ମସ୍କୋ/କିଭ୍ , ୫ା୯: ୟୁକ୍ରେନ୍ ଉପରେ ୬ ମାସରୁ ଅଧିକ ସମୟ ହେଲା ରୁଷିଆ ଆକ୍ରମଣ ଜାରି ରଖିଛି। ଯୁଦ୍ଧ ଆରମ୍ଭ ହେବାଦିନରୁ ଆମେରିକା ସମେତ ୟୁରୋପୀୟ ସଂଘ (ଇୟୁ) ରୁଷିଆ ଉପରେ ଚାପ ପକାଇବା ପାଇଁ କଟକଣା ଲଗାଇବାରେ ଲାଗିଥିବାବେଳେ ଏବେ ମସ୍କୋ ସହ ଟ୍ରାଭେଲ ଭିଜା ଏଗ୍ରିମେଣ୍ଟ ବାତିଲ କରିବାକୁ ଯୋଜନା କରୁଛି। ଏହା ହେଲେ ୟୁରୋପୀୟ ଦେଶଗୁଡ଼ିକୁ ରୁଷୀୟ ନାଗରିକ ଯାତ୍ରା କରିବା କଷ୍ଟକର ହୋଇପଡ଼ିବ। ଏହାକୁ ନେଇ କ୍ରେମଲିନ୍ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ରୁଷିଆ ୟୁରୋପକୁ ବିକିରଣ ବିସ୍ଫୋରଣର ଧମକ ଦେଇଛି। ରେଡିଏଶନ ପାଇଁ କୌଣସି ଭିଜା ଦରକାର ପଡ଼ିବ ନାହିଁ ବୋଲି ମସ୍କୋ କହିଛି। ଏସବୁ ଭିତରେ ରୁଷିଆ କବ୍ଜାରେ ଥିବା ୟୁକ୍ରେନ୍ ସ୍ଥିତ ୟୁରୋପର ସର୍ବବୃହତ୍ ନ୍ୟୁକ୍ଲିୟର ପାଓ୍ବାର ପ୍ଲାଣ୍ଟ୍କୁ ଏହାର ଶେଷ ବାହ୍ୟ ପାଓ୍ବାରଲାଇନ୍ ସଂଯୋଗ ବିଚ୍ଛିନ୍ନ ହୋଇଛି। ଏହି ପ୍ଲାଣ୍ଟ ନିକଟରେ ବିସ୍ଫୋରଣ ପାଇଁ ରୁଷିଆ ଏବଂ ୟୁକ୍ରେନ୍ ପରସ୍ପରକୁ ଦାୟୀ କରୁଛନ୍ତି। ମସ୍କୋ ନ୍ୟୁକ୍ଲିୟର ବିକିରଣର ଧମକ ଦେଇ ୟୁରୋପକୁ ବ୍ଲାକମେଲ କରିବାକୁ ଚାହୁଁଛି ବୋଲି ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି କହିଛନ୍ତି। ସେଠାରେ କୌଣସି ମୁହୂର୍ତ୍ତରେ ଆଣବିକ ବିପର୍ଯ୍ୟୟ ଘଟିପାରେ ବୋଲି ଜାତିସଂଘର ଇଣ୍ଟରନ୍ୟାଶନାଲ ଆଟମିକ୍ ଏନର୍ଜୀ ଏଜେନ୍ସି (ଆଇଏଇଏ) ଆଶଙ୍କା ବ୍ୟକ୍ତ କରିଛି।
