ନୂଆଦିଲ୍ଲୀ, ୧୨ା୭ (ପି.ଟି.)-ପଟିଆଲାସ୍ଥିତ ନ୍ୟାଶନାଲ ଇନଷ୍ଟିଚ୍ୟୁଟ୍ ଅଫ୍ ସ୍ପୋଟର୍ସ (ଏନ୍ଆଇଏସ୍)ଠାରେ ୩ଜଣ ବକ୍ସର କ୍ୱାରାଣ୍ଟାଇନ୍ ନିୟମ ଉଲ୍ଲଂଘନ କରିଥିବା ଅଭିଯୋଗ ହୋଇଛି। ଏଥିପାଇଁ ଶନିବାର ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ(ସାଇ) ଏକ ତଦନ୍ତ କମିଟି ଗଠନ କରିଛି। ସାଇ ସେକ୍ରେଟାରି ରୋହିତ ଭରଦ୍ୱାଜ ୪ ଜଣିଆ ସଦସ୍ୟବିଶିଷ୍ଟ ଏହି ତଦନ୍ତ ପ୍ୟାନେଲର ମୁଖ୍ୟ ଅଛନ୍ତି। ଅନ୍ୟମାନେ ହେଲେ ଟାର୍ଗେଟ୍ ଅଲିମ୍ପିକ ପୋଡିୟମ ସ୍କିମ୍ (ଟପ୍ସ)ର ସିଇଓ କମାଣ୍ଡର ରାଜେଶ ରାଜଗୋପାଳନ, ପୂର୍ବତନ ହକି କୋଚ୍ ଏ.କେ. ବଂଶଲ ଓ ସାଇ ଡେପୁଟି ଡାଇରେକ୍ଟର (ପର୍ସୋନେଲ) ଦଣ୍ଡପାଣି। ଖବର ଅନୁସାରେ ରାଜ୍ୟଗୋଷ୍ଠୀ କ୍ରୀଡ଼ା ଓ ଏସିଆନ ଗେମ୍ସ ସ୍ବର୍ଣ୍ଣ ପଦକ ବିଜେତା ବିକାଶ କ୍ରିଷ୍ଣନ, ନୀରଜ ଗୋୟାତ ଏବଂ ଏସିଆନ ଗେମ୍ସ ବ୍ରୋଞ୍ଜ ବିଜେତା ସତୀଶ କୁମାର ଆଇସୋଲେଶନ ପିରିୟଡରେ କ୍ୱାରାଣ୍ଟାଇନ ନିୟମ ଉଲ୍ଲଂଘନ କରି ସେମାନଙ୍କ ସାଥୀ ଆଥଲେଟ୍ଙ୍କ ସହ ମିଳାମିଶା କରିଥିଲେ। ବିକାଶ (୬୯କେଜି) ଏବଂ ସତୀଶ (+୯୧କେଜି) ଉଭୟେ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଛନ୍ତି। କେଉଁ ପରିସ୍ଥିତିରେ ଏହା ଘଟିଛି କମିଟି ତାହାର ତଦନ୍ତ କରି ଯଥା ଶୀଘ୍ର ରିପୋର୍ଟ ଉପସ୍ଥାପନ କରିବ। ଖବର ଅନୁସାରେ ଏହି ଘଟଣାରେ ଏନ୍ଆଇଏସ୍ର କାର୍ଯ୍ୟନିର୍ବାହୀ ନିର୍ଦ୍ଦେଶକ ରାଜ ସିଂ ବିଷ୍ଣ୍ନୋଇଙ୍କ ସମ୍ପୃକ୍ତିକୁ ନେଇ ଯାଞ୍ଚ କରାଯିବ।
