ଆର.ଉଦୟଗିରି,୬ା୯(ଡି.ଏନ.ଏ.): ଆର.ଉଦୟଗିରି ଥାନା ଶରଳାପଦରରୁ ଆର.ଉଦୟଗିରି ରାସ୍ତା ମରଣଯନ୍ତା ପାଲଟିଛି। ୨୦୦୮ରେ ପ୍ରଧାନମନ୍ତ୍ରୀ ସଡ଼କ ଯୋଜନାରେ ଏହି ରାସ୍ତା କାମ ହୋଇଥିଲା। ଆଜି ପର୍ଯ୍ୟନ୍ତ ଏହି ରାସ୍ତାରେ ମାଟି ମଧ୍ୟ ପଡିନାହିଁ। ଗ୍ରାମ୍ୟ ଉନ୍ନୟନ ବିଭାଗ ରାସ୍ତା କାମ ସରିବା ପରେ ଏହି ରାସ୍ତାକୁ ପିଡବ୍ଲ୍ୟୁଡି ବିଭାଗକୁ ହସ୍ତାନ୍ତର କରାଯାଇଛି। ପୂର୍ତ୍ତ ବିଭାଗ ପ୍ରତିବର୍ଷ ଲକ୍ଷ ଲକ୍ଷ ଟଙ୍କାର ବିଲ୍ ଦେଖାଉଥିବା ବେଳେ ପ୍ରକୃତରେ କୌଣସି କାମ ଏହି ରାସ୍ତାରେ ଦେଖିବାକୁ ମିଳୁନି। ରାସ୍ତା ଅବସ୍ଥା ଭଲ ଥିଲା, କିଛି ଦିନ ହେବ ଅଦିନିଆ ବର୍ଷା ହୋଇ ରାସ୍ତା ଅବସ୍ଥା ଅତି ଶୋଚନୀୟ ହୋଇଯାଇଛି। କିଛି ଦିନ ତଳେ ବର୍ଷାରେ ଘୋଡାନାଳ ନିକଟରେ ବଣରୁ ବଡ ବଡ ପଥର ଖସି ରାସ୍ତା ପାର୍ଶ୍ୱରେ ପଡିଛି। କିନ୍ତୁ ଆଜିସୁଦ୍ଧା ପୂର୍ତ୍ତ ବିଭାଗ ଅଧିକାରୀ ଉଠାଇବାର ନାଁ ଧରୁନାହାନ୍ତି। ଫଳରେ ଗାଡିମୋଟର ଯାତାୟାତ ବେଳେ ବହୁ ଅସୁବିଧା ହେଉଛି। ବର୍ଷା ଜଳରେ ରାସ୍ତା ଦୁଇ ପାର୍ଶ୍ୱ ଆଣ୍ଠୁଏ ଖାଲ ହୋଇଥିବାରୁ ଏହି ରାସ୍ତାରେ ବାରମ୍ବାର ଦୁର୍ଘଟଣା ଘଟି ଧନଜୀବନ ହାନି ହେଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଏଥିପ୍ରତି ପୂର୍ତ୍ତ ବିଭାଗ ଦୃଷ୍ଟିଦେଇ ରାସ୍ତା ମରାମତି କରିବାକୁ ଅଞ୍ଚଳବାସୀ ଦାବି କରିଛନ୍ତି । ୬ଟି ପଞ୍ଚାୟତର ପ୍ରାୟ ୩୦ ହଜାରରୁ ଊର୍ଦ୍ଧ୍ୱ ଲୋକ ଏହି ରାସ୍ତା ଦେଇ ଯାତାୟାତ କରନ୍ତି। ପ୍ରତିଦିନ 1ଯାତ୍ରୀବାହୀ ଗାଡ଼ିଠାରୁ ଆରମ୍ଭ କରି ଦୁଇଚକିଆ ଗାଡ଼ି ୧୦୦ରୁ ଊର୍ଦ୍ଧ୍ୱ ଯାତାୟାତ କରନ୍ତି। ରାସ୍ତାସାରା ଖାଲଖମା ଯୋଗୁ ସେମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସ୍ଥାନୀୟ ଲୋକ ଅଭିଯୋଗ କରିଛନ୍ତି ଯେ, ପ୍ରଧାନମନ୍ତ୍ରୀ ସଡକ ଯୋଜନାରେ ରାସ୍ତା କାମ ସରିବା ପରେ ୫ ବର୍ଷ ପର୍ଯ୍ୟନ୍ତ ଏହି ରାସ୍ତାର ମରାମତି ହେବା କଥା। ମାତ୍ର ଏହାପରେ ବିଭିନ୍ନ ସ୍ଥାନରେ ଖାଲଖମା ହୋଇଥିଲେ ମଧ୍ୟ କାମ ହୋଇନାହିଁ। ଶରଳାପଦରଠାରୁ ଆର.