନିଧି ମଣ୍ଡଳୀ ପୁରୀ ଗସ୍ତ ଅବସରରେ ପ୍ରତିକ୍ରିୟା ରଖିଛନ୍ତି। ସବୁ ଦେଶରେ ଭିନ୍ନ ସଂସ୍କୃତି ଓ ପରମ୍ପରା ରହିଛି। ଇଷ୍ଟର ଭଳି ପର୍ବ ସାରା ବିଶ୍ୱରେ ବିଦିତ, ମାତ୍ର ଓଡ଼ିିଶାର ପର୍ବ ଓ ପାଳନ ବିଧି ସ୍ବତନ୍ତ୍ର ବୋଲି ପ୍ରତିନିଧିମାନେ କହିଛନ୍ତି। ଏହି ଗସ୍ତ ଅବସରରେ ଅତିରିକ୍ତ ଜିଲାପାଳ ଦିଲ୍ଲୀପ ମହାପାତ୍ର, ପର୍ଯ୍ୟଟନ ଅଧିକାରୀ ଅମୀୟ ସେଠୀ, କୋଣାର୍କ ପ୍ରତ୍ନତତ୍ତ୍ୱ ସଂଗ୍ରହାଳୟର ଅଧିକାରୀ ପ୍ରତାପ ନାୟକ ପ୍ରମୁଖ ଉପସ୍ଥିତ ଥିଲେ।