କିଭ୍,୨୫।୧୨ : ରୁଷିଆ ଏବଂ ୟୁକ୍ରେନ ମଧ୍ୟରେ ୧୦ମାସ ଧରି ଚାଲିଥିବା ଯୁଦ୍ଧ ମଧ୍ୟରେ ରୁଷିଆ ପୁଣି ଥରେ ୟୁକ୍ରେନ ଉପରେ ଆକ୍ରମଣ କରିଛି। ଶନିବାର ମୁକ୍ତ ହୋଇଥିବା ୟୁକ୍ରେନ ସହର ଖେରସନ ଉପରେ ରୁଷିଆର ଆକ୍ରମଣରେ ୧୦ ଜଣଙ୍କର ମୃତ୍ୟୁ ଘଟିଥିବା ବେଳେ ୬୮ଜଣ ଆହତ ହୋଇଛନ୍ତି। ଏହି ସମୟରେ, ୟୁକ୍ରେନର ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଆକ୍ରମଣାତ୍ମକ ମନୋଭାବ ପ୍ରଦର୍ଶନ କରିଛନ୍ତି। ତାଙ୍କ ଖ୍ରୀଷ୍ଟମାସ ବାର୍ତ୍ତାରେ ସେ କହିଛନ୍ତି ଯେ ୟୁକ୍ରେନର ଲୋକମାନେ ଖ୍ରୀଷ୍ଟମାସରେ କୌଣସି ଚମତ୍କାରର ଅପେକ୍ଷା କରିବେ ନାହିଁ, କିନ୍ତୁ ନିଜେ ଚମତ୍କାର ପ୍ରଦର୍ଶନ କରିବେ।
ଜେଲେନସ୍କିଙ୍କ ଟେଲିଗ୍ରାମ ଆକାଉଣ୍ଟରେ ଥିବା ଚିତ୍ରଗୁଡ଼ିକରେ ସହରର ଜଳୁଥିବା କାର, ଭଙ୍ଗାଘର,ରାସ୍ତା କଡ଼ରେ ପଡ଼ିଥିବା ମୃତଦେହ ଆଦି ରହିଛି। ସେ ଲେଖିଛନ୍ତି ଯେ ସୋସିଆଲ ନେଟୱାର୍କଗୁଡ଼ିକ ଏହି ଚିତ୍ରଗୁଡ଼ିକୁ ସମ୍ବେଦନଶୀଳ ପଦାର୍ଥ ଭାବରେ ଚିହ୍ନିତ କରିବ, କିନ୍ତୁ ଏସବୁ ସମ୍ବେଦନଶୀଳ ପଦାର୍ଥ ନୁହେଁ। ଏହା ହେଉଛି ୟୁକ୍ରେନ ଏବଂ ୟୁକ୍ରେନୀୟମାନଙ୍କର ପ୍ରକୃତ ଜୀବନ। ଜେଲେନସ୍କି ଲେଖିଛନ୍ତି ଯେ ଏହା ଆତଙ୍କ ସୃଷ୍ଟି କରିବା ଭୟଭୀତ କରାଇବା ଏବଂ ନିଜର ଆନନ୍ଦ ପାଇଁ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କ ଦ୍ୱାରା କରାଯାଉଛି। ଏସବୁ କାର୍ଯ୍ୟ କରି ତାଙ୍କୁ ମଜା ଲାଗୁଛି।
ତାଙ୍କ ଆକ୍ରମଣାତ୍ମକ ଖ୍ରୀଷ୍ଟମାସ ବାର୍ତ୍ତାରେ ୟୁକ୍ରେନ ରାଷ୍ଟ୍ରପତି ଜେଲେନସ୍କି କହିଛନ୍ତି ଯେ ୟୁକ୍ରେନବାସୀ ଏହି ଶୀତକୁ ସହ୍ୟ କରିବେ କାରଣ ସେମାନେ ଜାଣନ୍ତି ଯେ ସେମାନେ କ’ଣ ପାଇଁ ଲଢୁଛନ୍ତି। ସ୍ବାଧୀନତା ପାଇଁ ମୂଲ୍ୟ ଦେବାକୁ ପଡିବ। ରୁଷିଆ ଲକ୍ଷ ଲକ୍ଷ ଲୋକଙ୍କୁ ଅନ୍ଧକାର ଭିତରକୁ ଠେଲିଦେବା ସତ୍ତ୍ୱେ ୟୁକ୍ରେନ ଲୋକମାନେ ଏହି ଖ୍ରୀଷ୍ଟମାସରେ ନିଜର ଚମତ୍କାର ପ୍ରଦର୍ଶନ କରିବେ। ୟୁକ୍ରେନର ରାଷ୍ଟ୍ରପତି କହିଛନ୍ତି ଯେ ଯୁଦ୍ଧ ଆରମ୍ଭରୁ ଆମେ ବଞ୍ଚିଛୁ। ଆମେ ଆକ୍ରମଣ, ଧମକ, ଆଣବିକ ବ୍ଲାକମେଲ, ଆତଙ୍କ, ମିସାଇଲ ଷ୍ଟ୍ରାଇକର ସମ୍ମୁଖୀନ ହୋଇଛୁ। ଆମେ ଏହି ଶୀତକୁ ସହ୍ୟ କରିବୁ କାରଣ ଆମେ ଜାଣୁ ଏହା ପାଇଁ ଆମେ ସଂଗ୍ରାମ କରୁଛୁ।
ଶନିବାର ଦିନ ୟୁକ୍ରେନ ରାଷ୍ଟ୍ରପତିଙ୍କ ସହକାରୀ କିରିଲୋ ଟିମୋଶେନ ଏହି ଆକ୍ରମଣର କ୍ଷୟକ୍ଷତି ଆକଳନ କରିଛନ୍ତି। ସେ କହିଛନ୍ତି ଯେ ୬୮ ଆହତଙ୍କ ମଧ୍ୟରୁ ୧୬ ଜଣ ଗୁରୁତର ଆହତ ହୋଇଛନ୍ତି। ରୁଷିଆ ଏପର୍ଯ୍ୟନ୍ତ ଏହି ଘଟଣା ବିଷୟରେ କିଛି କହିନାହିଁ।
