ଢେଙ୍କାନାଳ ଅଫିସ, ୨୦।୧୨: ଢେଙ୍କାନାଳ ଜିଲାର ଆଦିବାସୀ ବହୁଳ କଙ୍କଡ଼ାହାଡ଼ ବ୍ଲକର ଅପହଞ୍ଚ ପୁଟ୍ଟିପାଳ ହେବ ଆଦର୍ଶ ଗ୍ରାମ। ଅଞ୍ଚଳରେ ରାସ୍ତାଘାଟ, ପାନୀୟଜଳ, ଶିକ୍ଷା, ସ୍ବାସ୍ଥ୍ୟ ସମେତ ଅନ୍ୟାନ୍ୟ ମୌଳିକ ସୁବିଧା ହାତପାଆନ୍ତାରେ ମିଳିବ। ଗ୍ରାମବାସୀଙ୍କୁ ମୁଖ୍ୟସ୍ରୋତରେ ସାମିଲ କରିବା ପାଇଁ ସମସ୍ତ ଉଦ୍ୟମ କରାଯିବ। ଶନିବାର ଗ୍ରାମ ପରିଦର୍ଶନ କରିବା ଅବସରରେ ଏଭଳି ଘୋଷଣା କରିଛନ୍ତି ଜିଲାପାଳ ସରୋଜ କୁମାର ସେଠୀ। ଅଞ୍ଚଳରେ ଉନ୍ନୟନମୂଳକ କାର୍ଯ୍ୟକ୍ରମ ତ୍ୱରାନ୍ବିତ କରିବା, ସରକାରୀ ଯୋଜନାର ସଫଳ ରୂପାୟନ ଲାଗି ବିଡିଓ ବୁଲ୍ବୁଲ୍ ବେହେରା ପୁଟ୍ଟିପାଳକୁ ପୋଷ୍ୟ ଭାବେ ଗ୍ରହଣ କରିଛନ୍ତି।
ପୁଟ୍ଟିପାଳରେ ପ୍ରାଥମିକ ଶିକ୍ଷା ଲାଗି ସ୍ବତନ୍ତ୍ର ଭାବେ ୨ ଜଣ ଶିକ୍ଷକଙ୍କୁ ନିୟୋଜିତ କରାଯିବ। ପିଲାଙ୍କ ପୁଷ୍ଟିସାଧନ, ସ୍ବାସ୍ଥ୍ୟ ପରୀକ୍ଷା, ପରିମଳ ବ୍ୟବସ୍ଥା ସୁଦୃଢ଼ୀକରଣ ଲାଗି ପ୍ରତି ମାସରେ ଅଧିକାରୀମାନେ ଗ୍ରାମକୁ ଯାଇ ସ୍ଥିତି ବୁଝିବେ। ଗ୍ରାମକୁ ସବୁଦିନିଆ ରାସ୍ତା ହେବ। ୧୦ ଲକ୍ଷ ଟଙ୍କା ବ୍ୟୟରେ ରାସ୍ତା ଉନ୍ନତୀକରଣ କରାଯିବ। ଏକୁଲ, ସେକୁଲ, କୋଟ ଏବଂ ପୁଟ୍ଟିପାଳକୁ ସଂଯୋଗ କରୁଥିବା ରାସ୍ତାରେ ପ୍ରବାହିତ ନାଳ ଉପରେ ୫୦ ଲକ୍ଷ ଟଙ୍କାରେ ବ୍ରିଜ୍ ନିର୍ମାଣ ହେବ। ଆଭ୍ୟନ୍ତରୀଣ ଗ୍ରାମକୁ ସଂଯୋଗ କରୁଥିବା ରାସ୍ତାଗୁଡ଼ିକୁ କଂକ୍ରିଟ୍ କରାଯିବ। ଏକୁଲ, ସେକୁଲ ଅଞ୍ଚଳରେ ଆର୍ଥିକ ପୁଞ୍ଜିପ୍ରବାହ ଲାଗି ଇକୋ ଟୁରିଜମ୍ର ବିକାଶ କରିବା ଲାଗି ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯିବ। ଅଞ୍ଚଳର ବିକାଶ ଲାଗି ଏକାଧିକ ବହୁମୁଖୀ ପ୍ରକଳ୍ପ ନିର୍ମାଣ କରାଯିବ ବୋଲି ଜିଲାପାଳ ସୂଚନା ଦେଇଛନ୍ତି। ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ ସମସ୍ତଙ୍କୁ କାମ ଯୋଗାଇ ଦିଆଯିବ। ଫଳରେ ଲୋକମାନେ ରୋଜଗାର ଲାଗି ବାହାରକୁ ଯିବେନାହିଁ ବୋଲି ପିଡି ଡିଆର୍ଡିଏ ସାଫଲ୍ୟ ମଣ୍ଡିତ ପ୍ରଧାନ ସୂଚନା ଦେଇଛନ୍ତି। ଏହି ଅବସରରେ ଜିଲାପାଳ ଚିଲିରା ଗ୍ରାମ ଗସ୍ତ କରି ସେଠାକାର ଏସ୍ଏଚ୍ଜି ଦ୍ୱାରା କରାଯାଇଥିବା ପରିବା ଚାଷ କ୍ଷେତ୍ର ପରିଦର୍ଶନ କରି ପ୍ରଶଂସା କରିଥିଲେ। ଜିଲା ବନଖଣ୍ଡ ଅଧିକାରୀ ଡା. ପ୍ରକାଶଚାନ୍ଦ ଗୋଗିନେନି, କାମାକ୍ଷାନଗର ଉପଜିଲାପାଳ ଜ୍ୟୋତିଶଙ୍କର ସାହୁ, ସିଡିଏମ୍ଓ ଡା. ସୁଜାତାରାଣୀ ମିଶ୍ରଙ୍କ ସମେତ ବିଭିନ୍ନ ବିଭାଗ ଓ ପୋଲିସ ପ୍ରଶାସନର ଅଧିକାରୀମାନେ ଉପସ୍ଥିତ ଥିଲେ।
