ନୂଆଦିଲ୍ଲୀ, ୨।୨: ୟୁକ୍ରେନ ଏବଂ ନାଟୋ ଦେଶମାନଙ୍କ ମଧ୍ୟରେ ତିକ୍ତତା ବୃଦ୍ଧି ପାଇବା ନେଇ ରୁଷିଆ ରାଷ୍ଟ୍ରପତି ବ୍ଲାଡିମୀର ପୁଟିନ ଆମେରିକାକୁ ଚେତାବନୀ ଦେଇଛନ୍ତି। ରୁଷିଆକୁ ଘେରିବା ପାଇଁ ଆମେରିକା ୟୁକ୍ରେନ୍ର ବ୍ୟବହାର କରୁଛି ବୋଲି ସେ ଅଭିଯୋଗ କରିଛନ୍ତି। ଏଭଳି ଅଭିଯୋଗ କରି ପୁଟିନ ପ୍ରଥମ ଥର ପାଇଁ ନୀରବତା ଭାଙ୍ଗିଛନ୍ତି।
ୟୁକ୍ରେନରେ ଚାଲିଥିବା ସୁରକ୍ଷା ସଙ୍କଟର ସମାଧାନ ପାଇଁ ରୁଷିଆ ଏବଂ ପାଶ୍ଚାତ୍ୟ ଦେଶର ମିଳିତ ସହଯୋଗର ଆବଶ୍ୟକତା ରହିଥିବା ସେ କହିଛନ୍ତି। ପୁଟିନ ଏହା ମଧ୍ୟ କହିଛନ୍ତି ଯେ ଆମେରିକା ଏବଂ ନାଟୋ ଦେଶ ପ୍ରତିକ୍ରିୟା ଉପରେ ରୁଷିଆ ତୀକ୍ଷ୍ଣ ନଜର ରଖିଛି। ସେ କହିଛନ୍ତି ଯେ ଆମେରିକା ଏବଂ ଏହାର ସହଯୋଗୀମାନେ ରୁଷିଆର ପ୍ରମୁଖ ସୁରକ୍ଷା ଦାବିକୁ ଅଣଦେଖା କରିଛନ୍ତି।
ୟୁକ୍ରେନ ଉପରେ ପାଶ୍ଚାତ୍ୟ ଦେଶମାନଙ୍କ ସହ ବିବାଦକୁ ନେଇ ଏକ ମାସରୁ ଅଧିକ ସମୟ ମଧ୍ୟରେ ପୁଟିନ ପାଶ୍ଚାତ୍ୟ ଦେଶଗୁଡ଼ିକ ଉପରେ ଆକ୍ରମଣାତ୍ମକ ଆଭିମୁଖ୍ୟ ଗ୍ରହଣ କରିଥିଲେ। ପୁଟିନ କହିଛନ୍ତି ଯେ ଏହା ସ୍ପଷ୍ଟ ଯେ ପାଶ୍ଚାତ୍ୟ ଦେଶଗୁଡ଼ିକ ରୁଷିଆର ଦାବିକୁ ଅଣଦେଖା କରିଛନ୍ତି। ନାଟୋ ୟୁକ୍ରେନ ଏବଂ ଅନ୍ୟ ପୂର୍ବତନ ସୋଭିଏତ ଦେଶ କ୍ଷେତ୍ରରେ ହସ୍ତକ୍ଷେପ କରିପାରିବ ନାହିଁ। ସେମାନେ ରୁଷିଆର ସୀମା ନିକଟରେ ଆପତ୍ତିଜନକ ଅସ୍ତ୍ରଶସ୍ତ୍ର ମଧ୍ୟ ଠୁଳ କରିପାରିବେ ନାହିଁ। ନାଟୋର ବିସ୍ତାରବାଦୀ ନୀତି ଏବଂ ଅସ୍ତ୍ରଶସ୍ତ୍ର ଠୁଳକୁ ରୋକିବା ପାଇଁ ପୁଟିନ ବାରମ୍ବାର ନାଟୋ ଦେଶମାନଙ୍କୁ କହିିଛନ୍ତି।
ପୁଟିନ୍ ଚାହୁଁଛନ୍ତି ଯେ ନାଟୋ ଦେଶଗୁଡିକ ୧୯୯୭ରେ ଥିବା ସାମରିକ ସ୍ଥିତିକୁ ଫେରିଯାଆନ୍ତୁ। ପୁଟିନ କହିଛନ୍ତି ଯେ ୟୁକ୍ରେନର ସୁରକ୍ଷାକୁ ନେଇ ଆମେରିକା ରାଷ୍ଟ୍ରପତି ଜୋ ବାଇଡେନ୍ ଅଧିକ ଚିନ୍ତିତ ମନେ ହେଉନାହିଁ। ନାଟୋର ମୂଳ ଲକ୍ଷ୍ୟ ହେଉଛି ରୁଷିଆର ବିକାଶକୁ ବନ୍ଦ କରିବା। ସେ କହିଛନ୍ତି ଯେ ଏହି ଲକ୍ଷ୍ୟ ହାସଲ କରିବା ପାଇଁ ୟୁକ୍ରେନ କେବଳ ଏକ ମୋହରା ପାଲଟିଛି। ପୁଟିନ କହିଛନ୍ତି ଯେ ମୁଁ ଆଶା କରୁଛି ଶେଷରେ ଏହାର ସମାଧାନ ମିଳିବ।
