ଜେନେଭା, ୧୩ା୮(ଏପି): ପୁରୁଷ ଫୁଟ୍ବଲ ବିଶ୍ୱକପ୍ ଗୋଟିଏ ଦିନ ପୂର୍ବରୁ ଆରମ୍ଭ ହେବ। ଫେଡେରେଶନ ଅଫ୍ ଇଣ୍ଟରନ୍ୟାଶନାଲ ଫୁଟ୍ବଲ ଆସୋସିଏଶନ୍ସ(ଫିଫା) ଏ ସମ୍ପର୍କରେ ଗୁରୁବାର ଆନୁଷ୍ଠାନିକ ନିଷ୍ପତ୍ତି ନେଇଛି। ଆୟୋଜକ ଦେଶ କାତାରର ମ୍ୟାଚ ରବିବାର ସନ୍ଧ୍ୟାରେ ଆୟୋଜନ କରାଯିବା ଦ୍ୱାରା ସମଗ୍ର ବିଶ୍ୱରେ ଅଧିକ ଖେଳପ୍ରେମୀ ଏହାକୁ ଉପଭୋଗ କରିପାରିବେ। କାତାର ବର୍ତ୍ତମାନ ନଭେମ୍ବର ୨୧ ପରିବର୍ତ୍ତେ ନଭେମ୍ବର ୨୦ରେ ଦୋହାଠାରେ ଇକ୍ୱେଡର ବିପକ୍ଷ ମ୍ୟାଚ ଖେଳିବ। ଫଳତଃ ବିଶ୍ୱକପ୍ ୨୮ ଦିନ ପରିବର୍ତ୍ତେ ୨୯ ଦିନ ଧରି ଚାଲିବ। ଫିଫା ବିଶ୍ୱକପ୍ ସାଧାରଣତଃ ଜୁନ୍-ଜୁଲାଇରେ ଖେଳାଯାଇଥାଏ। ମାତ୍ର ମରୁଭୂମି ଦେଶ କାତାରରେ ସେତେବେଳେ ଗ୍ରୀଷ୍ମଋତୁ ଚାଲିଥିବାରୁ ଉତ୍ତାପକୁ ଏଡାଇବା ଲାଗି ଟୁର୍ନାମେଣ୍ଟକୁ ଘୁଞ୍ଚାଇ ଦିଆଯାଇଥିଲା। ବିଳମ୍ବରେ ଉଦ୍ଘାଟନୀ ଦିବସ ପରିବର୍ତ୍ତନ ଅନେକଙ୍କୁ ବିସ୍ମିତ କରିଛି। ତେବେ ୬ଟି ମହାଦେଶୀୟ ଫୁଟ୍ବଲ ପରିଷଦର ସଭାପତି ଏବଂ ଫିଫା ସଭାପତି ଗିଆନି ଇନ୍ଫାଣ୍ଟିନୋଙ୍କୁ ନେଇ ଗଠିତ କମିଟି ବୈଠକରେ ସର୍ବସମ୍ମତି କ୍ରମେ ଏହି ନିଷ୍ପିତ୍ତି ନିଆଯାଇଛି। ଏହି ଯୋଜନା ସମ୍ପର୍କରେ ଫିଫା ତରଫରୁ ଗତ ବୁଧବାର ସୂଚନା ଦିଆଯାଇଥିଲା। କାତାର ବର୍ତ୍ତମାନ ବିଶ୍ୱକପ୍ରେ ଏହାର ପଦାର୍ପଣ ମ୍ୟାଚ ନଭେମ୍ବର ୨୦ରେ ସ୍ଥାନୀୟ ସମୟ ସନ୍ଧ୍ୟା ୭ଟାରେ ଇକ୍ୱେଡର ବିପକ୍ଷରେ ଉଦ୍ଘାଟନୀ ଖେଳିବ। ଏହା ପୂର୍ବରୁ ୬୦,୦୦୦ ଆସନ କ୍ଷମତା ବିଶିଷ୍ଟ ଅଲ୍ ବାୟତ୍ ଷ୍ଟାଡିୟମରେ ଉଦ୍ଘାଟନୀ ସମାରୋହ ହେବ। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ କାତାର-ଇକ୍ୱେଡର ଟୁର୍ନାମେଣ୍ଟର ତୃତୀୟ ମ୍ୟାଚ ଥିଲା। ଏହି ମ୍ୟାଚ ପୂର୍ବରୁ ଉଦ୍ଘାଟନୀ ସମାରୋହ ହେବାର ଥିଲା। ଇଂଲଣ୍ଡ ଓ ଇରାନ ମଧ୍ୟରେ ଦ୍ୱିତୀୟ ମ୍ୟାଚ ଖେଳାଯିବାର ଘଣ୍ଟାକ ପରେ ଏହା ଅନୁଷ୍ଠିତ ହୋଇଥାନ୍ତା। ଟୁର୍ନାମେଣ୍ଟ ପାଇଁ ଏପ୍ରିଲରେ କାର୍ଯ୍ୟସୂଚୀ ପ୍ରସ୍ତୁତ କରାଯାଇଥିଲା। ପରମ୍ପରା ଅନୁସାରେ ଆୟୋଜକ ଦେଶ କାତାର ମ୍ୟାଚକୁ କାହିଁକି ପ୍ରଥମେ ରଖା ନ ଗଲା ସେ ସମ୍ପର୍କରେ ସ୍ପଷ୍ଟ କରାଯାଇ ନ ଥିଲା। ଗୁରୁବାର ନିଷ୍ପତ୍ତି ପୂର୍ବରୁ କାତାରର ଗ୍ରୁପ୍ ଏ’ରେ ନେଦରଲାଣ୍ଡ୍ସ-ସେନେଗାଲ ପ୍ରଥମ ମ୍ୟାଚ୍ ନଭେମ୍ବର ୨୧ ସ୍ଥାନୀୟ ସମୟ ଅପରାହ୍ନ ୧ଟା ବେଳେ ଖେଳାଯାଇଥାନ୍ତା। ବର୍ତ୍ତମାନ ତାହା ସୋମବାର ସନ୍ଧ୍ୟା ୭ଟାରେ ଖେଳାଯିବ, ଯେଉଁ ସମୟରେ କି ପୂର୍ବନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ କାତାର-ଇକ୍ୱେଡର ମ୍ୟାଚ ଖେଳାଯାଇଥାନ୍ତା। ଫିଫାର ଏହି ନିଷ୍ପତ୍ତିରେ ପ୍ରାୟୋଜକଙ୍କ ସମସ୍ୟା ସୃଷ୍ଟି କରିପାରେ ବୋଲି ବିଶ୍ୱର ଟପ୍ ଟାୟାର ବ୍ୟାକର୍ସ କୋକା-କୋଲା ଓ ଭିସାର ପୂର୍ବତନ ମାର୍କେଟିଂ କାର୍ଯ୍ୟନିର୍ବାହୀ ରିକାର୍ଡୋ ଫୋର୍ଟ ପ୍ରକାଶ କରିଛନ୍ତି। ଉଦାହରଣ ସ୍ବରୂପ ପ୍ରାୟୋଜକମାନେ ସେମାନଙ୍କ ଅତିଥିଙ୍କ ଲାଗି ହୋଟେଲ, ବିମାନଯାତ୍ରା ପାଇଁ ପୂର୍ବରୁ ବୁକିଂ କରିସାରିଥିବେ। ସମସ୍ତ ଆବଶ୍ୟକ କାର୍ଯ୍ୟ ନେଇ ଚୁକ୍ତି କରିସାରିଥିବେ। ତାରିଖ ବଦଳିବା ଦ୍ୱାରା ସମସ୍ୟା ଉପୁଜିବା ନିଶ୍ଚିତ ବୋଲି ସେ କହିଛନ୍ତି।