କବିସୂର୍ଯ୍ୟନଗର,୨୧ା୬(କୃପାସିନ୍ଧୁ ସ୍ବାଇଁ): ଗଞ୍ଜାମ ଜିଲା କବିସୂର୍ଯ୍ୟନଗର ବ୍ଲକ ସିଆଳିଆ ପଞ୍ଚାୟତ ଅଧୀନ ସିଦ୍ଧେଶ୍ୱର ମନ୍ଦିର ନିକଟ ଲକ୍ଷ୍ମୀନାରାୟଣ ସାଗର ପୋଖରୀରେ ମାଛ ମଡ଼କ ଦେଖିବାକୁ ମିଳିଛି। ଶତାଧିକ ମାଛ ମରି ଭାସୁଥିବା ଦେଖି ଚାଷୀ ଆଖିରୁ ଲୁହ ଗଡ଼ାଉଛି। ଛୋଟ ମାଛଠୁ ବଡ଼ ରୋହି, ଭାକୁର ଭଳି ଅନେକ ପ୍ରଜାତିର ମାଛ ପାଣି ଉପରେ ମରି ଭାସୁଛନ୍ତି। ଏହି ସବୁ ମଲାମାଛକୁ ପୋଖରୀରୁ ବାହାର କରି ଟ୍ରାକ୍ଟର ଯୋଗେ ଦୂରସ୍ଥାନରେ ପକାଯାଉଛି। ମାଛ ଚାଷ କରି ଦୁଇପଇସା ରୋଜଗାର ଆଶା କରିଥିବା ଚାଷୀ ମୁଣ୍ଡରେ ହାତଦେଇ ବସିଛି।
ଏହି ପୋଖରୀକୁ ଦୁଇ ବର୍ଷ ଲିଜ ସୂତ୍ରରେ ମାଛ ଚାଷ ଲାଗି ନେଇଥିଲେ ସୁଶାନ୍ତ କୁମାର ବିଶ୍ୱାଳ। ସେ ଲକ୍ଷାଧିକ ଟଙ୍କା ବ୍ୟୟରେ ବିଭିନ୍ନ ପ୍ରଜାତିର ଯାଆଁଳ ଛାଡି ମାଛଚାଷ କରିଥିବା ବେଳେ ଆଉ କିଛିଦିନ ପରେ ରୋଜଗାର ଲକ୍ଷ୍ୟ ରଖିଥିଲେ। ମଙ୍ଗଳବାର ସନ୍ଧ୍ୟାରେ ପୋଖରୀର କିଛି ମାଛ ମାରି ଭାସୁଥିବା ସେ ଦେଖିବାକୁ ପାଇଥିଲେ ଏବଂ ବୁଧବାର ସକାଳୁ ଏହାର ସଂଖ୍ୟା ବୃଦ୍ଧି ପାଇ ପୋଖରୀ ସାରା ମଲା ମାଛ ଭାସୁଥିବା ଦେଖିଥିଲେ। କିଭଳି ଏହାର କ୍ଷତିଭରଣା କରିବେ ଓ ମାଛ ଚାଷ ଲାଗି କରିଥିବା ଋଣ କିଭଳି ପରିଶୋଧ କରିବେ ତାକୁ ନେଇ ଚିନ୍ତାରେ ପଡିଛନ୍ତି ସୁଶାନ୍ତ। ତେବେ ପୋଖରୀର ମାଛ ମରିବାର ପ୍ରକୃତ କାରଣ ଅସ୍ପଷ୍ଟ ଥିବା ବେଳେ ଲକ୍ଷାଧିକ ଟଙ୍କାର କ୍ଷତି ସହିଥିବା ସୁଶାନ୍ତଙ୍କୁ ସରକାରୀ ସହାୟତା ଯୋଗାଇବାକୁ ଦାବି କରିଛନ୍ତି ଅଞ୍ଚଳବାସୀ। ଅନ୍ୟପକ୍ଷରେ ଘଟଣା ନେଇ ଆମ ପାଖରେ କୌଣସି ଅଭିଯୋଗ ହୋଇନାହିଁ। ଅଭିଯୋଗ ପରେ ପ୍ରକୃତ କାରଣ ଜଣାପଡିବ ବୋଲି କହିଛନ୍ତି ବ୍ଲକ ମତ୍ସ୍ୟ ସମ୍ପଦ ବିଭାଗ ଅଧିକାରୀ ଋଷିକୁଲ୍ୟା ସାହୁ। ଏତେ ସଂଖ୍ୟକ ମାଛ ମରିବା ଘଟଣା ନେଇ ସୁଶାନ୍ତ କବିସୂର୍ଯ୍ୟନଗର ଥାନାରେ ଲିଖିତ ଅଭିଯୋଗ କରିଛନ୍ତି।