ଲଣ୍ଡନ,୨୩।୪: ବ୍ରିଟେନର ମହାରାଣୀ ଏଲିଜାବେଥ୍ ନିଜର ୯୬ତମ ଜନ୍ମଦିନ ଗୁରୁବାର ସାଣ୍ଡ୍ରିଂହମ୍ରେ ପାଳନ କରିଛନ୍ତି। ଦେଶର ସବୁଠାରୁ ଲମ୍ବା ସମୟ ପର୍ଯ୍ୟନ୍ତ ଶାସନ କ୍ଷମତାରେ ଥିବା ବ୍ରିଟେନ ମହାରାଣୀ ଏଲିଜାବେଥ୍ ସ୍ବାମୀ ପ୍ରିନ୍ସ ଫିଲିପ୍ଙ୍କ ସ୍ମୃତିରେ ସାଣ୍ଡ୍ରିଂହମ୍ର ଏକ ଫାର୍ମ ହାଉସ୍ରେ ନିଜ ଜନ୍ମଦିନ ପାଳନ କରିଛନ୍ତି। ଚଳିତ ବର୍ଷ ବ୍ରିଟେନ ମହାରାଣୀ ଏଲିଜାବେଥ୍ଙ୍କ ଶାସନର ୭୦ବର୍ଷ ପୁରିଛି। ତାଙ୍କ ଶାସନର ପ୍ଲାଟିନମ୍ ଜୁବଲି ଅବସରରେ ମହାରାଣୀଙ୍କୁ ଏକ ସ୍ବତନ୍ତ୍ର ବାର୍ବି ଡଲ୍ରେ ସମ୍ମାନିତ କରାଯାଇଛି। ଏହି ଲୁକ୍ରେ ମହାରାଣୀ ବହୁ ସୁନ୍ଦର ଦେଖାଯାଉଛନ୍ତି। ବାର୍ବି ଡଲ୍କୁ ଏଲିଜାବେଥ୍ଙ୍କ ଭଳି ଗାଉନ୍ ପିନ୍ଧାଯାଇଥିବା ବେଳେ ଏହା ଉପରେ ନୀଳ ରଙ୍ଗର ରିବନ ବନ୍ଧାଯାଇଥିବା ଦେଖିବାକୁ ମିଳିଛି। ବାର୍ବି ଡଲ୍ ନିର୍ମାତା କମ୍ପାନୀ ମେଟାଲ ମହାରାଣୀ ଏଲିଜାବେଥ୍ଙ୍କର ରୂପକୁ ବାର୍ବିରେ ଦିଆଯାଇଛି। ମହାରାଣୀଙ୍କ ୯୬ତମ ଜନ୍ମଦିନ ଅବସରରେ ଗୁରୁବାର ମେଟାଲ କମ୍ପାନୀ ଏହି ବାର୍ବି ଡଲ୍କୁ ସର୍ବସମ୍ମୁଖରେ ଉନ୍ମୋଚନ କରିଥିଲା। ମହାରାଣୀ ବାର୍ବି ଡଲ୍ଙ୍କ ଆମେରିକା ମୂଲ୍ୟ ଅନୁସାରେ ୭୫ ଡଲାର ହେବ। ଗୁରୁବାରଠାରୁ ଏହି ଡଲ୍ ଆମାଜନ, ଓ୍ବାଲମାର୍ଟ, ଟାର୍ଗେଟ ଓ ମ୍ୟାଟେଲରେ ଉପଲବ୍ଧ ହେବ। ସୂଚନା ମୁତାବକ, ଏହି ପ୍ଲାଟିନମ୍ ଜୁବଲି ଉତ୍ସବ ଜୁନ ୨ରୁ ୫ ପର୍ଯ୍ୟନ୍ତ ଚାଲିବ ବୋଲି ସୂଚନା ରହିଛି।