ପୁରୀ ଅଫିସ,୧୦।୧୨: ନିଳାଦ୍ରୀ ଭକ୍ତନିବାସ ପରିସରରେ ଶୁକ୍ରବାର ଶ୍ରୀମନ୍ଦିର ମୁଖ୍ୟ ପ୍ରଶାସକ କ୍ରିଷନ୍ କୁମାରଙ୍କ ଅଧ୍ୟକ୍ଷତାରେ ଛତିଶା ନିଯୋଗ ଓ ନୀତି ସବ୍କମିଟି ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ଆସନ୍ତା ମାସ ପାଇଁ ଶ୍ରୀମନ୍ଦିର ନୀତିକାନ୍ତି ଏବଂ ଏସ୍ଓପିକୁ ନେଇ କିଛି ପରିବର୍ତ୍ତନ ଉପରେ ମୋହର ବାଜିଛି। ପହିଲି ଭୋଗ, ମକର ସଂକ୍ରାନ୍ତି ଓ ପୂର୍ଣ୍ଣିମାର ନୀତିକାନ୍ତି ମଧ୍ୟ ଚୂଡ଼ାନ୍ତ ହୋଇଛି। ବୈଠକ ପରେ ମୁଖ୍ୟ ପ୍ରଶାସକ ସୂଚନା ଦେଇ କହିଛନ୍ତି, ଗହଳିକୁ ଦୃଷ୍ଟିରେ ରଖି ଜାନୁୟାରୀ ୧ତାରିଖ ନୂଆବର୍ଷ ସମେତ ୩ ଦିନ ସର୍ବସାଧାରଣ ଦର୍ଶନ ବନ୍ଦ ରହିବ। ସେହିପରି ରବିବାର ଗୁଡ଼ିକରେ ମଧ୍ୟ ପୂର୍ବଭଳି ଦର୍ଶନ ବନ୍ଦ ରହିବ।
ଏ ନେଇ ମୁଖ୍ୟ ପ୍ରଶାସକ ଆହୁରି କହିଛନ୍ତି, ପୂର୍ବରୁ ବନକଲାଗି ନୀତି ସମୟରେ ଦର୍ଶନ ୪ଘଣ୍ଟା ବନ୍ଦ ରହୁଥିଲା। କିନ୍ତୁ ଏଣିକି ଶ୍ରଦ୍ଧାଳୁମାନେ ବନକଲାଗି ନୀତି ସମୟରେ ଶ୍ରୀମନ୍ଦିରରେ ପ୍ରବେଶ କରିପାରିବେ। ତେବେ ସେହି ସମୟରେ ମହାପ୍ରଭୁଙ୍କ ଦର୍ଶନ ମିଳିବ ନାହିଁ। ଜୟବିଜୟ ଦ୍ୱାର ଓ ବେହରଣ ଦ୍ୱାର ବନ୍ଦ ରହିବ, ମାତ୍ର ଅନ୍ୟ ପାର୍ଶ୍ୱ ଦେବାଦେବୀଙ୍କ ଦର୍ଶନ ମିଳିପାରିବ। ଶ୍ରଦ୍ଧାଳୁମାନେ ମହାପ୍ରସାଦ ସେବନ ଓ ଗରୁଡ଼ସ୍ତମ୍ଭ ଦର୍ଶନ କରିପାରିବେ। କୋଭିଡ୍ ସଂକ୍ରମଣକୁ ଦୃଷ୍ଟିରେ ରଖି ପୂର୍ବଭଳି ଆସନ୍ତା ମାସର ସମସ୍ତ ରବିବାର ସାଧାରଣ ଦର୍ଶନ ବନ୍ଦ ରହିବ। ଏଥିସହ ଗହଳିକୁ ଦୃଷ୍ଟିରେ ରଖି ଡିସେମ୍ବର ୩୧, ଜାନୁୟାରୀ ୧ତାରିଖ ନୂଆବର୍ଷ ଏବଂ ୨ ତାରିଖରେ ସର୍ବସାଧାରଣ ଦର୍ଶନ ବନ୍ଦ ରହିବ। ଡିସେମ୍ବର ୨୫ ସମେତ ଅନ୍ୟ ଦିନରେ ଦର୍ଶନ ବ୍ୟବସ୍ଥା ଚାଲୁ ରହିବ।
