ଦକ୍ଷିଣ ଆଫ୍ରିକାରୁ ଏକ ବିବ୍ରତ କଲାଭଳି ଭିଡିଓ ସାମ୍ନାକୁ ଆସିଛି। ଭିଡିଓରେ କିଛି ମଦ୍ୟପ ଯୁବକ ୬ ଫୁଟ ଲମ୍ବ ଏକ ଅଜଗରକୁ ଧରି ଜୋରଜବରଦସ୍ତ ମଦ ପିଆଉଥିବା ଦେଖାଯାଇଛି। ଏହା ସୋସିଆଲ ମିଡିଆରେ ଭାଇରାଲ ହେବା ପରେ ଲୋକଙ୍କ ମନରେ ଆକ୍ରୋଶ ସୃଷ୍ଟି ହୋଇଛି। ଯୁବକମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରାଯାଉଛି। ସରୀସୃପମାନଙ୍କର ଅଙ୍ଗରେ ମଦ ଭଳି ଜିନିଷ ହଜମ କରିବାର କ୍ଷମତା ନାହିଁ। ଏଣୁ ସାପଟିର ଅଙ୍ଗଗୁଡ଼ିକ ଜଳି ଯାଇଥାଇପାରେ କିମ୍ବା ଏହା ମରିଯାଇଥାଇପାରେ ବୋଲି ବିଶେଷଜ୍ଞମାନେ ଆଶଙ୍କା ପ୍ରକାଶ କରିଛନ୍ତି।
ଡେଲିମେଲର ଏକ ରିପୋର୍ଟ ଅନୁଯାୟୀ, ମଦ୍ୟପ ଯୁବକମାନଙ୍କର ଏକ ଗ୍ରୁପ ବୁଦା ନିକଟରେ ବସିଥିଲେ। ସେତିକିବେଳେ ସେମାନଙ୍କର ଦୃଷ୍ଟି ଅଜଗରଟି ଉପରେ ପଡ଼ିଥିଲା। ଏହାପରେ ସେମାନେ ବେଶ କ୍ରୁରତାର ସହ ସାପଟିକୁ ଧରି ଜବରଦସ୍ତ ମଦ ପିଆଇବାରେ ଲାଗିଥିଲେ। ମାତ୍ର ୧୪ ସେକେଣ୍ଡର ଏହି ଭିଡିଓ ଭାଇରାଲ ହେବା ପରେ ସମସ୍ତଙ୍କୁ ଚମକାଇଛି। ତେବେ ଭିଡିଓକୁ ନେଇ ପ୍ରତିକ୍ରିୟା ପ୍ରକାଶ ପାଇବା ପରେ ପୋଲିସ ଉକ୍ତ ଯୁବକମାନଙ୍କୁ ଧରିବା ଲାଗି ପ୍ରୟାସ ଜାରି ରଖିଛି।