ରୁଷିଆ ଉପରେ ଭିଜା କଟକଣା ଲଗାଇବା ନିଷ୍ପତ୍ତିକୁ ନେଇ ୟୁରୋପ ଦୁଇ ଭାଗ ହୋଇଛି। ରୁଷିଆ ଟୁରିଷ୍ଟ୍ଙ୍କ ପାଇଁ ଭିଜା ଚୁକ୍ତି ବାତିଲ କରିବା ସପକ୍ଷରେ ଜର୍ମାନୀ ନାହିଁ। ୟୁକ୍ରେନ୍କୁ ସମର୍ଥନ ନ କରିବା ଦାବିରେ ୨ ହଜାରରୁ ଊର୍ଦ୍ଧ୍ୱ ଲୋକ ଜର୍ମାନୀରେ ଆନ୍ଦୋଳନ କରିବା ଭଳି ବିରଳ ଦୃଶ୍ୟ ଦେଖିବାକୁ ମିଳିଛି। ସେମାନଙ୍କ ମଧ୍ୟରେ ଅଧିକାଂଶ ରୁଷୀୟ ଭାଷୀ ଆନ୍ଦୋଳନକାରୀ ରହିଛନ୍ତି। ଜର୍ମାନୀରେ ରହୁଥିବା ରୁଷିଆ ନାଗରିକ ସମୁଦାୟଙ୍କ ପକ୍ଷରୁ ଏପରି କରାଯାଇଛି। ଅନ୍ୟପକ୍ଷରେ ରୁଷିଆ ତେଲ ଉପରେ ପ୍ରାଇସ୍ କ୍ୟାପ୍ ଲଗାଇବା ପାଇଁ ଜି-୭ ରାଷ୍ଟ୍ରଗୁଡ଼ିକ ରାଜି ହେବା ପରେ ମସ୍କୋ ଜର୍ମାନୀକୁ ଯାଇଥିବା ସବୁଠାରୁ ବଡ଼ ଗ୍ୟାସ୍ ପାଇପଲାଇନ ନର୍ଡ ଷ୍ଟ୍ରିମ୍-୧କୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କରିଦେଇଛି। ଏହି ପାଇପ୍ରେ ବର୍ଷକୁ ୫୫ କ୍ୟୁବିକ୍ ମିଟର ଗ୍ୟାସ୍ ପ୍ରତିବର୍ଷ ରୁଷିଆରୁ ୟୁରୋପକୁ ଆସିଥାଏ। ତେଲ ଲିକ୍ ଯୋଗୁ ରୁଷିଆ ଏପରି କରିଥିବା କହୁଥିଲେ ହେଁ ଏଥିଯୋଗୁ ଜର୍ମାନୀ ସମେତ ୟୁରୋପରେ ମଧ୍ୟ ପ୍ରାକୃତିକ ଗ୍ୟାସ୍ ସଙ୍କଟ ଗମ୍ଭୀର ହେବ। ଆଗକୁ ଶୀତଦିନ ଆସୁଥିବାରୁ ଥଣ୍ଡାରୁ ରକ୍ଷା ପାଇବା ପାଇଁ ପ୍ରାକୃତିକ ଗ୍ୟାସ୍ର ଅଭାବ ଦେଖାଯାଇପାରେ। ୟୁରୋପର ଏକାଧିକ ଦେଶରେ ବ୍ଲାକ୍ଆଉଟ୍ ସମସ୍ୟା ମଧ୍ୟ ହୋଇପାରେ ବୋଲି ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ସୁଇଡେନ୍, ଫିନ୍ଲାଣ୍ଡ ଏନର୍ଜୀ କମ୍ପାନୀଗୁଡ଼ିକୁ ଲିକ୍ୟୁଡିଟି ଗ୍ୟାରେଣ୍ଟି (ନଗଦ ଅର୍ଥ ପ୍ରଦାନ ସୁନିଶ୍ଚିତ କରିବା) ପ୍ରଦାନ କରିଛି। ଅପରପକ୍ଷେ ୟୁରୋପର ସର୍ବବୃହତ ନ୍ୟୁକ୍ଲିୟର ପ୍ଲାଣ୍ଟ୍ ଥିବା ଜାପୋରିଜିଝିଆ ରୁଷିଆ ପାଇଁ ରଣନୈତିକ ଦୃଷ୍ଟିରୁ ବେଶ୍ ଗୁରୁତ୍ୱପୂର୍ଣ୍ଣ। ମସ୍କୋ କବ୍ଜାରେ ଥିବା କ୍ରିମିଆଠାରୁ ଏହା ପ୍ରାୟ ୨୦୦ କି.ମି. ଦୂରରେ ଅବସ୍ଥିତ। ୨୦୨୧ରେ ୟୁକ୍ରେନ୍ ଆବଶ୍ୟକ କରୁଥିବା ଏନର୍ଜୀର ୫୫.୫% ଏହି ପ୍ଲାଣ୍ଟରୁ ଆସୁଥିଲା।