ଚାନ୍ଦବାଲି,୨।୯(କିଷାନ ପାତ୍ର): ଜିଲା ଧର୍ମଶାଳାର ପୂର୍ବତନ ରାଜନେତା ସ୍ବର୍ଗତ କଳ୍ପତରୁ ଦାସଙ୍କ ପ୍ରତିମୂର୍ତ୍ତି ପ୍ରସଙ୍ଗରେ ବିଧାନସଭାରେ ଚାନ୍ଦବାଲି ବିଧାୟକ ବ୍ୟୋମକେଶ ରାୟଙ୍କ ପ୍ରଶ୍ନକୁ ନେଇ ଭାଜପା ଯୁବମୋର୍ଚ୍ଚା ପକ୍ଷରୁ ପ୍ରତିକ୍ରିୟା ପ୍ରକାଶ ପାଇଛି। ରବିବାର ଚାନ୍ଦବାଲି ଭାଜପା କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଯୁବମୋର୍ଚ୍ଚା ସମାଲୋଚନା କରିଥିବା ବେଳେ ସଦସ୍ୟ ତଥା ୭ନଂ. ୱାର୍ଡର କାଉନସିଲର ଚନ୍ଦନ ରାଉତ କହିଛନ୍ତି, ଚାନ୍ଦବାଲି ବିଧାୟକ ଦୀର୍ଘ ୧୦ବର୍ଷ ଭିତରେ ବ୍ଲକର ପାଙ୍ଗୁଡ଼ା ଗ୍ରାମରେ ଥିବା ଜିଲାର ଏକମାତ୍ର କାର୍ଗିଲ ଶହୀଦ ନିରଞ୍ଜନ ବେହେରାଙ୍କ ପ୍ରତିମୂର୍ତ୍ତି ତିଆରି କରିପାରି ନାହାନ୍ତି। ବିଧାୟକ ଚାନ୍ଦବାଲିରେ ଥିବା ମହାପୁରୁଷମାନଙ୍କ ପ୍ରତିମୂର୍ତ୍ତିକୁ କେବେ ଦେଖିବାକୁ ଯାଇନାହାନ୍ତି। ବିଧାନସଭା ଗୃହରେ ଚାନ୍ଦବାଲିର ବିକାଶ ପ୍ରସଙ୍ଗକୁ ପଛରେ ପକାଇ ଧର୍ମଶାଳା ବ୍ଲକ୍ ପାଇଁ ଏତେ ଉଦାର କାହିଁକି ଦେଖାଉଛନ୍ତି। ଚାନ୍ଦବାଲି ପ୍ରସଙ୍ଗକୁ ଛାଡ଼ି ଧର୍ମଶାଳାର ଜଣେ ରାଜନେତାଙ୍କ ପ୍ରତିମୂତ୍ତିର୍ର୍ ଲାଗି ଗୃହରେ ମତ ଉପସ୍ଥାପନ କରିବା ଚାନ୍ଦବାଲି ପାଇଁ ଏକ ଲଜ୍ଜାଜନକ କଥା ବୋଲି ଯୁବମୋର୍ଚ୍ଚା ପକ୍ଷରୁ କୁହାଯାଇଛି। ଅଭିଯୋଗ ସମ୍ପର୍କରେ ବିଧାୟକ ରାୟ କହିଛନ୍ତି, ଜଣେ ବିଧାୟକ ହିସାବରେ ସେ ତାଙ୍କର କର୍ତ୍ତବ୍ୟ କରିଛନ୍ତି। ଦଳର ପୂର୍ବତନ ବରିଷ୍ଠ ନେତାଙ୍କ ପ୍ରତିମୂର୍ତ୍ତିକୁ ଅସମ୍ମାନ କରିବା ସମ୍ବନ୍ଧରେ ବିଧାନସଭାରେ ପ୍ରଶ୍ନ ଉଠାଇବା ତାଙ୍କର ଦାୟିତ୍ୱ ଓ କର୍ତ୍ତବ୍ୟ। ସ୍ବର୍ଗତ ଦାସ ପୂର୍ବତନ ମନ୍ତ୍ରୀ ଓ ରାଜ୍ୟ ସଭା ସଦସ୍ୟ ରହିଥିବା ସମୟରେ ଚାନ୍ଦବାଲି ପ୍ରତି ତାଙ୍କର ବହୁତ ଅବଦାନ ଥିଲା।
ଗତ ୩୦ ତାରିଖରେ ଚାନ୍ଦବାଲି ଦିଗଛିଆ ଛକ ନିକଟରେ ସ୍କୁଲ ଭ୍ୟାନ୍ ଓଲଟି ପଡ଼ିବା ପ୍ରସଙ୍ଗରେ ବିଦ୍ୟାଳୟର ସମ୍ପାଦକଙ୍କୁ ଦାୟୀ କରିଛି ଭାଜପା। ଯୁବନେତା ରମାକାନ୍ତ ଭୋଳଙ୍କ ଅଭିଯୋଗ ଅନୁଯାୟୀ, ସମ୍ପାଦକ ଆବାସ ଯୋଜନାରେ ଉକ୍ତ ବିଦ୍ୟାଳୟ ନିର୍ମାଣ କରାଇଥିବା ବେଳେ ସମ୍ପୂର୍ଣ୍ଣ ଜଳ ଜମିରେ ହୋଇଛି। ଜଳ ଜମିରେ ସ୍କୁଲ ଗୃହ ନିର୍ମାଣ ପାଇଁ ଅନୁମତି କିଏ ଦେଲେ ବୋଲି ସେ ପ୍ରଶ୍ନ କରିବା ସହ ଉକ୍ତ ବିଦ୍ୟାଳୟକୁ ଏନ୍ଓସି ମିଳିଛି କି ନାହିଁ ସେନେଇ ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ସମିତିସଭ୍ୟ ଅଭୟ ଭୋଳ, ରମାକାନ୍ତ ଭୋଳ, ବିଜୟ ପାଢ଼ୀ, ଏନ୍ଏସି ଯୁବ ସଭାପତି ସୁଶାନ୍ତ ମହାନ୍ତି, ସାର୍ଥକ ନାୟକ, ମଳୟ ନାୟକ, ଗଣେଶ ଦାସ, କମଳା ସୂତାରଙ୍କ ସହ ଭାଜପା ଯୁବନେତା ଖବରଦାତା ସମ୍ମିଳନୀରେ ଉପସ୍ଥିତ ଥିଲେ।