ଭୁବନେଶ୍ୱର, ୨୫।୬(ବ୍ୟୁରୋ): ଓଡ଼ିଶାରେ ଦିନକୁ ଦିନ ବୃଦ୍ଧି ପାଉଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ପ୍ରଥମେ ରଥଯାତ୍ରା ବନ୍ଦ ନେଇ ସୁପ୍ରିମ୍କୋର୍ଟ ଘୋଷଣା କରିଥିଲେ। ହେଲେ ପରବର୍ତ୍ତୀ ପର୍ଯ୍ୟୟରେ ବିନା ଭକ୍ତରେ ଘୋଷଯାତ୍ରା କରିବା ନେଇ ରାୟ ପ୍ରକାଶ ପାଇଥିଲା। ଏହି କ୍ରମରେ ମଙ୍ଗଳବାର ବିନା ଭକ୍ତରେ ମହାପ୍ରଭୁଙ୍କ ଘୋଷଯାତ୍ରା ଆରମ୍ଭ ହୋଇଥିଲା। ସେବାୟତ ଏବଂ ସୁରକ୍ଷାକର୍ମୀମାନେ ମହାପ୍ରଭୁଙ୍କ ରଥକୁ ଟାଣି ଶରଧାବାଲିକୁ ନେଇଥିଲେ। ପ୍ରଥମ ଥର ପାଇଁ ଖାଲି ପାଦରେ ସେବାୟତମାନଙ୍କୁ ରଥଟାଣୁଥିବା ଦେଖିବାକୁ ମିଳିଥିଲା। ଏସବୁ ଭିତରେ ସୋସିଆଲ ମିଡିଆରେ ଭାଇରାଲ ହେଉଛି ଜଣେ ସେବାୟତଙ୍କ ଫଟୋ। ସେ ହେଉଛନ୍ତି ଅନୀଲ ଗୋଚ୍ଛିକାର। ସେ ରଥ ଟାଣୁଥିବାର ଏକାଧିକ ଫଟୋ ଏବେ ଭାଇରାଲ ହେଉଛି। ତାଙ୍କ ସୁଢ଼ଳ ଚେହେରା ସମସ୍ତଙ୍କୁ ଆକର୍ଷିତ କରୁଛି।
ତେବେ ଅନୀଲ ବଡି ବିଲଡିଂ କରନ୍ତି। ଜାତୀୟ ଏବଂ ଅନ୍ତର୍ଜାତୀୟସ୍ତରରେ ସେ ଅନେକ ସଫଳତା ପାଇଛନ୍ତି। ଜାତୀୟ ଚାମ୍ପିଅନ୍ସିପ୍ରେ ସେ ସ୍ବର୍ଣ୍ଣ ଓ ରୋପ୍ୟ ପଦକ ପାଇଥିବା ବେଳେ ୨୦୧୬ରେ ଦୁବାଇରେ ଆୟୋଜିତ ଅନ୍ତର୍ଜାତୀୟ ପ୍ରତିଯୋଗିତାରେ ସ୍ବର୍ଣ୍ଣ ଜିତିଥିବା ଜଣାପଡ଼ିଛି। ଏପରିକି ସେ ୫ଥର ମିଷ୍ଟର ଓଡ଼ିଶା ଉପାଧି ବି ଜିତିସାରିଛନ୍ତି।
ସେବାୟତ ପରିବାରରେ ସେ ଜନ୍ମଲାଭ କରିଥିଲେ ହେଁ ସେ ପିଲାଟିବେଳୁ ସ୍ବାସ୍ଥ୍ୟ ପ୍ରତି ଯତ୍ନବାନ ଥିଲେ। ୨୦୧୨ ମସିହାରେ ମିଷ୍ଟର ଓଡ଼ିଶା ହେବା ପରଠାରୁ ସେ ଆଉ ପଛକୁ ଚାହିଁନାହାନ୍ତି। ଏବେ ତାଙ୍କ ଫଟୋ ଭାଇରାଲ ହେବା ପରେ ତାଙ୍କୁ ଅନେକ ପ୍ରଶଂସା କରୁଛନ୍ତି। ଏପରିକି ତାଙ୍କୁ ଦକ୍ଷିଣ ଭାରତୀୟ ସିନେମାର ବାହୁବଳୀଙ୍କ ସହ ତୁଳନା କରାଯାଉଛି।