ଭବାନୀପାଟଣା,୫ା୫(ସ୍ବ.ପ୍ର): କଳାହାଣ୍ଡି ଜିଲା ଇନ୍ଦ୍ରାବତୀ ଜଳଭଣ୍ଡାରରୁ ଗତ ଜାନୁଆରୀ ୬ରୁ ରବି ଜଳସେଚନ ଆରମ୍ଭ ହୋଇଥିଲା। ଆସନ୍ତା ୬ରେ ଏହାର ଅବଧି ସରିବାକୁ ଥିବା ବେଳେ ଚାଷୀଙ୍କ ଆବଶ୍ୟକତାକୁ ଆଖି ଆଗରେ ରଖି ମେ ୧୫ ପର୍ଯ୍ୟନ୍ତ ଜଳସେଚନକୁ ବୃଦ୍ଧି କରାଯାଇ ପାରେ ବୋଲି ଜଣାପଡ଼ିଛି। ତେବେ ଧାନ ପାକଳ ହୋଇ ଆସୁଥିବାରୁ ବର୍ତ୍ତମାନ ଜଳ ଯୋଗାଣ ବନ୍ଦ ହେଲେ ଚାଷୀମାନେ ଧାନ ଅମଳ କରିବା ପାଇଁ ଅପେକ୍ଷା କରି ରହିଛନ୍ତି। ଗତ ଜାନୁଆରୀ ୬ରେ ଇନ୍ଦ୍ରାବତୀ ଜଳଭଣ୍ଡାର ଜଳପତ୍ତନ ୬୩୮ ମିଟର ଥିବାବେଳେ ଜଳସେଚନ ଆରମ୍ଭ କରାଯାଇ ବାମ କେନାଲ ଓ ଇନ୍ଦ୍ରାବତୀ ମେଗା ଲିଫ୍ଟ କେନାଲର ୪୭,୫୧୨ହେକ୍ଟର ଜମିକୁ ଜଳସେଚିତ କରାଯାଇଥିଲା। ୫ମାସ ପରେ ଜଳଭଣ୍ଡାରର ଜଳସ୍ତର ୬୩୨.୮୬ ମିଟରରେ ପହଞ୍ଚିଛି। ଅର୍ଥାତ୍ ମୋଟ ଜଳ ସଂରକ୍ଷଣ ୩୭.୭୩ପ୍ରତିଶତରେ ପହଞ୍ଚିଥିବା ଜଣାପଡ଼ିଛି। ଚଳିତବର୍ଷ ଜଳ ଭଣ୍ଡାରରେ ଗଚ୍ଛିତ ଜଳର ପରିମାଣ ସନ୍ତୋଷଜନକ ଥିବାବେଳେ ରବି ଜଳସେଚନ ଅବଧି ପରେ ସେହି ଗଚ୍ଛିତ ଜଳକୁ କେବଳ ବିଦ୍ୟୁତ୍ ଉତ୍ପାଦନରେ ଖର୍ଚ୍ଚ ନ କରି ପରବର୍ତ୍ତୀ ଖରିଫ ଜଳସେଚନ ପାଇଁ ସଞ୍ଚିତ କରି ରଖିବାକୁ ଦାବି ହେଉଛି।