କୋରାପୁଟ,୩୧।୩(ସ୍ବ.ପ୍ର.): କିରଣ୍ଡଳରୁ ବିଶାଖାପାଟଣା ଯାଉଥିବା ପାସେଞ୍ଜର ଟ୍ରେନ୍ରେ ଏକ ଅଭାବନୀୟ ଘଟଣା ଘଟିଛି। କେତେକ ଯାତ୍ରୀ ଚଳନ୍ତା ଟ୍ରେନ୍ରୁ ଜଣେ ଯାତ୍ରୀଙ୍କୁ ତଳକୁ ଠେଲି ଦେଇଥିବା ଅଭିଯୋଗ ହୋଇଛି। ଫଳରେ ଟ୍ରେନ୍ ଚକ ତଳେ ପଡ଼ି ଯୁବକଙ୍କ ଗୋଡ଼ କଟିଯାଇଛି। ସେ ହେଲେ ଜଗଦଳପୁର ଅଞ୍ଚଳର ଜାଭେଦ ମହମ୍ମଦ ବୋଲି ଜଣାପଡିଛି। ଜାଭେଦଙ୍କୁ ଗୁରୁତର ଅବସ୍ଥାରେ କୋରାପୁଟ ସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲରେ ଭର୍ତ୍ତି କରାଯାଇଛି। ଏନେଇ ଜିଆର୍ପି ପୋଲିସ ଘଟଣାର ତଦନ୍ତ ଆରମ୍ଭ କରିଛି।
ମିଳିଥିବା ସୂଚନା ମୁତାବକ, କିରଣ୍ଡାଳ-ବିଶାଖାପାଟଣା ପାସେଞ୍ଜର ଟ୍ରେନ ଜଗଦଳପୁରରୁ ବିଶାଖାପାଟଣା ଯାଉଥିଲା। ହେଲେ ପାଡୁଆ ଷ୍ଟେଶନ ପୂର୍ବରୁ ଜାଭେଦଙ୍କ ସହ ଟ୍ରେନ୍ରେ ଥିବା କେତେକ ଯାତ୍ରୀଙ୍କ ମଧ୍ୟରେ କୌଣସି କାରଣକୁ ନେଇ ବଚସା ହୋଇଥିଲା। ପରବର୍ତ୍ତୀ ସମୟରେ ଜାଭେଦ ପାଡୁଆ ଷ୍ଟେଶନରେ ଓହ୍ଲାଇବା ପାଇଁ ଟ୍ରେନ୍ ଗେଟ୍ ନିକଟରେ ବସି ରହିଥିଲେ। ସେତିକିବେଳେ ପୂର୍ବରୁ ପାଟିତୁଣ୍ଡ କରିଥିବା କେତେକ ଯାତ୍ରୀ ଜାଭେଦଙ୍କ ପାଖକୁ ଆସି ପଛରୁ ଠେଲିଦେଇଥିଲେ। ଜାଭେଦ ଟ୍ରେନ୍ରୁ ଖସିପଡି ଚକ ତଳେ ପଡି ଯାଇଥିଲେ। ଫଳରେ ଜାଭେଦଙ୍କ ଏକ ଗୋଡ କଟିଯାଇଥିଲା। ସ୍ଥାନୀୟ କେତେକ ବ୍ୟକ୍ତି ଜାଭେଦଙ୍କୁ ଉଦ୍ଧାର କରି ପ୍ରଥମେ ନନ୍ଦପୁର ମାଡିକାଲରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ହେବାରୁ ତାଙ୍କୁ କୋରାପୁଟ ମେଡିକାଲକୁ ସ୍ଥାନାନ୍ତର କରାଯାଇଥିଲା।