ଓ୍ବାଶିଂଟନ,୨୮।୨ : ଆମେରିକାର ଗୁପ୍ତଚର ଏଜେନ୍ସି ସିଆଇଏର ମୁଖ୍ୟ ବିଲ ବର୍ନସ କହିଛନ୍ତି ଯେ ରୁଷିଆ-ୟୁକ୍ରେନ୍ ଯୁଦ୍ଧରେ ରାଷ୍ଟ୍ରପତି ଭ୍ଳାଡିମିର ପୁଟିଙ୍କ ଦ୍ୱାରା ଆଣବିକ ଅସ୍ତ୍ରଶସ୍ତ୍ର ବ୍ୟବହାର ନେଇ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଚାଇନା ରାଷ୍ଟ୍ରପତି ଶି ଜିନପିଙ୍ଗଙ୍କ ବିରୋଧ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ୟୁକ୍ରେନ ଯୁଦ୍ଧରେ ରୁଷିଆ ଆଣବିକ ଅସ୍ତ୍ର ବ୍ୟବହାର କରିପାରେ ବୋଲି ଆମେରିକା ଭୟଭୀତ ଅଛି। ଏପରି ପରିସ୍ଥିତିରେ ରୁଷିଆ ଯେଭଳି ଆଣବିକ ଅସ୍ତ୍ରଶସ୍ତ୍ର ବ୍ୟବହାର ନ କରେ ସେଥିପାଇଁ ଆମେରିକା ଉଦ୍ୟମ କରୁଛି। ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ ରୁଷିଆ ସହ କଥାବାର୍ତ୍ତା କରିବାକୁ ଭାରତ ଏବଂ ଚାଇନା ନିବେଦନ କରିଛନ୍ତି ଯାହା ଦ୍ୱାରା ଏସବୁ ଅସ୍ତ୍ରଶସ୍ତ୍ରର ବ୍ୟବହାର ବନ୍ଦ ହୋଇପାରିବ। ଏଭଳି ପରିସ୍ଥିତିରେ ଭାରତ ଏବଂ ଚାଇନା ଏହି ଅସ୍ତ୍ରଶସ୍ତ୍ର ବ୍ୟବହାରକୁ ବିରୋଧ କରିଥିବାରୁ ଆମେରିକା ସନ୍ତୋଷ ବ୍ୟକ୍ତ କରିଛି।
ଏକ ସାକ୍ଷାତକାର ସମୟରେ ବର୍ନସ କହିଛନ୍ତି ଯେ ଗତ ବର୍ଷ ତୁର୍କୀରେ ରୁଷିଆର ଗୁପ୍ତଚର ଏଜେନ୍ସିର ମୁଖ୍ୟ ସରୋଜ ନରଶକିନଙ୍କ ସହ ତାଙ୍କର ଏକ ସାକ୍ଷାତ ହୋଇଥିଲା। ବାର୍ତ୍ତାଳାପ ଅତ୍ୟନ୍ତ ନୈରାଶ୍ୟଜନକ ବୋଲି ବର୍ନସ କହିଛନ୍ତି। ଏହି ବାର୍ତ୍ତାଳାପ ସମୟରେ ବର୍ନସ ନରିଶକିନ ଏବଂ ତାଙ୍କ ମାଧ୍ୟମରେ ପୁଟିନଙ୍କ ନିକଟକୁ ଏକ ବାର୍ତ୍ତା ପଠାଇବାକୁ ଚେଷ୍ଟା କରିଥିଲେ ଯେ ଯଦି ସେ ଆଣବିକ ଅସ୍ତ୍ର ବ୍ୟବହାର କରନ୍ତି ତେବେ ଏହାର ଭୟଙ୍କର ପରିଣାମ ଘଟିବ। ସିଆଇଏ ମୁଖ୍ୟ କହିଛନ୍ତି ଯେ ନରିଶକିନ ଏବଂ ପୁଟିନ ମଧ୍ୟ ଏହାର ଗମ୍ଭୀରତା ବୁଝୁଛନ୍ତି। ଏହା ମଧ୍ୟ ଗୁରୁତ୍ୱପୂର୍ଣ୍ଣ ଯେ ଚାଇନା ନେତୃତ୍ୱ ଏବଂ ଭାରତୀୟ ପ୍ରଧାନମନ୍ତ୍ରୀ ମୋଦି ମଧ୍ୟ ସ୍ପଷ୍ଟ କରିଛନ୍ତି ଯେ ସେମାନେ କୌଣସି ପ୍ରକାର ଏଭଳି ଅସ୍ତ୍ରଶସ୍ତ୍ର ବ୍ୟବହାରକୁ ବିରୋଧ କରୁଛନ୍ତି।
ବର୍ନସ କହିଛନ୍ତି ଯେ ସେ ଅନୁଭବ କରିଛନ୍ତି ଯେ ପୁଟିନ ତଥାପି ବହୁତ ଅହଂକାରୀ ଏବଂ ସେ ଭାବନ୍ତି ଯେ ସେ ସବୁକିଛି ନିୟନ୍ତ୍ରଣ କରିପାରିବେ। ପୁଟିନ ଅନୁଭବ କରିଛନ୍ତି ଯେ ସେ ୟୁକ୍ରେନକୁ ଧ୍ୱଂସ କରିପାରିବେ ଏବଂ ୟୁକ୍ରେନର ସହଯୋଗୀ ଥିବା ୟୁରୋପୀୟ ଦେଶଗୁଡ଼ିକୁ ନୋଇବାକୁ ବାଧ୍ୟ କରିପାରିବେ। ଉଲ୍ଲେଖନୀୟ କଥା ହେଉଛି, ଆମେରିକା ଏବଂ ରୁଷିଆ ମଧ୍ୟରେ ଏକ ଷ୍ଟ୍ରାଟେଜିକ ଅସ୍ତ୍ରଶସ୍ତ୍ର ହ୍ରାସ ଚୁକ୍ତି ହୋଇଥିଲା, ଯେଉଁଥିରେ ଉଭୟ ଦେଶ ପରସ୍ପରର ଆଣବିକ ଅସ୍ତ୍ରଶସ୍ତ୍ରର ଭଣ୍ଡାର ଯାଞ୍ଚ୍ କରୁଥିଲେ। କିନ୍ତୁ ବର୍ତ୍ତମାନ ରୁଷିଆ ଏହି ଚୁକ୍ତିରୁ ଓହରି ଆସି ସାରା ବିଶ୍ୱକୁ ଚିନ୍ତିତ କରିଛି। ୟୁକ୍ରେନ ଯୁଦ୍ଧ ସମୟରେ ପୁଟିନ ଏହା ମଧ୍ୟ କହିଛନ୍ତି ଯେ ଯଦି ଆବଶ୍ୟକତା ପଡେ ତେବେ ସେ ଆଣବିକ ଅସ୍ତ୍ର ବ୍ୟବହାର କରିବାକୁ କୁଣ୍ଠାବୋଧ କରିବେ ନାହିଁ।