ପୁରୁଷୋତ୍ତମପୁର,୨ା୯(ସିମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଏନ୍ଏସିରେ ଏକ ପ୍ରକାରର ରାଜନୈତିକ ଉଷ୍ମତା ଆରମ୍ଭ ହୋଇଛି। ଯାହାକି ଅଧ୍ୟକ୍ଷା ପ୍ରିୟଙ୍କା ଗୌଡ଼ଙ୍କୁ ଗାଦିଚ୍ୟୁତ ଲାଗି ଅନାସ୍ଥା ପ୍ରସ୍ତାବ ନେଇ ସୋମବାର ଉପାଧ୍ୟକ୍ଷ କୃଷ୍ଣଚନ୍ଦ୍ର ପଣ୍ଡାଙ୍କ ସମେତ ଓ ୮ ଜଣ କାଉନସିଲର ଗଞ୍ଜାମ ଜିଲା ଦିବ୍ୟଜ୍ୟୋତି ପରିଡ଼ାଙ୍କଠାରେ ଫେରାଦ ହୋଇଛନ୍ତି। ୧୪ଟି ଓ୍ବାର୍ଡ ବିଶିଷ୍ଟ ଏହି ପୁରୁଷୋତ୍ତମପୁର ଏନ୍ଏସିରେ ଗତ ପୌର ନିର୍ବାଚନରେ ଅଧ୍ୟକ୍ଷା ପଦବୀଟି ସ୍ବାଧୀନ ପ୍ରାର୍ଥୀଙ୍କ ହାତକୁ ଯାଇ ପ୍ରିୟଙ୍କା ଗୌଡ଼ ଅଧ୍ୟକ୍ଷା ଭାବରେ ନିର୍ବାଚିତ ହୋଇଥିଲେ। ଓ୍ବାର୍ଡ ନଂ ୮ଟି ଜନଜାତିବର୍ଗଙ୍କ ଲାଗି ସଂରକ୍ଷିତ ରହିଥିବା ହେତୁ ଏଠାରେ କେହି ଜନଜାତିବର୍ଗର ବ୍ୟକ୍ତି ନ ଥିବାରୁ ଏହି ଓ୍ବାର୍ଡରେ ନିର୍ବାଚନ ହୋଇ ନ ପାରି କାଉନସିଲର ପଦବୀଟି ଖାଲି ପଡ଼ିଥିବା ବେଳେ ଅନ୍ୟ ୧୩ଟି ଓ୍ବାର୍ଡ ମଧ୍ୟରୁ ଓ୍ବାର୍ଡ ନଂ ୪ରେ ଅଧ୍ୟକ୍ଷାଙ୍କ ସ୍ବାମୀ ଅଶୋକ କୁମାର ମହାକୁଡ ଓ ୧ ନଂ ଓ୍ବାର୍ଡରେ ଭବାନୀଶଙ୍କର ନାହାକ, ୩ ନଂ ଓ୍ବାର୍ଡରେ ପ୍ରମୋଦକୁମାର ଆଚାରୀ ସ୍ବାଧୀନ ପ୍ରାର୍ଥୀ ଭାବରେ ନିର୍ବାଚିତ ହୋଇ
୧୦ଟି ଓ୍ବାର୍ଡରେ ବିଜେଡି ବିଜୟୀ ଲାଭ କରି ଉପାଧ୍ୟକ୍ଷ ପଦବୀକୁ ହାତେଇ କୃଷ୍ଣଚନ୍ଦ୍ର ପଣ୍ଡା ଉପାଧ୍ୟକ୍ଷ ହୋଇଥିଲେ। କାଉନସିଲରମାନଙ୍କୁ ଅଧ୍ୟକ୍ଷା ଓ ତାଙ୍କ ସ୍ବାମୀ କାଉନସିଲର ଅଶୋକକୁମାର ମହାକୁଡ଼ ଅଣଦେଖା କରୁଥିବା ସହ ନିଜ ଇଚ୍ଛାମୁତାବକ ବେଆଇନ ଭାବେ କାର୍ଯ୍ୟ କରୁଥିବା ଏନ୍ଏସିର ନିୟମ ଅନୁସାରେ ଅଧ୍ୟକ୍ଷା ନିୟମିତ ବୈଠକ ନ କରିବା, ବୈଠକରେ ଗୃହୀତ ଖସଡ଼ା ପଠନ ଓ ଦୃଢ଼ୀକରଣ କରୁ ନ ଥିବା ,ଆୟବ୍ୟୟ ସମୀକ୍ଷା ନ କରିବା, ମାତ୍ରାଧିକ ଅର୍ଥ ବ୍ୟୟକରି ରାଜକୋଷ ଅର୍ଥ ହରିଲୁଟ୍ କରିବା, କାଉନସିଲର ଅଧ୍ୟକ୍ଷା ଦୁର୍ବ୍ୟବହାର କରି ମନୋମୁଖୀ କାର୍ଯ୍ୟ କରୁଥିବା ଓ ରିଜୋଲେଶନ କପି ପ୍ରଦାନ ନ କରି ପରିଷଦରେ ପାରିତ ହୋଇଥିବା କାର୍ଯ୍ୟଖସଡ଼ାଗୁଡ଼ିକ ଚଞ୍ଚକତା କରି ନିଜ ମନ ମୁତାବକ ପାରିତ ପ୍ରସ୍ତାବକୁ ବଦଳାଇ ଖସଡ଼ା ପ୍ରସ୍ତୁତ କରିବା ସହ ଉନ୍ନୟନମୂଳକ କାର୍ଯ୍ୟକୁ ଟେଣ୍ଡର ନକରି ନିଜ ସମ୍ପର୍କୀୟମାନଙ୍କ ମାଧ୍ୟମରେ ନିମ୍ନମାନର କାର୍ଯ୍ୟ କରି ଅର୍ଥ ହରିଲୁଟ୍ କରିବା ନେଇ କାଉନସିଲରମାନେ ଅସନ୍ତୋଷ ବ୍ୟକ୍ତ କରି ଜିଲାପାଳଙ୍କଠାରେ ଲିଖିତ ଅଭିଯୋଗ କରି ଅନାସ୍ଥା ପ୍ରସ୍ତାବ ଲାଗି ଦାବି କରିଛନ୍ତି।
ସୂଚନାଯୋଗ୍ୟ, ଏହି କାରଣକୁ ନେଇ ଗତ ବର୍ଷ ସ୍ବାୟତ୍ତ୍ୱ ଶାସନ ଦିବସରେ ବୈଠକସ୍ଥଳରେ ଧାରଣା ଦେଇ ହୋ-ହଲ୍ଲା କରି ବୈଠକକୁ ବର୍ଜନ କରି ଚାଲିଯାଇଥିବା ବେଳେ ଚଳିତବର୍ଷ ମଧ୍ୟ ସ୍ବାୟତ୍ତ୍ୱ ଶାସନ ଦିବସ ପାଳନକୁ ବର୍ଜନ କରିଥିଲେ। ଏପରିକି ଏଠାରେ ବହୁ ଦୁର୍ନୀତି ଚାଲିଥିବା ନେଇ ଅଭିଯୋଗର ସ୍ବର ଉଠିବା ସହ ଏହାକୁ ନେଇ ଲୋକପାଳଙ୍କଠାରେ ରିଟ୍ପିଟିଶନ ଦାଖଲ ହୋଇଛି। ଲୋକପାଳଙ୍କ ନିର୍ଦ୍ଦେଶ ଅନୁଯାୟୀ ୧୨୦ଟି କିଛି ଗୁରୁତ୍ୱପୂର୍ଣ୍ଣ ଫାଇଲକୁ ଭିଜିଲାନ୍ସ ନେଇ ତଦନ୍ତ ପରିସରରେ ମଧ୍ୟ ରଖିଛି।