ଜଗତ୍ସିଂହପୁର, ୧୦।୩(ପ୍ରମୋଦ କୁମାର ନାୟକ)ଆଜାଦୀ କା ଅମୃତ ମହୋତ୍ସବ ଅବସରରେ କେନ୍ଦ୍ର ସରକାର ଖାଉଟିଙ୍କୁ ରିହାତି ଦରରେ ଚାଉଳ, ଚଣା ଡାଲି, ଅଟା, ଚିନି, ତେଲ ଓ ପିଆଜ ଯୋଗାଇବା ପାଇଁ ନିଷ୍ପତ୍ତି ନେଇଛନ୍ତି। ନାଫେଡ୍ (ନ୍ୟାଶନାଲ ଆଗ୍ରିକଲଚରାଲ କୋ-ଅପରେଟିଭ ମାର୍କେଟିଂ ଫେଡେରେଶନ ଅଫ ଇଣ୍ଡିଆ) ଏବଂ ଏନ୍ସିସିଏଫ୍ (ନ୍ୟାଶନାଲ କୋ-ଅପରେଟିଭ କଞ୍ଜ୍ୟୁମର୍ସ ଫେଡେରେଶନ ଅଫ ଇଣ୍ଡିଆ) ପକ୍ଷରୁ ବ୍ୟକ୍ତିଗତ ଏବଂ ମୋବାଇଲ ଆଉଟଲେଟ୍ (ଭ୍ୟାନ) ଜରିଆରେ ଏସବୁ ଖାଦ୍ୟ ସାମଗ୍ରୀ ଯୋଗାଇବା ପାଇଁ ସ୍ଥିର ହୋଇଛି। ଏହାବାଦ୍ ଏହି ସାମଗ୍ରୀ ଲୋକଙ୍କୁ ଯୋଗାଯିବା ପାଇଁ ଅନ୍ୟ ରିଟେଲ ଆଉଟଲେଟ୍ ଏବଂ ଇ-କମର୍ସ ପ୍ଲାଟ୍ଫର୍ମକୁ ସମ୍ପ୍ରସାରିତ କରାଯାଇଛି। ଚାଉଳ ବିଶେଷକରି ୫ ଓ ୧୦ କିଲୋଗ୍ରାମର ପ୍ୟାକେଟ୍ ରହିଛି। ଏହା ବଜାର ଦରଠାରୁ କମ୍ ଦାମରେ ଅର୍ଥାତ୍ କିଲୋଗ୍ରାମ ପ୍ରତି ଦର ସର୍ବାଧିକ ୨୯ ଟଙ୍କା ଧାର୍ଯ୍ୟ କରାଯାଇଛି। ସେହିପରି ଭାରତ ଅଟା ୬ ଓ ୧୦ କିଲୋଗ୍ରାମ ପ୍ୟାକେଟରେ ବିକ୍ରି ହେଉଛି। ଏହାର କିଲୋପ୍ରତି ଦର ୨୭.୫୦ ଟଙ୍କା ଧାର୍ଯ୍ୟ କରାଯାଇଛି। ସେହିପରି ଚଣା ଡାଲି ୧ କିଲୋଗ୍ରାମ ପ୍ୟାକେଟ୍ରେ ଉପଲବ୍ଧ। ଏହାର କିଲୋଗ୍ରାମ ପ୍ରତି ଦର ୬୦ ଟଙ୍କା ଧାର୍ଯ୍ୟ କରାଯାଇଛି। କିନ୍ତୁ ୩୦ କି.ଗ୍ରା. ପ୍ୟାକେଟ୍ ନେଲେ କିଲୋଗ୍ରାମ ପ୍ରତି ଦର ୫୫ ଟଙ୍କାକୁ ହ୍ରାସ କରାଯିବ ବୋଲି କୁହାଯାଇଛି। ପିଆଜ କିଲୋଗ୍ରାମ ପ୍ରତି ଦର ୨୫ ଟଙ୍କା ଧାର୍ଯ୍ୟ କରାଯାଇଛି। ପିଏମ୍ଜିକେଏୱୋଇ (ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା)ରେ ପ୍ରତ୍ୟେକ ଏହାର ଫାଇଦା ପାଇପାରିବେ ବୋଲି ବ୍ୟାପକ ପ୍ରଚାର ଓ ପ୍ରସାର କରାଯାଉଛି। ଏହି ଅନୁଯାୟୀ ଶନିବାର ପ୍ରଥମ ଥର ପାଇଁ ଜଗତ୍ସିଂହପୁର ସହରରେ ଏହା ବିକ୍ରି ଆରମ୍ଭ କରାଯାଇଛି।
