ଶ୍ରୀନଗର,୮।୧୧: ଜମ୍ମୁ-କଶ୍ମୀରକୁ ସ୍ବତନ୍ତ୍ର ରାଜ୍ୟ ମାନ୍ୟତା ପ୍ରଦାନକାରୀ ସମ୍ବିଧାନର ଅନୁଚ୍ଛେଦ ୩୭୦ ଫେରାଇ ଆଣିବା ପାଇଁ କେନ୍ଦ୍ରଶାଶସିତ ଅଞ୍ଚଳର ବିଧାନସଭାରେ ସଂକଳ୍ପନାମା ପାରିତ ହେବାର ଦିନକ ପରେ ଗୃହରେ ହାଇଡ୍ରାମା ଦେଖିବାକୁ ମିଳିଛି। ଆଜି ଗୃହରେ ପୁଣି ଥରେ ଏକ ବଡ଼ ଧରଣର ଗଣ୍ଡଗୋଳ ହୋଇଥିଲା। ମାର୍ଶଲ ଇଞ୍ଜିନିୟର ରସିଦଙ୍କ ଭାଇ ତଥା ଆୱାମୀ ଇତେହାଦ ପାର୍ଟି ବିଧାୟକ ଖୁର୍ସିଦ ଶେଖଙ୍କୁ ଟାଣି ନେଇଥିଲେ।
ଗୃହରେ ଧାରା ୩୭୦ ବିରୋଧରେ ଆଣିଥିବା ପ୍ରସ୍ତାବକୁ ଭାଜପା ନିରନ୍ତର ବିରୋଧ କରୁଛି। ଆଜି ଉତ୍ତେଜନା ଆରମ୍ଭ ହେବା ପରେ ପିଡିପି ବିରୋଧରେ ସ୍ଲୋଗାନ ଦିଆଯାଇଥିଲା। ଅଧିବେଶନ ଆରମ୍ଭ ହେବା ମାତ୍ରେ ଭାଜପା ବିଧାୟକମାନେ ଠିଆ ହୋଇ ପିଡିପି ଏବଂ ବାଚସ୍ପତିଙ୍କ ବିରୋଧରେ ସ୍ଲୋଗାନ ଦେଇ ବିରୋଧ ଆରମ୍ଭ କରିଥିଲେ।
ଏହି ପ୍ରସଙ୍ଗରେ ବିରୋଧୀ ଭାଜପା ସଦସ୍ୟମାନେ ଗୃହର ମଧ୍ୟଭାଗକୁ ଯାଇ ପ୍ରବଳ ହଟ୍ଟଗୋଳ କରିଥିଲେ। ସେମାନେ ଉକ୍ତ ସଙ୍କଳ୍ପନାମାକୁ ବେଆଇନ ଦର୍ଶାଇ ଏହାକୁ ପ୍ରତ୍ୟାହାର କରିବାକୁ ଦାବି କରିଥିଲେ। ତେବେ ଗୃହରେ ଗୃହୀତ ହୋଇସାରିଥିବା କୌଣସି ପ୍ରସ୍ତାବକୁ ପ୍ରତ୍ୟାହାର କରିବା ପାଇଁ ବାଚସ୍ପତି ଅବ୍ଦୁଲ ରହିମ ରାଥେର ତାଙ୍କ ନିକଟରେ କ୍ଷମତା ନ ଥିବା କହିଥିଲେ। ଏଥିସହ ଭାଜପା ସଦସ୍ୟଙ୍କୁ ଗୃହରୁ ହଟାଇବା ପାଇଁ ମାର୍ଶଲଙ୍କୁ ନିର୍ଦ୍ଦେଶ ଦେଇଥିଲେ।
ହାଇଡ୍ରାମା ଭିତରେ ପିପୁଲ୍ସ ଡେମୋକ୍ରାଟିକ୍ ପାର୍ଟି (ପିଡିପି) ଏବଂ ପିପୁଲ୍ସ କନ୍ଫରେନ୍ସର ବିଧାୟକମାନେ ଅନୁଚ୍ଛେଦ ୩୭୦ ଏବଂ ୩୫ଏକୁ ତୁରନ୍ତ ସମ୍ବିଧାନରେ ମୂଳ ରୂପରେ ପୁନଃ ଅବସ୍ଥାପିତ କରାଯାଉ ବୋଲି ଦାବି କରିଥିଲେ। ବିରୋଧୀ ଦଳ ନେତା ସୁନୀଲ ଶର୍ମା ସଂକଳ୍ପନାମା ଉପରେ କହୁଥିବାବେଳେ ଆଓ୍ବାମୀ ଇତ୍ତେହାଦ୍ ପାର୍ଟି ନେତା ଶେଖ୍ ଖୁର୍ସିଦ ଗୃହ ମଧ୍ୟଭାଗକୁ ଡେଇଁ ପଡ଼ିଥିଲେ। ଖୁର୍ସିଦ ଧରିଥିବା ବ୍ୟାନରରେ ଲେଖାଥିଲା ୩୭୦ ଓ ୩୫ଏକୁ ପୁନଃ ଅବସ୍ଥାପିତ କରାଯାଉ। ଭାଜପା ସଦସ୍ୟମାନେ ମଧ୍ୟ ମଧ୍ୟଭାଗକୁ ଡେଇପଡ଼ିଥିଲେ। ସେମାନେ ଖୁର୍ସିଦଙ୍କ ହାତରୁ ପତାକା ଛଡ଼ାଇନେଇ ଚିରିଦେଇଥିଲେ। ପିପୁଲ୍ସ କନ୍ଫରେନ୍ସ ସଦସ୍ୟ ସଜାଦ ଲୋନ୍ ଏହି ପ୍ରସଙ୍ଗରେ ହସ୍ତକ୍ଷେପ କରିବାକୁ ଆସିବାବେଳକୁ ଧସ୍ତାଧସ୍ତି ଓ ଠେଲାପେଲା ହୋଇଥିଲା।