ଟାଟୁର କ୍ରେଜ ଆଜିକାଲି ବହୁତ ବଢିଯାଇଛି। ପୂର୍ବେ ଟାଟୁ କଲାବେଳେ ଲୋକେ ଅନେକଥର ଭାବୁଥିଲେ କ’ଣ କରାଇବେ। ହେଲେ ଏବେ ତ ଏହାକୁ ନେଇ ଏମିତି ପାଗଳାମୀ ଦେଖାଦେଉଛି ଯେ ଲୋକେ ଅଜବରୁ ଅଜବ ଟାଟୁ କରାଇବାକୁ ବି ପଛାଉ ନାହାନ୍ତି। କିଛି ଲୋକ ତ ଦେହସାରା ଅଜବ ଟାଟୁରେ ଭର୍ତ୍ତି କରି ଦେଉଛନ୍ତି। ସେମିତି ଜଣେ ବ୍ୟକ୍ତି ହେଉଛନ୍ତି ଆମେରିକାର ପଲ୍ ଲରେନ୍ସ, ଯେକି ଦ ଏନିଗ୍ମା ନାମରେ ବେଶ୍ ପରିଚିତ। ସେ ପେସାରେ ଜଣେ ଚିତ୍ରକର, ଅଭିନେତା ଓ ସାଇଡ ଶୋ’ ପରଫର୍ମର୍। ପଲ୍ଙ୍କର ଟାଟୁ ନିଶା ଏତେ ଯେ, ନିଜ ଦେହ ସାରା ସେ ଟାଟୁ କରାଇଛନ୍ତି। ସେ ପୁଣି ଜିଗ୍ସ’ ପଜଲ୍ର ଟାଟୁ। ତାଙ୍କ ଶରୀରକୁ ଦେଖିଲେ ଲାଗେ ସେ ଅନେକଗୁଡିଏ ପଜଲ ଖଣ୍ଡର ସମାହାରରେ ତିଆରି ହୋଇଛନ୍ତି। ଏହି ଟାଟୁ ଲାଗି ସେ ଗିନିଜ ଓ୍ବାର୍ଲଡ ରେକର୍ଡରେ ବି ସ୍ଥାନ ପାଇଛନ୍ତି। ତାଙ୍କ ଶରୀରରେ ୨୧୨୩ଟି ଟାଟୁ ଥିବା ଗଣନାରୁ ଜଣାପଡିଥିଲା। ଆଉ ଏହାକୁ ଗଣିବା ଲାଗି ଗିନିଜ ଓ୍ବାର୍ଲଡ ରେକର୍ଡର କର୍ମଚାରୀଙ୍କୁ ୩ ଘଣ୍ଟା ସମୟ ଲାଗିଥିଲା।