ଜିଲାପାଳଙ୍କ କାର୍ଯ୍ୟାଳୟ ପରିସର ପଡିଆରେ ଅପରାହ୍ନରେ ୨ଟି ମୋବାଇଲ ଭ୍ୟାନ୍ ଏସବୁ ସାମଗ୍ରୀ ନେଇ ପହଞ୍ଚତ୍ଲା ପରେ ନିଆରା ପରିବେଶ ସୃଷ୍ଟି ହୋଇଥିଲା। ଭ୍ୟାନ୍ରେ ଥିବା କର୍ମଚାରୀ ଧାଡିରେ ଆସି ସାମଗ୍ରୀ କିଣି ନେବାକୁ ଅନୁରୋଧ କରିଥିଲେ ବି ଶୃଙ୍ଖଳା ଦେଖିବାକୁ ମିଳି ନ ଥିଲା। କାଳେ ସାମଗ୍ରୀ ସରିଯିବ ଆଶଙ୍କାରେ ଲୋକେ କିଣିବା ପାଇଁ ଡହଳବିକଳ ହୋଇଥିଲେ। ଏପରି କି ଚଢାମଢ଼ା ପରିସ୍ଥିତି ଉପୁଜିଥିଲା। ଅଟା ମାତ୍ର ୧୦ ମିନିଟ୍ ଭିତରେ ସରି ଯାଇଥିଲା। ଚାଉଳ ଓ ଡାଲି ବିକ୍ରି ସମୟରେ ଲୋକେ ପାଟିତୁଣ୍ଡ କରିବାକୁ ପଛାଇ ନ ଥିଲେ। କାହିଁକି ବିଳମ୍ବ ହେଉଛି ବୋଲି ଯୁକ୍ତି ବାଢି ଅନେକେ ଗାଡି ଭିତରେ ଅଖାରେ ଥିବା ସାମଗ୍ରୀ ପ୍ୟାକେଟ୍ ଟଣାଓଟରା କରିଥିଲେ। ପରିସ୍ଥିତି ଏଭଳି ହୋଇଥିଲା ଯେ, ମୋବାଇଲ ଭ୍ୟାନ ସାମଗ୍ରୀ ନ ଦେଇ ଚାଲି ଯିବାକୁ ଚେଷ୍ଟା କରିଥିଲା। କିନ୍ତୁ କେତେଜଣ ଏହି ଗାଡିରେ ଓହଳିଥିଲେ ସୁଦ୍ଧା ଓହ୍ଲାଇ ନ ଥିଲେ। ଏହିଭଳି କିଛି ଦୂର ଗଲାପରେ ଏହି ମୋବାଇଲ ଭ୍ୟାନ୍ ଅଟକି ସେମାନଙ୍କୁ ସାମଗ୍ରୀ ଦେଇ ପୁଣି ପଳାଇଥିଲା। ପୋଲିସ ସୁରକ୍ଷା ସତ୍ତ୍ବେ ଲୋକେ ବିଶୃଙ୍ଖଳା କରୁଥିବାରୁ ଆଗକୁ ପରିସ୍ଥିତି କେଉଁ ମୋଡ ନେଉଛି ତାହା ଦେଖିବା ବାକି ରହିଲା। ଏ ସମ୍ପର୍କରେ ସ୍ଥାନୀୟ ଅଞ୍ଚଳର କେତେଜଣ ବ୍ୟକ୍ତି ପ୍ରତିକ୍ରିୟାରେ କହିଛନ୍ତି, ଆରମ୍ଭରୁ ଯଦି ଏଭଳି ବିଶୃଙ୍ଖଳା ହେଲାଣି ଆଗାମୀ ଦିନରେ ପରିସ୍ଥିତି ଜଟିଳ ରୂପ ନେଇପାରେ। ସମ୍ପ୍ରତି ଅଟା କିଲୋଗ୍ରାମ ପ୍ରତି ଦର ୪୦ ଟଙ୍କା ଥିବା ବେଳେ ମୋବାଇଲ ରିଟେଲ କାଉଣ୍ଟରରେ ମାତ୍ର ୨୭.୫୦ ଟଙ୍କାରେ ମିଳିପାରୁଛି। ସେହିପରି ଚାଉଳ, ଡାଲି ଦର ମଧ୍ୟ କମ୍। ତେଣୁ ଲୋକେ ଶସ୍ତାରେ ଏହା ପାଇବା ପାଇଁ ଭିଡ ଜମାଉଛନ୍ତି। ଆଗକୁ ଯେପରି ଶୃଙ୍ଖଳାର ସହ ଲୋକେ ସାମଗ୍ରୀ କିଣିପାରିବେ ସେଥିପ୍ରତି ପୋଲିସ ଓ ପ୍ରଶାସନ ବିଶେଷ ଦାୟିତ୍ୱବାନ ହେବାକୁ ଅନୁରୋଧ କରାଯାଇଛି।