ଉଦୟଗିରି ୧୦କିଲୋମିଟର ରାସ୍ତା ବର୍ତ୍ତମାନ ମରଣଯନ୍ତା ପାଲଟିଛି। ସାମାନ୍ୟ ବର୍ଷାରେ ଖାଲରେ ଆଣ୍ଠୁଏ ପାଣି ଜମି ଦୁର୍ଘଟଣା ଘଟୁଛି। ତେବେ ତୁରନ୍ତ ଏହି ରାସ୍ତା କାମ ନ ହେଲେ ସମ୍ବଲପର ସରପଞ୍ଚ ଜଗନ୍ନାଥ ଗମାଙ୍ଗ, ତାଣ୍ଡିଗୁଡା ଗ୍ରାମର ବିକ୍ରମ ଆନନ୍ଦ ଓ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି। ଏ ନେଇ ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ ପ୍ରଭାକର ବେହେରାଙ୍କ ସହ ଯୋଗାଯୋଗ କରିବାରୁ ସେ କହିଥିଲେ, ସେହି ରାସ୍ତାକୁ ପୂର୍ତ୍ତ ବିଭାଗକୁ ଦୁଇ ବର୍ଷ ହେବ ହସ୍ତାନ୍ତର କରାଯାଇଛି। ସେ ରାସ୍ତା ମରାମତି କାମ କରିବେ। ଅନ୍ୟପଟେ ପୂର୍ତ୍ତ ବିଭାଗର ପାରଳାଖେମୁଣ୍ଡି ନିର୍ବାହୀ ଯନ୍ତ୍ରୀ ଅଶୋକ କୁମାର ଦାସଙ୍କୁ ପଚାରିବାରୁ ଉକ୍ତ ରାସ୍ତା ପାଇଁ କୌଣସି ଟଙ୍କା ଆସୁନି ଆମେ କିପରି କାମ କରିବୁ । ଉପର ଅଧିକାରୀଙ୍କୁ କହି ଟଙ୍କା ଆଣିଲେ କାମ କରିବୁ ବୋଲି କହିଥିଲେ। ଆର.ଉଦୟଗିରି ସବ୍ଡିଭିଜନରେ ଦୀର୍ଘ ମାସ ହେବ ସହକାରୀ ଯନ୍ତ୍ରୀ ପଦବୀ ଖାଲି ପଡିବା ସହ ଆର.ଉଦୟଗିରି ଓ ଖଜୁରିପଦା ସେକ୍ସନରେ ଦୀର୍ଘ ମାସ ହେଲା ସହକାରୀ କନିଷ୍ଠ ଯନ୍ତ୍ରୀ ପଦବୀ ଖାଲି ପଡିଛି। ଏହି ବିଷୟ ବିଭିନ୍ନ ଗଣମାଧ୍ୟମରେ ପ୍ରକାଶ ପାଉଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଏହି ସବ୍ଡିଭିଜନରେ ଏକମାତ୍ର କନିଷ୍ଠ ଯନ୍ତ୍ରୀରେ ଅଫିସ ଚାଲିଛି। ବିଭାଗୀୟ ମନ୍ତ୍ରୀ ଦୃଷ୍ଟି ଦେଇ ଆର.ଉଦୟଗିରି ସବ୍ଡିଭିଜନ ପୂର୍ତ୍ତ ବିଭାଗରେ ଖାଲି ପଡିଥିବା ସହକାରୀ ନିର୍ବାହୀ ଯନ୍ତ୍ରୀ ଓ ସହକାରୀ କନିଷ୍ଠ ଯନ୍ତ୍ରୀ ନିଯୁକ୍ତି କରିବାକୁ ଦାବି ହେଉଛି। ଏଥିସହ ଆର.ଉଦୟଗିରିରୁ ଶରଳାପଦର ରାସ୍ତା ନିର୍ମାଣ କରିବାକୁ ଅଞ୍ଚଳବାସୀ ଦାବି କରିଛନ୍ତି।