ଡ୍ରଗ୍ସ୍ ଯାଞ୍ଚ୍ ନେଇ ଏନ୍ସିବି ଉପରେ ପ୍ରଶ୍ନ ଚିହ୍ନ, ବର୍ଷେରେ ୫ ମାମଲା, ସବୁଥିରେ ଜଣେ ସାକ୍ଷୀ…
01 ନୂଆଦିଲ୍ଲୀ,୩୦।୧୦: ମୁମ୍ବାଇ କ୍ରୁଜ ଡ୍ରଗ ମାମଲାରେ ଜାମିନ ପାଇବା ପରେ ଶାହାରୁଖ ଖା୍ୟଙ୍କ ପୁଅ ଆର୍ୟନ ଖାଁ ଶନିବାର ଜାମିନ୍ରେ ଜେଲରୁ ମୁକୁଳିଛନ୍ତି। ମୁମ୍ବାଇ ଡ୍ରଗ ମାମଲା ବର୍ତ୍ତମାନ ଦୁଇ ଭାଗରେ ବିଭକ୍ତ ହୋଇଛି। ଗୋଟିଏ ପଟେ ଆର୍ୟନଙ୍କ ମାମଲା ଏବଂ ଅନ୍ୟ ପଟେ ଏନସିବି ଅଧିକାରୀ ସମୀର ୱାଙ୍ଖଡେଙ୍କ ବିରୋଧରେ ହୋଇଥିବା ଅଭିଯୋଗର ତଦନ୍ତ। ନବାବ ମଲିକଙ୍କ ନିରନ୍ତର ଆକ୍ରମଣ ପରେ ସମୀର ସ୍କାନରରେ ଆସିଛନ୍ତି। କେବଳ ଏତିକି ନୁହେଁ, ଏକ ନୂତନ ସୂଚନା ସାମ୍ନାକୁ ଆସିଛି।
ଏଥିରେ ଏନସିବି ମଧ୍ୟ ସ୍କାନରରେ ଆସୁଛି। କେତେକ ଗଣମାଧ୍ୟମ ସଂସ୍ଥାଙ୍କ ରିପୋର୍ଟରେ ଦାବି କରାଯାଇଛି ଯେ ଆର୍ୟନ ଡ୍ରଗ ମାମଲାରେ ଏନସିବି ଦ୍ୱାରା ପ୍ରସ୍ତୁତ ୧୦ ଜଣ ସାକ୍ଷୀଙ୍କ ମଧ୍ୟରେ ଜଣେ ବ୍ୟକ୍ତି ଅଛନ୍ତି। ତାଙ୍କୁ ଏଜେନ୍ସି ଦ୍ୱାରା ଏକ ବର୍ଷ ମଧ୍ୟରେ ପାଞ୍ଚଟି ମାମଲାରେ ପଞ୍ଚ ସାକ୍ଷୀ ଭାବରେ ବ୍ୟବହାର କରାଯାଇଛି।
ଏହି ବ୍ୟକ୍ତିଙ୍କ ନାମ ହେଉଛି ଆଦିଲ ଫଜଲ ଉସମାନି। ଗଣମାଧ୍ୟମ ସଂସ୍ଥା ଇଣ୍ଡିଆନ୍ ଏକ୍ସପ୍ରେସ୍ ରିପୋର୍ଟରେ ଏନସିବିର ସ୍ବତନ୍ତ୍ର ସାକ୍ଷୀ କିରଣ ଗୋସାଭି ଏବଂ ମନୀଷ ଭାନୁଶାଲିଙ୍କୁ ନେଇ ମଧ୍ୟ ପ୍ରଶ୍ନ ଉଠିଛି।
୨୦୧୮ରେ ଠକେଇ ମାମଲାରେ ପଳାତକ କିରଣ ଗୋସାଭିଙ୍କୁ ପୁଣେ ପୋଲିସ ଦୁଇ ଦିନ ପୂର୍ବରୁ ଗିରଫ କରିଛି। ଏଥି ସହ ମନୀଷ ଭାନୁଶାଲୀଙ୍କର ଭାଜପା ସହ ସମ୍ପର୍କ ଥିବା ଅଭିଯୋଗ ହୋଇଛି। ଏଥିସହ ସାକ୍ଷୀ ପ୍ରଭାକର ସେଲ ଏନସିବି ମୁମ୍ବାଇର ଆଞ୍ଚଳିକ ନିର୍ଦ୍ଦେଶକ ସମୀରଙ୍କ ବିରୋଧରେ ଅଭିଯୋଗ ଆଣିଛନ୍ତି। ସମୀର ଖାଲି କାଗଜରେ ଦସ୍ତଖତ କରିବାକୁ କହିଥିବା ପ୍ରଭାକର ଅଭିଯୋଗ କରିଛନ୍ତି।