ହିଞ୍ଜିଳିକାଟୁ, ୧୩/୧୧(ଦ୍ବିତୀକୃଷ୍ଣ ପଣ୍ଡା): ଗଞ୍ଜାମ ଜିଲାରେ ବିଭିନ୍ନ ମନ୍ଦିର ହୁଣ୍ଡି ଓ ସମ୍ପତ୍ତି ଉପରେ ଲୁଟେରାଙ୍କ ଲୋଲୁପ ଦୃଷ୍ଟି ପଡ଼ିଛି। ମଙ୍ଗଳବାର ରାତିରେ ହିଞ୍ଜିଳିକାଟୁ ଘୋଡାହାଡ ନଦୀ ନିକଟ ପରିବା ପାଲି ବଜାରରେ ଅବସ୍ଥିତ ରାଧାକୃଷ୍ଣ ମନ୍ଦିର ଦାନ ହୁଣ୍ଡିକୁ ଦୁବୃର୍ତ୍ତ ଭାଙ୍ଗି ଲକ୍ଷାଧିକ ଟଙ୍କା ଲୁଟ କରିଥିବା ଅଭିଯୋଗ ହୋଇଛି।
ଗଞ୍ଜାମ ଜିଲାରେ ମା’ତାରାତାରିଣୀଙ୍କ ମନ୍ଦିର ଦାନହୁଣ୍ଡି ଓ ଅଳଙ୍କାର ଲୁଟ ହୋଇଥିଲା। ପରେ ଖଲ୍ଲିକୋଟ ଓ ଆସିକା ଅଞ୍ଚଳର ମନ୍ଦିର ଦାନହୁଣ୍ଡି ଭାଙ୍ଗି ଲୁଟେରା ଗ୍ୟାଙ୍ଗ ଲୁଟ କରିଥିବା ବେଳେ ଏବେ ହିଞ୍ଜିଳିକାଟୁ ରାଧାକୃଷ୍ଣ ମନ୍ଦିର ଲୁଟ୍ ହୋଇଛି।
ଅନ୍ୟ ପକ୍ଷରେ ପୋଲିସ ଆଖିରେ ଧୂଳି ଦେଇ ଲୁଟେରା ଗ୍ୟାଙ୍ଗ ଗୋଟିଏ ପରେ ଗୋଟିଏ ଲୁଟ କରି ଫେରାର ହୋଇଯାଉଥିଲେ ମଧ୍ୟ ମନ୍ଦିର ସମ୍ପତ୍ତି ସୁରକ୍ଷା ଦେବାରେ କିମ୍ବା ଲୁଟେରା ଗ୍ୟାଙ୍ଗକୁ କାବୁ କରିବାରେ ପୋଲିସ ପ୍ରଶାସନ ବିଫଳ ହୋଇଥିବା ଅଭିଯୋଗ ହୋଇଛି।
ପ୍ରକାଶ ଯେ, ହିଞ୍ଜିଳିକାଟୁ ଘୋଡାହାଡ ନଦୀ ନିକଟରେ ହୋଲସେଲ ପରିବା ବଜାର ପରିସରରେ ରାଧାକୃଷ୍ଣ ମନ୍ଦିରକୁ ପ୍ରତିଦିନ ପରି ମଙ୍ଗଳବାର ରାତିରେ ପୂଜକ ଦେବନୀତି ସମ୍ପନ୍ନ ପରେ ଚାବି ପକାଇ ଘରକୁ ଫେରିଥିଲେ। ବୁଧବାର ଭୋରରୁ ବ୍ୟବସାୟୀମାନେ ବଜାରରେ ପହଞ୍ଚି ମନ୍ଦିର ଭିତରେ ଦାନହୁଣ୍ଡି ନ ଥିବା ଦେଖିବାକୁ ପାଇଥିଲେ। ମନ୍ଦିର ଠାରୁ କିଛି ଦୂରରେ ଦାନହୁଣ୍ଡିଟି ଭାଙ୍ଗି ପଡିଥିଲା। ଉକ୍ତ ସ୍ଥାନରେ କିଛି ଖୁଚୁରା ପଇସା ପଡିଥିବା ଦେଖିବାକୁ ମିଳିଥିଲା। ଦାନହୁଣ୍ଡିରେ କେତେ ଟଙ୍କା ରହିଥିବା ସଠିକ ଆକଳନ କରାଯାଇ ନ ଥିଲେ ମଧ୍ୟ ଦୀର୍ଘ ୩ ବର୍ଷରୁ ଉର୍ଦ୍ଧ ସମୟ ଧରି ଦାନହୁଣ୍ଡି ଖୋଲାଯାଇ ନ ଥିବାରୁ ପ୍ରାୟ ୨ ଲକ୍ଷରୁ ଉର୍ଦ୍ଧ ଟଙ୍କା ଦାନ ଟଙ୍କା ରହିଥିବା ଅନୁମାନ କରାଯାଉଛି।
ଘଟଣା ନେଇ ମନ୍ଦିର ପରିଚାଳନା କମିଟି ସଭାପତି କୃଷ୍ଣଚନ୍ଦ୍ର ଗୌଡ ବୁଧବାର ହିଞ୍ଜିଳି ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପାଇ ହିଞ୍ଜିଳି ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ସରଜମିନ ତଦନ୍ତ ଆରମ୍ଭ କରିବା ସହ ମନ୍ଦିର ଓ ବଜାର ରେ ଲାଗିଥିବା ବିଭିନ୍ନ ସିସିଟିଭି ଫୁଟେଜ ଯାଞ୍ଚ କରି ଘଟଣାର ତଦନ୍ତ ଚଳାଇଛି।