ଲଣ୍ଡନ: ଦୀର୍ଘ ୭୭ ବର୍ଷ ପରେ ବ୍ରିଟେନ୍ର ପୂର୍ବତନ ରାଣୀ ଏଲିଜାବେଥ୍ ଦ୍ୱିତୀୟ ଏବଂ ପ୍ରିନ୍ସ ଫିଲିପ୍ଙ୍କ ବିବାହ କେକ୍ର ଏକ ଖଣ୍ଡକୁ ନିଲାମ କରାଯାଇଛି। ୧୯୪୭ ନଭେମ୍ବର ୨୦ରେ କ୍ୱିନ୍ ଏଲିଜାବେଥ ଏବଂ ପ୍ରିନ୍ସ ଫିଲିପ୍ଙ୍କର ବିବାହ ଅନୁଷ୍ଠିତ ହୋଇଥିଲା। ଉକ୍ତ ବିବାହରେ ଏକ ବିରାଟ କେକ୍ କଟାଯାଇଥିଲା, ଯାହାର ଗୋଟିଏ ଖଣ୍ଡକୁ ରବିବାର ୨.୩୬ ଲକ୍ଷ ଟଙ୍କା ମୂଲ୍ୟରେ ନିଲାମ କରାଯାଇଛି। ଏହି କେକ୍ ଖଣ୍ଡର ନାମ ‘ଭେରି ରେୟାର ସ୍ଲାଇସ୍’ ରଖାଯାଇଛି। ତେବେ ନିଲାମ ହୋଇଥିବା ଏହି କେକ୍ ଖଣ୍ଡ ଏବେ ଖାଇବା ଯୋଗ୍ୟ ହୋଇ ରହିନାହିଁ। ନିଲାମରେ ଏହି କେକ୍ କିଣିଥିବା ବ୍ୟକ୍ତିଙ୍କ ନାମ ହେଉଛି ମାରିଅନ୍ ପଲ୍ସନ। ସେ ସ୍କଟ୍ଲାଣ୍ଡର ରାଜଧାନୀ ଏଡିନବର୍ଗ ସ୍ଥିତ ହଲିରୁଡ୍ହାଉସ୍ରେ ଜଣେ ଗୃହରକ୍ଷୀ ଭାବେ କାର୍ଯ୍ୟରତ ଅଛନ୍ତି।
ଏଲିଜାବେଥ ଦ୍ୱିତୀୟ ଏବଂ ପ୍ରିନ୍ସ ଫିଲିପ୍ଙ୍କ ରାଜକୀୟ ବିବାହ କେକ୍ ୯ ଫୁଟ ଉଚ୍ଚର ହୋଇଥିବାବେଳେ ଏହାର ଓଜନ ୨୭ କିଲୋଗ୍ରାମ ରହିଥିଲା। ସେତେବେଳେ ଏହି କେକ୍ର ମୂଲ୍ୟ ୫୦୦ ବ୍ରିଟିଶ୍ ପାଉଣ୍ଡ ଥିଲା। ଏହି କେକ୍କୁ ଚିନିରେ ସଜାଯାଇଥିଲା ଏବଂ ଏଥିରେ ରାଜକୀୟ ଦମ୍ପତିଙ୍କର ପ୍ରିୟ ଜିନିଷଗୁଡ଼ିକୁ ଉଲ୍ଲେଖ କରାଯାଇଥିଲା। ବିବାହକୁ ଆସିଥିବା ପ୍ରାୟ ୨ ହଜାର ଅତିଥି ଏହି କେକ୍ର ସ୍ବାଦ ଚାଖିଥିଲେ। କେକ୍ର ବଳିଯାଇଥିବା ଅଂଶକୁ ସୁରକ୍ଷିତ ଭାବେ ପ୍ୟାକିଂ କରାଯାଇ ଏକ ରୁପା ଖୋଦିତ ବାକ୍ସରେ ରଖାଯାଇଥିଲା।