ମସ୍କୋ,୨୫।୩ : ଯୁଦ୍ଧ ଅପରାଧ ଅଭିଯୋଗରେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବିରୋଧରେ ଅନ୍ତର୍ଜାତୀୟ ଅପରାଧିକ କୋର୍ଟ (ଆଇସିସି) ଗିରଫ ୱାରେଣ୍ଟ ଜାରି କରିଛି। ତେବେ ଏହାର ପରଦିନ ପୁଟିନ ୟୁକ୍ରେନ ସହରର ମାରିଓପୋଲ ରାସ୍ତାରେ ବୁଲୁଥିବାର ନଜର ଆସିଥିଲେ।
ଏହାକୁ ନେଇ ରାଷ୍ଟ୍ରପତି ପୁଟିନଙ୍କ ସହଯୋଗୀ ତଥା ରୁଷିଆର ସଂସଦୀୟ ବକ୍ତା ଶନିବାର ଅନ୍ତର୍ଜାତୀୟ ଅପରାଧ କୋର୍ଟ (ଆଇସିସି) ର କାର୍ଯ୍ୟକଳାପ ଉପରେ ପ୍ରତିବନ୍ଧକ ଲଗାଇବାକୁ ପ୍ରସ୍ତାବ ଦେଇଛନ୍ତି।
ପୁଟିନଙ୍କ ସହଯୋଗୀ ଭାୟାଚେସ୍ଲାଭ ଭୋଲୋଡିନ କହିଛନ୍ତି ଯେ ଆଇସିସି କାର୍ଯ୍ୟକଳାପକୁ ନିଷିଦ୍ଧ କରିବା ପାଇଁ ରୁଷିଆର ଆଇନରେ ସଂଶୋଧନ କରାଯିବା ଉଚିତ। ଏହା ବ୍ୟତୀତ ଯେଉଁମାନେ ଆଇସିସିକୁ ସହାୟତା ଏବଂ ସମର୍ଥନ ଦେଉଛନ୍ତି ସେମାନଙ୍କୁ ଦଣ୍ଡ ଦିଆଯିବା ଉଚିତ।
ଟେଲିଗ୍ରାମ ପୋଷ୍ଟରେ ଭାୟାସ୍ଲାଭ ଭୋଲୋଡିନ କହିଛନ୍ତି ଯେ ଆମ ଦେଶର ଅଞ୍ଚଳରେ ଆଇସିସି କାର୍ଯ୍ୟକଳାପକୁ ବାରଣ କରୁଥିବା ଆଇନରେ ସଂଶୋଧନ କରିବା ଆବଶ୍ୟକ। ଭୋଲୋଡିନ କହିଛନ୍ତି ଯେ ଆମେରିକା ଏହାର ନାଗରିକମାନଙ୍କୁ ହେଗ କୋର୍ଟରେ ଦୋଷୀ ସାବ୍ୟସ୍ତ ନକରିବାକୁ ଆଇନ ପ୍ରଣୟନ କରିଛି ଏବଂ ରୁଷିଆ ଏହା ଜାରି ରଖିବା ଉଚିତ। ରୁଷିଆ ଆଇସିସି ପାଇଁ କୌଣସି ସହାୟତା କିମ୍ବା ସମର୍ଥନ ପ୍ରଦାନ କରିବା ଆଇନ ଅନୁଯାୟୀ ଦଣ୍ଡନୀୟ ହେବା ଜରୁରୀ॥
ସୂଚନାଯୋଗ୍ୟ, ରୁଷିଆ, ଆମେରିକା ଏବଂ ଚୀନ ଭଳି ପ୍ରମୁଖ ଶକ୍ତି ଆଇସିସିର ସଦସ୍ୟ ନୁହଁନ୍ତି, ଯଦିଓ ବ୍ରିଟେନ, ଫ୍ରାନ୍ସ, ଜର୍ମାନୀ ଏବଂ ତାଜିକିସ୍ତାନ ଭଳି କିଛି ପୂର୍ବତନ ସୋଭିଏତ ଗଣତନ୍ତ୍ର ସମେତ ୧୨୩ ଦେଶ ଏହାର ସଦସ୍ୟ ରହିଛନ୍ତି।